1 Sameeli hayqin, Isra7eele asa ubbay shiiqidi, iyaw yeekidosona; Rama kataman iya moogidosona.

Hessafe guye, Dawiti Ma7oona mela biitta bis. 2 Ma7oona mela biittan, Qarmeloosan shaloy de7iya issi dure addey de7ees. Iyaw issi mukulu deeshatinne heedzu mukulu dorsati de7oosona. I enta ikisiya Qarmeloosan meedees. 3 He addiya sunthay Naabala, I Kaaleba yara; iya mache sunthay Abigiya. Iya akeekanchonne mala lo77o maccas, shin I azinay wozani bayna iita asi.

4 Dawiti mela biittan de7ishe, Naabali dorsaa ikise meedeysa si7is. 5 Dawiti tammu panthata haysada yaagidi kiittis; “Naabalako Qarmeloosa bidi, ta sunthan iya sarothite. 6 ‘Ne barey aduqo! Saroy newunne ne soo asaas gido; new de7iya ubbaas saroy gido! 7 Ne dorsa ikise meedeysa taani si7as; ne dorsaa heemmeysati nuura de7ida wode nuuni enta genibooko; enti Qarmeloosan de7ida wode ubban entabaape aybika pacibeenna. 8 Hessa neeni ne aylleta oychiko enti new odana. Nuuni hachi gibira gallas neeko yida gisho, ta panthatas hayyana keeha. Ne kushen de7iyabaape ne aylletasinne ne na7aa Dawitas hayyana imma’ yaagite” yaagidi kiittis.

9 Dawita asati Naabalako gakidi, Dawita sunthaanne kiitaa iyaw odidi, I gaanaba naagishe yan uttidosona.

10 Naabali, “Dawiti oonee? Isseye na7ay oonee? Ha wodiyan daro aylleti banta godatape baqatoosona. 11 Ta kathaa, ta haathaanne ta dorsaata meedeysatas shuketida ashuwa ekada, guuyeyi eretonna asas ayis immo?” yaagis.

12 Dawita asati simmi guye bidi Naabali gidaba ubbaa Dawitas odidosona. 13 Dawiti, “Hinte mashshaa dancite” yaagin, ubbay banta mashshaa dancidosona; Dawitika ba mashshaa dancis. Dawiti oyddu xeetu gidiya asatara dendidi bis; nam7u xeetu asay entaba naagidi attis.

14 Naabala aylletape issoy Naabala mache Abigiyako haysada yaagis; “Dawiti mela biittan de7ishe nu godaa saro gaanaw ase kiittis, shin I enta cayidi yeddis. 15 Gidoshin, ha asati nuus daro lo77o; enti nuna genibookona; nuuni entara bazzon pee7ida wode ubban nubaape aykoyka pacibeenna. 16 Nuuni nu dorsa wudiya enta matan heemmiya wode, qammanne gallas enti nuus dirsi gididosona. 17 Nu godaa bollanne iya soo asaa bolla iitabay gakana haniya gisho, hayyana ha odaa waataneko qopa. Nu goday asa zore si7onna iita asi gidiya gisho, oonika iya haasayisanaw danda7enna” yaagis.

18 Abigiya eeson nam7u xeetu uythu, nam7u ogoro woyne ushshu, ichashu caacetida dorsata, ishatamu kilo giraame caacetida tiya, issi xeetu uuketida woyne mor7enne nam7u xeetu balase nuka ekada hareta bolla caanasu. 19 Ba aylletako, “Hinte sinthatidi biite; ta hintena kaallana” yaagasu; shin ba azinaa Naabalas aykoka odabuuku. 20 Ba hariya toggada zumaa loobuwa duge wodhiya wode Dawitinne iya asay yishe iira gahetidosona.

21 Dawiti, “Iyabape aykoyka paconna mela taani ha addiya shaluwa naagiday coo mela; taani oothida lo77o oosuwas I taw iita kushe zaaris. 22 Wonto wonta gakanaw, iyabaa gidida addetape issuwa ta paxa aggiko, Xoossi tana pirdo” yaagis.

23 Abigiya Dawita be7ida wode hariyape eesota wodhada, Dawita sinthan gufannada ziggasu. 24 Iya tohuwa bolla kundada, “Ta godaw, ta balay ta bolla gido! Ta issiba odana; ta ne aylliya giyaba si7a. 25 Ha wozani bayna addey, Naabali*Naabala: Naabala guussay eeya guussu. giyaba si7opa; I ba sunthada eeya. Ta godaw, ne kiitida asata ta ne aylliya be7abike. 26 De7o Goday eriya mela, ne shempoy erin, ne suuthu gussonnaadanne halo keyonnaada nena teqiday Godaa. Ne morketinne nena qohanaw koyeysati Naabalada hano. 27 Ha imotay taani ne aylliya new, ta godaas ehidaysi nena kaalliya asatas imeto. 28 Ta godaw, ne aylle nagaraa atto yaaga! Neeni Godaa olaa oletiya gisho, Goday nenanne ne sheesha kawoyana. Ne de7o laytha ubban iitatethi ne bolla bentofo. 29 Ay asika nena wodhanaw koyiko, issi asi ba al7o shaluwa naageysada Goday, ne Xoossay nena saro naagana. Shin yambarshan shuchu holeysada I ne morketa holana. 30 Goday, ta godaas oothanaw qaala gelida keehatetha ubbaa oothiya wodenne Isra7eele bolla kawothiya wode, 31 ta goday azzaniya gaasoy woyko qiiroyabay baawa. Gaasoy bayna suuthu gussidabay woyko halo keydabay bayna gisho ne wozanay dagammenna. Goday new lo77oba oothida wode tana ne aylliw dogopa” yaagasu.

32 Dawiti Abigiyako, “Taara gahetana mela hachi nena kiitida Goday, Isra7eele Xoossay galatetto. 33 Taani asa suuthu gussonnaadanne halo keyonnaada ne lo77o qofay tana teqida gisho neeni anjeta. 34 Ta nena qohonnaada teqida de7o Goday, Isra7eele Xoossay eriya mela ne taara gahetanaw ellesada yoonnaako, sa7i wontana gakanaw Naabala asaape issi addeyka paxa attenna” yaagis. 35 Abigiya iyaw ehida imota I kushepe Dawiti ekidi, “Ne soo saro ba; taani ne gidaba si7as; ne oyshaaka ekas” yaagis.

36 Abigiya simmada Naabalako yaa wode, kawo son giigiya gibira mela gibira muzishe son uttis. Naabali daro mathotidi, ba wozanan ufaytiya gisho sa7i wontana gakanaw Abigiya iyaw aykoka odabuuku. 37 Wonta Naabala mathoy simmidaape guye, iya machiya hanidaba ubbaa iyaw odasu; Naabala wozanay wodhin, I daaburis. 38 Tammu gallasape guye Goday Naabala shocin, I hayqis.

39 Naabali hayqidaysa Dawiti si7ida wode, “Goday galatetto! Naabali tana cayidaysa halo Goday kessis. Taani iya aylley iitaba oothonna mela tana teqis. Naabali oothida iitabaa Goday iya bolla zaaris” yaagis.

Hessafe guye, Dawiti Abigiya ekanaw koyidi kiita yeddis. 40 Dawita aylleti Qarmeloosan de7iya Abigiyako bidi, “Dawiti nena machanaw dosida gisho nuuni nena ekanaw yida” yaagidosona.

41 Abigiya gufanna ziggada, “Taani ne aylliya new kiitetanawunne ne aylleta tohuwa meeccanaw giigeta uttas” yaagasu. 42 Abigiya ellesa dendada ba hariya toggasu, iya ba ichashu macca aylletaranne Dawita kitida asara bada Dawita gelasu.

43 Dawiti kase Izira7eele maccasiw Aknahoomo ekidi de7ees; enti nam7ay iya macheta. 44 Saa7oli Dawita machiw, ba na7iw Melkoolo Galima addiya Leesa na7aa Falxas immis.