1 Wursethan nu ishato, Godaa qaalay hinte giddon ellesidi dalganaadanne bonchetanaada nuus woossite. 2 Hessadaka, asi ubbay qaala si7idi ammanonna gisho, Xoossay geellatapenne iita asatape nuna ashshana mela nuus woossite.

3 Shin Goday ammanetidaysa; I hintena minthethananne Xalahepe naagana. 4 Nuuni hintena kiitteysa ha77ika sinthafeka hinte oothanaysas Godan nuuni ammanetoos.

5 Goday hinte wozanaa Xoossa siiquwakonne Kiristoosa danda7aako kaaletho.

6 Nu ishato, hinte nuupe ekida kiitaa kaallonaysatapenne ooso billiya azalla ammaniya asatape hinte shaaketanaada Godaa Yesuus Kiristoosa sunthan hintena kiittoos. 7 Nuuda hanidi daanaw besseysa hinte, hinte huuphen ereeta. Nuuni hintera de7iya wode ooso billibooko. 8 Nuuni oodefeka kathi mela mibooko. Nuus danda7etida mela qammanne gallas oothi daaburidi de7idape attishin, oodeska tooho gidibooko. 9 Nuuni hessa oothiday, hintew leemiso gidanaasafe attishin, hintefe maade oychanaw nuus maati dhayina gidenna. 10 Nu hintera de7iya wodeka, “Oothanaw koyonna asi oonika moopo” yaagidi kiitida.

11 Nuuni hessa giday, hinte giddon issi issi azallati de7eysa si7ida gishosa. He asati gelsonnaban gelidi harata ooso bilisoosonape attishin, aykoka oothokona. 12 Nuuni hessa mela asati maara de7o daanadanne bantana koshshiyaba oothidi demmanaada Godaa Yesuus Kiristoosa sunthan enta kiittoosinne zoroos.

13 Shin nu ishato, lo77o ooso oothanaw azallofite. 14 Ha77i nuuni ha dabdaabiyan kiitida kiittas kiitetonna asi oonika de7iko he uraa erite. I yeellatana mela iyape shaaketite. 15 Shin iya ishada seeritepe attishin, morkeda xeellofite.

16 Saro immiya Goday, ba huuphen hintew ubba wodenne ubba baggara saro immo. Goday hinte ubbaara gido.

17 Taani Phawuloosi, ha kiitaa ta kushen xaafas. Ta kiita ubbaas mallay haysa; taani hessada xaafayis.

18 Nu Godaa Yesuus Kiristoosa aadho keehatethay hinte ubbaara gido.