1 Oonika, “Woosa keethi kaalethiya asi gidanaw koyko lo77oba amottees” giya oday tuma. 2 Woosa keethaa kaalethiya asi boretonaysa, issi mache xalaali de7eysa, maaran de7eysa, bana haareysa, besseysada ootheysa, imathe mokeysa, tamaarsanaw danda7eysa,Tito 1:6-9. 3 mathotonaysa, ooyetonnaysa, palamonnaysa, miishe siiqonnaysa, 4 iya nayti iyaw kiiteteysanne boncheysa, ba keethaa aysanaw danda7eysa gidanaw bessees. 5 Issi asi ba keethaa aysanaw danda7onna ixiko, Xoossaa woosa keethi waati aysanaw danda7ii?

6 Otoron sugetidi, Xalahey Xoossaa pirdan kundidaysada kundonna mela, oorathi ammanida asi gidanaw bessenna. 7 Boreninne Xalahe xihen gelonna mela he uray ammanonna asa matan nasheteysa gidanaw bessees.

8 Hessada qassi woosa keethaa daaqoneti bonchetidaysata, nam7u doona odetonayisata, daro woyne ushshu uyonayisata, miishe yaaretonayisata, 9 ammanuwa xuuraa geeshsha kahan naageysata gidanaw bessees. 10 Enti koyrottidi paacetanaw koshshees; enta bolla borey bayna ixiko, woosa keethaa daaqone gididi ootho.

11 Hessadaka, enta maccasati bonchetidaysata, zigironnayisata, maaran de7eyisata, ubbaban ammaneteyisata gidanaw bessees.

12 Woosa keethaa daaqoneti issi machi xalaali de7eysa gido. Ba naytanne ba keethaa loythi ayseysa gidanaw bessees. 13 Woosa keethaa daaqone gididi, lo77o ooso ootheysati, entaw gita boncho qassi Kiristoos Yesuusan bantaw de7iya ammanuwaba odanaw daro minotethi demmana.

14 Taani ha kiitaa new xaafashe, ellesada neeko baana gada ufaysi wothayis. 15 Shin taani boonna gam7iko, Xoossaa Keethan asay waanidi daanaw bessiyako erana mela haysa new xaafayis. De7o Xoossaa keethay tumatethaas tuussinne baaso. 16 Nu ammanuwa xuuray sidhey bayna gita.