2 Taarike Maxaafa
Gaatha Qofa
2 Taarike Maxaafay xaafetiday, camo gidida kase enta duussa qoncisanaw gidonashin, banta biittan wopu gidi daanaw entaw de7iya kosha besanasa. Hesadaka daro ogera qohetidi de7iya di7ope simmida, Isra7eele asaa ammanuwa denthethanaasanne Xoossi entaw gelida ufaysa qaala bessanaasa.
2 Taarike maxaafay nam7u kifilen shaaketees.
1. Shempo 1-9 gakanaw de7iya kifiley kawo Solomone kawotetha wodiya odees. He wodey Isra7eele biittan saroy, wolqi, dichinne bonchoy de7iya wode. He wodey Xoossi goyinnetiya tuma goyinno bessay woyko xoossa keethay keexetida wodenne anjetida wode (shem 2-7).
2. Shempo 10-36 gakanaw de7iya kifiley kawoy Solomoney hayqidaape guye Yihudan kawotida kawotanne kawotethay shaaketidaysa odees. Yihuda kawotethay ayyaana de7on daaburidanne xoonetida wode banta de7uwan minnidi de7ida kawotinne enti biitta bolla ehida laamey ha kifiliyan qoncidi bentees. He kawotape guuthati, Kawa Asa (shem 14-15); kawa Iyosaafexa (shem 17, 19-20); kawa Iyo7aasa (shem 24); kawa Hizqiyaasa (shem 29-32); kawa Iyosiyaasa (shem 34-35).
2 Taarike maxaafay lo77o kawota taarike xalaala gidonashin, Yihuda asaa di7os gathida iita kawotaka bessees. He iita kawota gaason K.Y.S. 586 laythan Yerusalaamey dhayis; xoossa keethayka laaletis.
Maxaafa Ayfe Qofata
Solomone cincatethaanne durertethaa (1:1-17)
Xoossa keetha keexetethinne anjetethi (2:1—7:22)
Solomone wodiyanne iya hayquwa (8:1—9:31)
Pudeha bagga kochata makallatethi (10:1-19)
Yihuda kawota (11:1—28:27)
Kawa Hizqiyaasanne Asoore ola (29:1—32:33)
Kawa Minaasenne Amoone kawa (33:1-25)
Higge maxaafay bentis (34:1—35:27)
Wursetha Yihuda kawota (36:1-16)
Yerusalaame laaletethanne Ayhudeta simuwa (36:17-23)
1
Solomoney Cincatethas Woossis
(1 Kawo 3:1-15)
1 Goday iya Xoossay iyara de7iya gishonne iya daro gitayida gisho Dawita na7ay Kawoy Solomoney ba kawotethaa minthis.
2 Solomoney Isra7eele ubbaa, shaalaqata, mato halaqata, daannata, Isra7eele asaa kaalethiya ubbaanne soo asaa halaqata xeegidi shiishis. 3 Hessafe guye, Solomoneynne shiiqida asa ubbay Gaba7oonan de7iya dhoqa goyinno bessaa bidosona. Godaa aylley Musey mela biittan oothida Dunkaaney yan de7ees. 4 Kase Dawiti Taabotiyas Yerusalaamen dunkaane tokidi, Qiriyaat-Yi7aarimepe I giigisidi wothida bessaa ehis. 5 Huura na7aa Ure na7ay Baxal7eeli naase biratape oothida yarsho bessay, Gaba7oonan Godaa Dunkaaniya sinthan de7ees. Solomoneynne shiiqida asay Godaas yan goyinnidosona. 6 Solomoney Dunkaaniya sinthan de7iya naase biratape oosetida yarsho bessaako, Godaa sinthe bidi, issi mukulu xuussa yarsho yarshis.
7 He gallas qamma Xoossay Solomones qoncidi, “Ta new ay immana mela koyay?” yaagis.
8 Solomoney, “Ne ta aawa Dawita gita siiqon dosadasa; tana iya bessan kawothadasa. 9 Abeeti Godaw, Xoossaw, ne ta aawa Dawitas kase gida qaalay poleto. Ne tana sa7an de7iya baanada darida asaa bolla kawothida gisho, 10 ta ha asaa kaalethana mela taw cincatethinne akeeka imma. Hessi hanonna ixiko, ha gita asaa ooni aysanaw danda7ii?” yaagis.
11 Xoossay Solomoneko, “Ne duretethi woyko shalo demmanaw woyko bonchetanaw woyko ne morketi hayqana mela woyko ne laythay aduqana mela oychonashin ta nena kawothida ta asaa aysanaw cincatethinne akeeka oychida gisho, 12 new cincatethinne akeeka immana. Qassi neepe kase de7ida kawotas woyko neepe guye dendana kawotas bayna duretethi, shalonne boncho new immana” yaagis.
13 Solomoney Dunkaaney Gaba7oonan de7iya, dhoqa goyinno bessaafe simmidi, Yerusalaame bidi Isra7eele bolla kawotis.
14 Solomoney para gaaretanne parata shiishis. Iyaw issi mukulunne oyddu xeetu para gaaretinne tammanne nam7u mukulu parati de7oosona. I enta para gaareta katamataninne baara Yerusalaamen wothis. 15 Kawoy worqaynne biray Yerusalaamen shuchada dooretanaada, gadhan boobbi dicciya mela ziga mithi darana mela oothis. 16 Solomone parati Gibxefenne Qaawe biittafe yidosona. Kawa zal7anchoti enta Qaawepe miishen shammidi ehoosona. 17 Enti issi issi para gaariya usupun xeetu bira santimen, issi issi para issi xeetanne ishatamu bira santimen Gibxefe shammidi, Hiteta kawota ubbaasinne Soore kawotas bayzoosona.