1 Solomone aaway Dawiti xoossaa keethay keexetana bessaa More deriyan Yerusalaamen giigisis. He bessay Goday Dawitas qoncida Yaabuse addiya Orna wudumma. 2 Solomoney ba kawotida oyddantho laythan, nam7antho ageenan Xoossa keethaa keexanaw doomis.

3 Solomoney Xoossa keethaa keexanaw baasida baasuwa adussatethay usupun tammu wadha; gompay laatamu wadha. 4 Xoossa keetha geliya bessan de7iya barandaa gompay Xoossa keethaa gompaada laatamu wadha; adussatethay laatamu wadha. 5 Penge godaa xiidda xalaalan licidi kammis; geeshsha worqan tiyis; zamba misilenne santhalaata misilen alleeqisis. 6 Xoossa keethaa al7o shuchan alleeqisis; I alleeqisida worqay Parwayma biittafe yida worqaa. 7 Godata, tuuqeta, gobanetanne pengeta worqan tiyis; godaa bolla kiruube misile medhis.

8 Solomoney Ubbaafe Geeshsha Bessaa keexis. He bessaa adussatethaa Xoossa keethaa gompaada laatamu wadha; gompaay laatamu wadha. He bessaa godaa laatamu mukulu kilo giraame muruuto worqan tiyis. 9 Enti go7etida misimaarey ichashu xeetanne laapun tammu giraame worqafe medhetis. Pooqen de7iya kifiletaka worqan tiyis.

10 Solomoney Ubbaafe Geeshsha Bessan nam7u kiruube misileta giigisidi worqan tiyis. 11 He kiruubeta qefey micetidi, laatamu wadha; koyro kiruubiya koyro qefey ichashu wadha gididi, Xoossa keetha godaa bochees; nam7antho qefey ichashu wadha gididi, hara kiruubiya qefiya bochees. 12 Nam7antho kiruubiya koyro qefey ichashu wadha gididi, Xoossa keetha godaa bochees; nam7antho qefey ichashu wadha gididi, koyro kiruubiya qefiya bochees. 13 Ha nam7u kiruubeta qefey micetidi, laatamu wadha gidis; enti banta som7uwa Geeshsha bessaako zaaridi, banta tohon eqidosona.

14 Solomoney kaalose ma7uwa, ocha teera daaniya ma7uwapenne, zo7o ma7uwape liinope dadetida ma7uwape magarajo oothidi, iya bolla kiruubeta misile medhis.

15 Solomoney Xoossa keethaa sinthan issuwa issuwa adussatethay hastamanne ichashu wadha gidida nam7u tuussata oosisidi, enta huuphen ichashu wadha gumbota wothis. 16 Qassi santhalaata giteda medhisidi, tuussata huuphen wothis; xeetu oromaane teera misileta medhisidi, santhalaata bolla wothis. 17 Tuussatape issuwa Xoossa keethaa sinthan ushacha baggara, nam7anthuwa qassi haddirsa baggara essis. Ushacha baggara de7iya tuussaa Yakina sunthidi, haddirsa baggara de7iya tuussaa Boo7eza sunthis.