5
1 Ta ishato, ha hanoti hanana wodiyanne ageena hintew xaafanaw koshshenna. 2 Godaa Gallasay kaysoy qamma yeysada yaanaysa hinte loythi ereeta.Maato 24:43; Luqa 12:39; 2 Phex 3:10. 3 Asay, “Sa7i saro, aykoyka hanenna” yaagishin, maccas iqethi oykeysada dhayoy enti qoponna enta bolla yaana. Enti ay ogenka kessi ekokona.
4 Shin nu ishato, he gallasay hintew kaysoy yeysada yaanaw hinte dhuman de7eketa. 5 Hinte ubbay poo7o asinne gallasan de7iya asi; nuuni qamma asi woyko dhuma asi gidoko. 6 Hessa gisho, nuuni harati dhiskeysada dhiskanaw bessenna; nuuni barkanawunne giigidi daanaw bessees. 7 Dhiskeysati qamma dhiskoosona; mathoteysati qamma mathotosona. 8 Shin nuuni gallasa asi gidiya gisho giigidi daanaw bessees. Ammanonne siiqo xurureda tiran ma7idi, atotetha ufaysaa huuphen wothiya ola birata barneexada wothidi daanaw bessees.Isa 59:17; Efe 6:13-17. 9 Xoossay nuna nu Godaa Yesuus Kiristoosa baggara kumetha atotethi ekana mela doorisipe attishin, hanqos dooribeenna. 10 Nuuni paxa de7in woyko hayqin, Kiristoosi yaa wode iyara issife daana mela Kiristoosi nu gisho hayqis. 11 Hessa gisho, hinte kase ootheysada, issoy issuwa minthethitenne dichite.
Zorenne Sarotho
12 Nu ishato, hinte giddon ootheyisata, hintena kaalethana melanne zorana mela Goday dooridaysata bonchana mela hintena woossoos. 13 Enti oothiya oosuwa gisho, enta daro bonchitenne siiqite. Issoy issuwara sarotethan de7ite.
14 Nu ishato, nuuni hintena zoroos. Boozata hanqite; babeyisata minthethite; daaburanchota maaddite; ase ubbaa danda7ite. 15 Oonika iita gisho iita zaaronna mela naagetite. Hinte wolisinne asa ubbaas lo77oba oothanaw minnite.
16 Ubba wode ufaytite. 17 Ubba wode Xoossaa woossite. 18 Ubbaban galatite. Kiristoos Yesuusa baggara Xoossay hintefe koyey hessa.
19 Geeshsha Ayyaana oosuwa toysopite. 20 Tinbite qaala kadhopite. 21 Ubbabaa paacite; lo77oba ekite. 22 Iita ooso ubbaafe haakite.
23 Saro immiya Xoossay ba huuphen hintena polo geeshsho. Nu Goday Yesuus Kiristoosi yaana gallasaas, Xoossay hinte ayyaana, hinte shempuwanne hinte kumetha asatethaa borey bayna naago. 24 Hintena xeegeysi ammanetidaysa gidiya gisho, hessa I polana.
25 Nu ishato, nuus Xoossaa woossite.
26 Ammaniya asa ubbaa geeshsha yeeretethan sarothite.
27 Hinte ha kiitaa ammaniya asa ubbaas nabbabanaada Godaa sunthan hintena woossayis.
28 Nu Godaa Yesuus Kiristoosa aadho keehatethay hintera issife gido. Amin7i.