1 Saa7oli Filisxeemeta olidi simmidaape guye, Dawiti Engaada bazzuwan de7ees geysa si7is. 2 Saa7oli Isra7eele giddofe dooretida heedzu mukulu asaa ekidi, Dawitanne iya asaa koyanaw, “Bazzo Deeshata Zaalla” geetetiya bessaa mata bis.

3 Saa7oli ogiya doonan dorsa girbiya matan de7iya gongoluwa giddo gelidi shee7anaw uttis. Dawitinne iya asay gongoluwas guye baggara shiiqidi uttidosona. 4 Dawita asay, “ ‘Heko, taani ne morkiya ne kushen aatha immana; neeni iya bolla koydaba oothana’ yaagidi Goday new odida gallasay hachi” yaagidosona. Dawiti Saa7ola erisonna shiiqidi Saa7ola ma7uwa macaraape qanxi ekis.

5 Dawiti Saa7ola ma7uwa macaraa qanxida gisho iya wozanay qiirotis. 6 Dawiti ba asaako, “Goday tiyida kawa, ta godaa bolla taani hessa oothanaysi woyko iya bolla ta kushiya denthanaysi taape haako; Goday tiyidi iya kawothis” yaagis. 7 Dawiti haysada gidi, Saa7ola ba asan boshisonna diggis. Saa7oli gongoluwa giddofe keyidi ba ogiya bis.

8 Saa7oli bidaape guye, Dawiti gongoluwa giddofe keyidi, “Ta godaw, kawaw” yaagidi Saa7ola xeegin, Saa7oli guye simmidi xeellis. Dawiti sa7an gufannidi Saa7olas ziggis. 9 Dawiti Saa7olako, “Dawiti nena qohanaw koyees” giya asaa neeni ayis si7ay? 10 Hachi ha gongoluwan Goday nena taw aathidi immidaysa neeni ne ayfen be7adasa. Taani nena wodhana mela guutha asati tana denthethidosona. Shin, “I, Goday tiyidi kawothidaysa gidiya gisho taani ta godaa bolla ta kushiya denthike” yaagada nena aggas. 11 Ta aawaw, ta kushen de7iya ne ma7uwa maccara haysa xeella. Ne ma7uwa macaraape qanxa ekas, shin nena wodhabike. Taani nena qohonnaysanne ne bolla makallonnaysa akeeka; taani nena qohabike, shin neeni tana wodhanaw shankataasa. 12 Nebaanne tabaa Goday pirdo; Goday neeni tana qohidaysa haluwa kesso, shin taani ne bolla ta kushiya denthike. 13 “Iita ootheysatape iiti keyees” giya beni leemisoy de7ees. Hessa gisho, taani nena kushenka bochike.

14 “Isra7eele kawoy oodde bolla dendii? Oona oykanaw kaallii? Hayqida kana woyko kastolle goodiyee? 15 Goday nu bolla daannato; nebaanne tabaa I pirdo; ta gisho I mooteto; ne kushepe tana I asho” yaagis.

16 Dawiti haasaya wursida wode Saa7oli Dawitako, “Ta na7a Dawita, hessi ne qaalee?” yaagidi Saa7oli ba qaala dhoqu oothidi yeekis.

17 “Neeni taape aadhida xillo; taani new iitabaa oothin, neeni taw lo77oba oothadasa. 18 Goday tana hachi new aathidi immin neeni tana wodhaboonna gisho neeni taw lo77oba oothada bessadasa. 19 Asi ba morke demmidi qohonna yeddiyee? Neeni taw hachi oothida keehatetha gisho, Goday nena anjo. 20 Neeni Isra7eele kawo gidanaysanne Isra7eele kawotethay ne maata garsan eqanaysa ta erayis. 21 Hiza ta kochaa dhaysona melanne ta sunthaa ta aawa soo asaa giddofe quchonna mela Godaa sunthan taw caaqa” yaagis.

22 Dawiti Saa7olas caaqis. Hessafe guye, Saa7oli ba soo simmidi bis; Dawitinne iya asay banta miixaa bidosona.