1 Banta cugan cugan kawotethaa aysiya Isra7eele soo asaa halaqati, shaalaqatinne mato halaqati haysafe kaallidi xaafetidaysata. Issi issi cugan 24,000 asati de7oosona. Issi issi cugay laythan issi ageena maaran maaran kawotetha ooso oothanaw keyees.

2 Koyro ageenan keya cugaa kaalethey Zabdi7eela na7aa Yashobi7aama; iya cugan 24,000 asi de7ees. 3 Yashobi7aami Paaresa koche; I koyro ageenas tora moconata.

4 Nam7antho ageenan keyiya cugaa kaalethey Ahoha addiya Dodaya; iya cugan 24,000 asi de7ees. He cugaa kaalethiya nam7antho halaqay Mikloota.

5 Heedzantho ageenan keyiya cugaa kaalethey kahiniya Yoodahe na7aa Banaya; iya cugan 24,000 asi de7ees. 6 Banayi hastamu eretida asata giddon mino asi; qassi hastamata halaqa. Iya bessan iya na7ay Amzabadi halaqa gidis.

7 Oyddantho ageenan keyiya cugaa kaalethey Iyo7aaba ishaa Asaheela; iya cugan 24,000 asi de7ees. Iya bessan iya na7ay Zabadi halaqa gidis.

8 Ichashantho ageenan keyiya cugaa kaalethey Yisihaara yaraape Shamhuuta; iya cugan 24,000 asi de7ees.

9 Usupuntho ageenan keyiya cugaa kaalethey Tequhe addiya Iska na7aa Ira; iya cugan 24,000 asi de7ees.

10 Laapuntha ageenan keyiya cugaa kaalethey Efreema koche gidida Piloona addiya Selesa; iya cugan 24,000 asi de7ees.

11 Hospuntha ageenan keyiya cuga kaalethey Husha addiya Sibakaya; iya cugan 24,000 asi de7ees. Sibakayi Yihuda kochenne Zaara yara.

12 Uddufuntho ageenan keyiya cugaa kaalethey Biniyaame koche gidida Anatoote addiya Abi7ezera; iya cugan 24,000 asi de7ees.

13 Tammantho ageenan keyiya cuga kaalethey Naxoofa addiya Zaara yara gidida Mahira; iya cugan 24,000 asi de7ees.

14 Tammanne issintho ageenan keyiya cugaa kaalethey Efreema koche gidida Pir7atoona addiya Banaya; iya cugan 24,000 asi de7ees.

15 Tammanne nam7antho ageenan keyiya cugaa kaalethey Gotoniyala yaraape gidida Naxoofa Heldaya; iya cugan 24,000 asi de7ees.

16 Isra7eele kochata aysanaw shuumetidaysati haysafe kaallidi xaafetidaysata.

Robeela kochaa aysey Zikira na7aa Alaazara.

Simoona kochaa aysey Ma7ika na7aa Safaaxa.

17 Leewe kochaa aysey Qamu7eela na7aa Hasabaya.

Aarona kochaa aysey Saadoqa.

18 Yihuda kochaa aysey Dawita ishaa Elihu.

Yisakoora kochaa aysey Mika7eela na7aa Omira.

19 Zabloona kochaa aysey Abdiyu na7aa Yashimaya.

Niftaaleme kochaa aysey Azri7eela na7aa Yarmoota.

20 Efreema kochaa aysey Azaaza na7aa Hose7a.

Minaase kochaafe baggaa aysey Padaya na7aa Iyyu7eela.

21 Galadan de7iya Minaase kochaafe baggaa aysey Zakariyasa na7aa Ido.

Biniyaame kochaa aysey Abeneera na7aa Ye7isi7eela.

22 Daane kochaa aysey Yirohaama na7aa Azari7eela.

Haysati Isra7eele kochaa ayseysata.

23 Goday Isra7eele asaa salo xoolintoda darsana gida gisho Dawiti laatamu laythinne iyape garsara de7eyisata taybon gelsibeenna. 24 Xaruya na7ay Iyo7aabi asaa taybo doomidi wursonna aggis. Asaa taybida gisho Goday Isra7eele asaa bolla hanqetida gisho enta tayboy kawa Dawita taarike mazgaben xaafetibeenna.

25 Kawo buqura minjiya bessaa aawatethan aysiya asaa sunthay haysafe kaallidi xaafetidaysata. Adi7eela na7aa Azmooti kawo keetha buqura aawatethan aysees.

Ooziyana na7ay Yoonataani gaxaren, katamaninne gutan de7iya kawo keetha miisheta aawatethan aysees. 26 Kaluba na7ay Iziri goshshanchota aawatethan aysees. 27 Rama addey Same7i woyne gadeta aawatethan aysees. Safaama addey Zabdi woyne ushsha minjiya keethaa aawatethan aysees.

28 Gadara addey Ba7al-Hanani zuma bolla de7iya zayte shamahuwanne boobba aawatethan aysees. Zayte wothiya keethaa aawatethan aysey Iyo7aasa. 29 Saarona denban heemetiya mehiya aawatethan aysey Saarona addiya Saxira. Zangaaran heemetiya mehiya aawatethan aysey Adilaya na7aa Shaafaxa. 30 Gimaleta aawatethan aysey Isma7eela addiya Ubisa. Hareta aawatethan aysey Meronoota addiya Yehidaya. 31 Dorsatanne deeshata aawatethan aysey Agara addey Yaziza. Haysati ubbay Dawita shaluwa bolla aawateyisata.

32 Dawita aawa ishay, xaafey Yoonataani akeekanne kawa zoriya asi. Hakmoona na7ay Yi7eeli kawa nayta tamaarsees. 33 Akxoofeli kawa zoreysa. Arka addey Kuussi kawa lagge. 34 Akxoofeli hayqin, iya bessan Banaya na7ay Yodaaheynne Abyataari kawa zoriya asi gididosona; Iyo7aabi kawa toora mocona.