1 Hessafe guye, Kawoy Dawiti shiiqida asa ubbaa haysada yaagis; “Xoossay doorida ta na7aa Solomoney yooganne eratethan loohibeenna. Ha keexetana keethay asa keethi gidonashin Godaa Xoossaa keethi gidiya gisho oosoy gita. 2 Taani taw de7iya wolqa mela ta Xoossa keethaas worqan oosetiyabas worqaa, biran oosetiyabas bira, naase biratan oosetiyabas, naase birata, biratan oosetiyaba biratanne mithan oosetiyabas mithi giigisa wothas. Qassi margide, ibnebarade, dumma dumma mali de7iya alleeqo shuchata, al7o shuchatanne hara shuchata giigisada wothas. 3 Xoossa keetha taani daro dosiya gisho, taani ta Xoossa keethaas giigisidaysafe hara ta buzo shaluwape worqanne bira immas. 4 Keethaa godaa lanxanaw 100,000 kilo giraame Ofira worqanne 240,000 kilo giraame walahi bayna bira immas. 5 Kushe hiillanchoti oothana ooso ubbaas worqan oosetiyabas worqaa, biran oosetiyabas bira immas. Yaatin, hachi hintefe ba shenen bana Godaas dummayey oonee?” yaagis.

6 Isra7eele kochata soo asaa halaqati, kochata halaqati, shaalaqati, mato halaqatinne kawo moorinnati banta shenen bantaw de7iyaba dosan immidosona. 7 Enti Xoossa keetha oosuwas 170,000 kilo giraame worqaa, 340,000 kilo giraame bira, 620,000 kilo giraame naase biratanne 3,000,000 kilo giraame birata immidosona. 8 Al77o shuchi de7iya asa ubbay buqura aysiya Gedisoona yara gidida Yi7eela baggara Godaa Xoossa keetha buqura minjiya keethaas immis. 9 Asay ba shenen ba kumetha wozanan Godaas immida gisho ufaytis; kawoy Dawitika daro ufaytis.

10 Hessa gisho, Dawiti deriya ubbaa sinthan haysada yaagidi Godaa galatis; “Abeeti Godaw, nu aawa Isra7eele Xoossaw neeni merinaape merinaw galateta. 11 Abeeti Godaw, saloninne sa7an de7iya ubbay nebaa! Gitatethi, wolqi, bonchoy, xoonoynne angi nebaa! Abeeti Godaw, maati nebaa; neeni ubbaafe bollanne huuphe. 12 Duretethinne bonchoy neepe yees; neeni ubbaba haarasa. Wolqinne minotethi ne kushena; neeni asa ubbaa gitanne mino oothanaw danda7aasa. 13 Ha77ika nu Xoossaw, nuuni nena galatoos; ne boncho sunthaa sabboos.

14 “Nuuni haysa mela immanaw tanne ta asay oonee? Ubbay neepe yees; nuuni ne kushepe ekidaba new zaaridi immida. 15 Kase nu aawatada nuka ne sinthan bete asinne imathe. Ha sa7an nu de7o laythay ufaysi bayna kuya mela. 16 Abeeti Godaw, nu Xoossaw, ne geeshsha sunthaas nuuni keethe keexanaw shiishida ubbay ne kushepe yidaba; ubbay nebaa.

17 “Ta Xoossaw neeni wozanaa paaceysanne suuretethi doseysa taani erayis. Taani ta wozana suuretethan ta shenen hessa ubbaa immas. Ha bessan de7iya ne asay new ba shenen ufaysan immidaysa taani be7as. 18 Abeeti Godaw, nu mayzata Abrahaame, Yisaaqanne Isra7eele Xoossaw, ne asaa wozanan ha gita siiquwa merinaw naaga; enta wozanaa neeko zaara. 19 Ne wogaa, ne kiitaanne ne higgiya naagana melanne taani qopada giigisadaban Xoossa keetha keexana mela ta na7aa Solomones kumetha wozana imma” yaagidi woossis.

20 Hessafe guye, Dawiti deriyako, “Godaa hinte Xoossaa galatite” yaagis. Dere ubbay Godaa banta aawata Xoossaa galatidosona. Sa7an gufannidi Godaa goyinnidosona; kawuwasika boncho immidosona.

21 Wontetha gallas asay yarshonne xuussa yarsho Godaas yarshidosona. Hessika issi mukulu kormaa, issi mukulu maraze, issi mukulu dorsa urge, ushsha yarshonne hara daro yarsho yarshidosona. 22 Asay he gallas Godaa sinthan daro ufaytidi misinne uyis. Yaatidi asay kawa Dawita na7aa Solomone nam7antho zayte tiyidi iya kawotethan minthis. Saadoqa kahine gidana mela Godaa sinthan tiyidosona.

23 Hessafe guye, Solomoney ba aawa Dawita bessan Godaa kawotetha araatan uttis. Iyaw ubbabay injetis; Isra7eele ubbay iyaw kiitetidosona. 24 Halaqati, mino asatinne kawa Dawita nayti kawa Solomones kiitetanaw qaala gelidosona. 25 Goday Solomone Isra7eele asa ubbaa sinthan dhoqu dhoqu oothis; kase Isra7eele kawotas imetiboonna boncho Solomones immis.

26 Isseye na7ay Dawiti Isra7eele ubbaa bolla kawotis. 27 Dawiti Isra7eele bolla oytamu laythi kawotis; Kebroonan laapun laythi, Yerusalaamen hastamanne heedzu laythi kawotis. 28 Dawiti daro laythi de7idi, duretidi, bonchetidi, lo77o cimidi hayqis. Iya bessan iya na7ay Solomoney kawotis. 29 Dawiti koyrope doomidi wursethi gakanaw oothidabay, qoncethi be7iya Sameela, nabiya Naatananne qoncethi be7iya Gaade taarike maxaafan xaafetis. 30 I waati haaridako, waanida wolqaama aseeko, I oothidabay, Isra7eele asaynne heeran de7iya kawotethati ubbay hanidabay he maxaafatan xaafetis.