1 Nu ishato, nu Godaa Yesuus Kiristoosa yuussabaanne nu iyara gahetanaw shiiqanabas nu hintena woossoos.Isa 2:10. 2 Tinbiten woyko hara asape si7ida qaalan woyko nuupe ekida kiittada oothidi, “Godaa gallasay gakis” gidi hinte wozanay dagammofonne waabaqopo. 3 Hintena oonika ay ogenka balethofo. Kasetidi geellatethay qonconnanne dhayoy bessiya geella uray yoonna de7ishin, Godaa gallasay gakenna. 4 Asi goyinniyabanne xoossayaba ubbaa I ixananne bana dhoqu oothana. Hari attoshin, Xoossa keethi geli uttidi, “Taani Xoosse” gaana.Daane 11:36; Hiz 28:2.

5 Taani hintera de7ashe hintew odidaysa akeekeketii? 6 I ba gallasan yaanape attishin, ha77i yaanaysa aybi iya teqiyako hinte ereeta.

7 Asaas qonciboonna geellatetha xuura wolqay ha77ika oothees, shin ha77i iya teqeysi de7ees. Iya teqeysi ogepe kichana gakanaw I qoncenna. 8 Hessafe guye, geella uray qoncana, shin Godaa Yesuusi ba doonape keyiya shempuwan, ba boncho yuussan iya wodhana.Isa 11:4. 9 Geella uray, Xalahe wolqan yidi wordo malaatatanne malaalsiyabata oothana.Maato 24:24. 10 Hessadaka, dhayos de7iya asata dumma dumma cimmiya iita ooson balethana. Enti dhayiday ashshiya tumaa dosidi ekonna ixida gishosa. 11 Hessa gisho, enti wordo gidiyaba ammanana mela Xoossay wolqaama baleso enta bolla yeddana. 12 Hessika, tumaa ammanonna asati, nagara ooson ufayteysati ubbay pirdetana melasa.

13 Goday dosiya nu ishato, nuuni Xoossaa hinte gisho, ubba wode galatanaw bessees. Hinte attana mela Xoossay Geeshsha Ayyaana wolqan hintena geeshshidaysanne hinteka tumaa ammanidaysan I hintena bayrada dooris. 14 Xoossay, nu hintew odida Wongela baggara hintena xeegiday, hinte nu Godaa Yesuus Kiristoosara issife bonchetanaasa. 15 Hiza, nu ishato, minnidi eqite. Nuuni hintena nu doonan gidin woyko dabdaabiyan gidin tamaarsida timirtiya oykite.

16-17 Xoossay nu aaway nuna dosees. I nuus keeha; I merinaa minthethonne lo77o ufaysaa nuus immis. Hinte ubba wode lo77oba oothanawunne odetanaw minthethana melanne maaddana mela nu Godaa Yesuus Kiristoosanne Xoossaa nu aawa woossoos.