Phawuloosi Teselonqe Asaas
Xaafida Nam7antho Kiita
Gaatha Qofa
Kiristoosa nam7antho yuussaa bolla dendida oyshoy palama medhida gisho, Teselonqe woosa keethan metoy dari dari bis. Phawuloosi Teselonqe asaas xaafida nam7antho kiitay, “Godaa yuussaa gallasay matis” giya ammano timirtiya bolla minthidi odees. Phawuloosi odishe, Kiristoosi yaanape sinthe, “Geella ura” geetetiya “Kiristoosa ixeysi kaalethin, ha alamiya bolla iitatethinne geellatethi darishe baana” yaagidi enta ammanuwa suurisees.
Hawaarey, metoynne waayey darikoka, enti banta ammanuwan minnanaada, banta duussas koshshiyaba demmanaw minnidi oothana melanne lo77o ooso oothanaw guye goonna mela enta minthidi zorees.
Maxaafa Ayfe qofata
Gelo qofa (1:1-2)
Godaa yuussanne suure pirda (1:3-12)
Goday yaana (2:1-12)
Ammanetada de7a (2:13-17)
Woossite; minnidi oothite (3:1-15)
Sarothonne anjo (3:16-18)
1
1 Phawuloosi, Sillaaseynne Ximotiyoosi Teselonqe woosa keethan de7iya, Xoossaa Aawabanne Godaa Yesuus Kiristoosaba gidida asaas xaafetida kiita.Hawa 17:1.
2 Xoossaa nu Aawapenne Godaa Yesuus Kiristoosape aadho keehatethaynne sarotethay hintew gido.
Kiristoosi Simmiya Wode
3 Nu ishato, hinte ammanoynne hinte issoy issuwanne harata siiqiya siiqoy daro dicciya gisho, nuuni hessas Xoossaa ubba wode galatanaw bessees. 4 Hintena gakida goodaninne waaye ubban gencaninne ammanon minnidi eqida gisho, nuuni nu huuphen Xoossaa woosa keethatan hintebaa markatishe hintenan ceeqetoos.
5 Hinte iya gisho gidi meto ekiya Xoossaa kawotethaas besseyisata gididi taybetana mela Xoossaa xillo pirdaas haysi malla. 6 Xoossay tuma pirdaa pirdana. Xoossay hintena waayseysata bolla waaye ehana. 7 Goday Yesuusi ba wolqaama kiitanchotara, tama lacora salope yaa wode waayetiya hintenanne nuna shempisana. 8 Qassi Xoossay bana eronnaysatanne nu Godaa Yesuus Kiristoosa Wongelas kiitetonayisata pirdana. 9 Enti Godaa sinthafenne iya bonchuwa wolqaafe shaaketidi merinaa dhayuwan pirdetana.Isa 2:10. 10 He gallas, I ba geeshsha asaaninne bana ammaniya ubban bonchetanawunne sabetanaw yaa wode nu hintew odida kiitaa hinte ammanida gisho, hinte iya boncheyisata giddoninne sabbeyisata giddon daana.
11 Nuuni hintew ubba wode Xoossaa woossey hessasa. Nu Xoossay hintena xeegida de7uwas besseyisata gididi taybetana mela nuuni woossoos. Hinte lo77oba oothanaw amotiya amuwanne hinte ammano oosuwa I ba wolqan polo. 12 Hessan nu Xoossaanne nu Godaa Yesuus Kiristoosa aadho keehatethan, Godaa Yesuusa sunthaa hinte bonchana; hintenaka I bonchana.