1 Dawitinne iya asati heedzantho gallas Xiqilaaga gakidosona. Amaaleqati Negebanne Xiqilaaga olidi, Xiqilaaga taman xuuggidosona. 2 Xiqilaagan de7iya maccasaanne na7ape cima gakanaw de7iya ubbaa di77idosona; entafe issi asika wodhonna enta ubbaa di77idi efidosona.

3 Dawitinne iya asati Xiqilaaga gakiya wode katamay taman xuugetidaysanne enta macheti, adde naytinne macca nayti di7etidaysa be7idosona. 4 Dawitinne iyara de7iya asay banta wolqay ixana gakanaw waassidi yeekidosona. 5 Dawita macheti Izira7eele Aknahoomanne kase Naabala machiya Qarmeloosa Abigiya nam7ayka di7etidosona.

6 Iya asay banta adde naytinne macca nayti di7etida gisho yilotidi Dawita shuchan caddanaw odetin, Dawiti daro un7etis. Gidoshin, Dawiti Godan ba Xoossan minetis.

7 Dawiti Abimeleke na7aa kahiniya Abyataarako, “Efuudiya ekada ya” yaagin, Abiyatari efuudiya Dawitas ehis. 8 Dawiti, “Taani, tana oliya asata kaallada gakanee?” yaagidi Godaa oychis.

Goday, “Ee; enta kaallada ba; tuma enta ne gakana; tuma di7uwa zaarana” yaagis.

9 Dawitinne iyara de7iya usupun xeetu asati dendidi Boosora shaafa gakiya wode entafe guutha asati yan attidosona. 10 Nam7u xeetu asay shaafa pinnanaw daro daaburidosona. Shin Dawitinne oyddu xeetu asay kaallidosona.

11 Enti issi Gibxe asi denban demmidi, Dawitako ehidi, iyaw haathenne kathi immidosona. 12 Balase ongochonne nam7u woyne nuka iyaw immin midi gashtisis. I heedzu gallasinne heedzu qamma kathi moonna haathe uyonna gam7is. 13 Dawiti, “Neeni oodde ayllee? Awupe yadii?” yaagidi addiya oychis.

Addey, “Taani Amaaleqa addiyas aylletida Gibxe asi; heedzu gallasape kase ta saketin, ta goday tana yeggi aggidi bis. 14 Nuuni Yihuda zawa, Keltaaweta dugeha bagganne Kaaleba dugeha baggaa olidi Xiqilaaga taman xuuggida” yaagis.

15 Dawiti, “Neeni tana he olida cugatako kaalethanaw danda7ay?” yaagidi oychis.

I zaaridi, “Neeni tana wodhonna melanne ta godaas aathada immike gada taw Xoossan caaqa; taani nena entako kaalethana” yaagis.

16 Dawita kaalethidi entako gathis. Enti Filisxeemepenne Yihudape daro di7o di77ida gisho ufaytidi mishenne uyishe laaletidi uttidosona. 17 He gallas omarsafe doomidi wontetha gallas omarsi gakanaw Dawiti enta shocis. Gimale toggidi baqatida oyddu xeetu panthatape attishin, hari issi asika attibeenna. 18 Amaaleqa asati efida ubbaa, ba nam7u machetara issife Dawiti wosisidi ekis. 19 Asati di77idi efidabaape issibayka pacibeenna; na7i woyko cimi, addey woyko macci, hessadaka enti di77idi efida haraba ubbay paconna de7ishin Dawiti ubbaa zaaris. 20 Dawiti dorse, deeshenne mehe ubbaa di77is; Dawita asay I di77ida mehiya hanko mehiyape sinthara laaggishe, “Haysi Dawita di7o” yaagidosona.

21 Dawiti daaburidi Boosora shaafa achan attida nam7u xeetu asaako yis. Enti Dawitanne iyara de7iya asaa mokanaw keyidosona. Dawiti ba asaara shiiqidi enta sarothis. 22 Shin Dawitara bida asata giddofe pathonna iita asati, “Enti nuura boonna gisho nuuni zaaridi ehidabaape aykoka entaw shaakoko; enti banta naytanne banta macheta ekidi boonna” yaagidosona.

23 Dawiti zaaridi, “Ta ishato, Goday nuus immidaban hinte haysada oothanaw bessenna. I nuna naagidi, nuna olida cugata nuus aathidi immis. 24 Hinte giyaba oonika ekenna. Oletanaw bidaysatanne nubaa naagishe haysan gam7idaysata gishoy issino; ubbay gina shaaketana” yaagis. 25 He gallasape doomidi hachi gakanaw Isra7eele biittan hessi higgenne woga gidis.

26 Dawiti Xiqilaaga gakida wode ba lagge gidida Yihuda cimatako, “Godaa morketape di7etidabaape taani hintew immeysa ekite” yaagidi guuthara yeddis. 27 I hessa Beetelen, Raamota Negebaninne Yatiran de7eysatas, 28 Aro7eeran, Sifimootan, Eshtamoo7aninne 29 Rakaalan, Yirahima7eelan, Qeena katamatan, 30 Hormana, Boraasana, Atakaninne 31 Kebroonan de7eysatas yeddis. Inne iya asati yuuyida bessa ubban de7iya asaas yeddis.