1 Isra7eele halaqati ubbay Yerusalaamen shiiqana mela kawoy Dawiti kiittis. Hessa gisho, issi issi kochaa halaqati, kawo moorinnati, shaalaqati, mato halaqati, kawuwasinne kawa naytas de7iya shaluwanne mehiya ayseysati, kawo gadhon ootheysati, eretidanne mino asati ubbay Yerusalaamen shiiqidosona.

2 Kawoy Dawiti dendi eqidi haysada yaagis; “Ta ishato, ta asaw, si7ite! Godaa caaqo Taabotiya wothiyanne nu Xoossaa tohoy shempiya keethaa keexanaw ta wozanan qopas; koshshiyaba ubbaa giigisas. 3 Shin Xoossay, ‘Neeni olanchonne suuthi gussida asi gidiya gisho ta sunthaas keethe keexaka’ yaagis. 4 Taani Isra7eele bolla merinaw kawotanaada, Goday Isra7eele Xoossay ta aawa soope tana dooris. Kaalethanaada koyro Yihuda kochaa dooris; Yihuda kochaafe ta aawa soo asaa dooris; ta aawa nayta giddofe tana dooridi Isra7eele ubbaa bolla kawoyanaw dosis. 5 Goday taw daro nayta immis; ta nayta ubbaafe Godaa kawotetha araatan uttidi Isra7eele bolla kawotanaada ta na7aa Solomone dooris.

6 “Goday, ‘Ta keethaanne ta dabaaba keexanay ne na7aa Solomone. I taw na7a gidana mela taani iya dooras; taani iyaw aawa gidana. 7 I ha77i ootheysada ta kiitaanne ta higgiya minnidi naagiko taani iya kawotethaa merinaw minthana’ yaagis. 8 Hiza Godaa shiiqo gidida Isra7eele asa ubbay be7ishin, nu Xoossay si7ishin, Godaa hinte Xoossaa kiita ubbaa hinte minthidi naagana mela taani hintew odayis. Yaatiko, hinte ha lo77o biitta laattana; hinte naytaka merinaw laatisana.

9 “Solomone, ta na7aw, Xoossay asa wozananne qofa ubbaa eriya gisho ne aawa Xoossaa era; kumetha wozananinne shenen iyaw ootha. Neeni iya koyiko I new bentana; shin neeni iya aggiko I nena merinaw aggana. 10 Xoossaa keetha keexana mela Goday nena dooridaysa dogopa; ooso ubbaa minnada ootha” yaagis.

11 Hessafe guye, Dawiti ba na7aa Solomones Xoossa keethaa, barandaa, buqura minjiya keethaa, pooqiyanne giddo kifileta, hessadaka nagara atotetha kama wothiya kifiliya halchuwanne qofaa immis. 12 Dawiti Godaa keetha dabaaba keexanaw ba wozanan de7iya qofaa, iya yuushuwan de7iya ubba kifileta halchuwanne Xoossa keethaa buqura wothiya kifiliyanne Godaas dummatida imotata wothiya kifileta oosuwa qofaa immis.

13 Hessadaka Dawiti kahinetanne Leeweta ooso maara, Xoossa keetha ooso maaranne Xoossa keetha miisheta naagiya maara odiya qofaa iyaw immis.

14 Dumma dumma oosos go7etiya miisheta oothanaw maaddiya worqanne bira mizaanen likisidi Solomones immis. 15 Hessika xompe wothiya worqa kocatanne iya xompeta, xompe wothiya bira kocatanne iya xompeta, 16 Godaa sinthan uythu wothiya worqa xarpheezata, bira xarpheezata, 17 worqa qapheta, worqa kereta, worqa wancata, worqa xaarota, bira xaarota 18 ixaane cuyisiya geeshsha worqa saaxine, Godaa caaqo Taabotiya bolla banta qefiya miccidi kammiya kiruubeta wothiya worqa gaariya giigisiya halchuwa iyaw immis. 19 Dawiti, “Goday ba kushiya ta bolla wothidi ha xaafetida qofa ubbaa tana erisis” yaagis.

20 Dawiti ba na7aa Solomoneko, “Hiza minna! Oosuwa ootha! Goday ta Xoossay neera de7iya gisho yayyofa; dagammofa! Xoossa keetha oosoy poletana gakanaw Xoossay nena yeggennanne aggenna. 21 Xoossa keethan de7iya ooso ubbaas kahinetinne Leeweti shuumetidosona. Kushe hiilli de7iya asa ubbay nena ooso ubban maaddana. Halaqatinne asa ubbay new kiitetana” yaagis.