1 Filisxeemeti Isra7eeletara oletidosona; Isra7eeleti Filisxeemeta sinthafe baqatidosona; daro Isra7eeleti Gilbo7a deriya bolla hayqidosona. 2 Filisxeemeti Saa7olanne iya adde nayta yedethidi, iya adde nayta Yoonataana, Amnadaabenne Malkisa wodhidosona. 3 Olay teqidi Saa7ola un7ethis; dongen dukeysati iya caddidi daro madunxisidosona.

4 Saa7oli ba ola miishiya tookeysako, “Ha qaxaretiboonaysati yidi, tana caddidi kaa7onna mela ne mashshan tana caddada wodha” yaagis.

Shin iya ola miishiya tookeysi yayyidi ixin, Saa7oli ba mashshaa sa7an essidi, iya bolla kundis. 5 Iya ola miishiya tookeysi Saa7oli hayqidaysa be7idi, ika ba mashshaa sa7an essidi, iya bolla kundidi iyara issife hayqis. 6 Haysada hanidi, Saa7olinne iya heedzu adde nayti, iya ola miishiya tookeysinne iya asati ubbay he gallas hayqidosona.

7 Zangaaraninne Yordaanose shaafape hefintha baggara de7iya Isra7eele asay, Isra7eele olanchoti baqatidaysa, Saa7olinne iya nayti hayqidaysa be7idi banta katamaa aggidi baqatidosona. Filisxeemeti yidi, he katamata oykidosona.

8 Wontetha gallas Filisxeemeti aha bollafe ola misheta qaaridi ekanaw yidi, Saa7olinne iya heedzu adde nayti Gilbo7a deriya bolla hayqidi zin7idaysata demmidosona. 9 Enti Saa7ola qoodhiya qanxidi iya ola miishiya qaari ekidosona. Yaatidi banta eeqa keethaninne banta asaa giddon xoonuwa awaajana mela Filisxeeme biitta ubbaas kiita yeddidosona. 10 Saa7ola ola miishiya Astaroote geetetiya enta macca xoosse keethan wothidosona. Saa7ola aha Beet-Saana katama gimbiya bolla mismaaren dhishidi kaqidosona.

11 Filisxeemeti Saa7ola oothidaba Galadan de7iya Yaabesa asay si7ida wode, 12 mino asati qamma dendi bidi, Saa7ola ahaanne iya nayta aha Beet-Saana katama gimbiya bollafe wodhisidi Yaabesa katamaa ehidi, yan xuuggidosona. 13 Hessafe guye, enta meqethaa maxi ekidi, Yaabesan de7iya tamarsike mithaa garsan moogidosona; yaatidi laapun gallas xoomidosona.