1 Solomoney Godaa sunthaas keethenne baw gadho keexanaw halchis. 2 Solomoney toohos laapun tammu mukulu asaanne gezze biittan shuchu qoo7anaw hospun tammu mukulu asaa dooris. Qassi enta wochiya heedzu mukulunne usupun xeetu asata enta bolla shuumis.

3 Solomoney Xiroosa Kawa Kiraamas kiita kiittidi, “Ta aaway Dawiti ba gadho keexana mela neeni ziga yeddidaysada tawka yedda. 4 Heko, ha77i ta Godaa, ta Xoossaa sunthaas keethe keexanaw hanayis. Ta yan sawo tonku giya ixaane cuyisanaw, ubba wode Godaa sinthan uythaa wothanawunne wontanne omarsi, Sambaata gallasan, ageeni xeeriya wodenne Godaa nu Xoossaa ba7aale gallasatan xuussa yarsho yarshanaw, Xoossa keethaa dummayana. Isra7eele asay merinaw oothana mela kiitetida oosoti haysata.

5 “Nu Xoossay hara xoossata ubbaafe gita gidiya gisho, ta keexanaw haniya Xoossaa Keethay gita. 6 Shin iyaw keethe keexanaw danda7ey oonee? Salope dhoqa saloy iyaw gidenna! Yaatin, ta iya sinthan ixaane cuyisanawnne ta iyaw keethe keexanaw oonee?

7 “Hiza alleeqo ooso, worqa, bira, naasenne birata seerisiya oosuwanne zo7o ma7uwa, ocha teera daaniya ma7uwanne kaalose ma7uwa giigisiya eratethi de7iya ase taw yedda. Ta aaway Dawiti Yihudaninne Yerusalaamen de7iya kushe hiillanchota doori wothis; I entara issife oothana. 8 Libaanosen de7iya ne asati mithaa waati qanxiyaako ereysa ta erayis. Hessa gisho, neeni taw Libaanosepe zigaa, xiiddanne xaytha mithi yedda. Ta asati ne asatara gididi, 9 daro mithaa giigisana. Taani keexiya Xoossaa keethay gitanne malaalsiyaba. 10 Mithi qanxiya ne aylleta taani laatamu mukulu kuntaale gistenne laatamu mukulu kuntaale banga, oyddu xeetu mukulu litiro woynenne oyddu xeetu mukulu litiro shamaho zayte immana” yaagis.

11 Xiroosa kawoy Kiraami Solomoneko dabdaabe yeddishe,

12 Kiraami gujidi, “Xoossa keethaanne baw gadho keexana mela cinca, akeekanne hiilla na7aa kawa Dawitas immida, salo sa7aa medhida Goday, Isra7eele Xoossay galatetto.

13 “Taani Kiraam-Abi geetetiya hiillanchonne akeeka addiya new yeddas. 14 Iya aayiya Daane koche; iya aaway Xiroosa biitta asa. I worqaa, bira, naase birata, birata, shuchunne mithi oothiya asi; ocha teera daaniya ma7o, kaalose ma7o, zo7o ma7onne liino ma7o giigisiya ooso erees. I dumma dumma alleeqota kessidi, odeysada ubbaa oothanaw danda7ees. I kushe hiillan loohida ne asaaranne kase ne aawa, Dawitas oothida asaara iya oosisa. 15 Hiza ne ta goday immana gida gistiyanne banga, zaytiyanne woyniya yedda. 16 Neeni Libaanosepe koyida mithi nu qanxidi qachidi, abba bollara tooketidi, neeko Yoophe baanada oothana. Yaape neeni Yerusalaame gakanaw efisana” yaagis.

17 Iya aaway Dawiti kase taybidaysada, Solomoney Isra7eele biittan de7iya kare biitta asaa ubbaa taybis. Enti xeetanne ishatammanne heedzu mukulunne usupun xeeta gididosona. 18 Solomoney he asaape laapun tammu mukulu asaa toohos, hospun tammu mukulu asaa gezze biittan shucha qoo7anaw dooris; enta kalanaw heedzu mukulunne usupun xeetu asaa shuumis.