1 Xoossaa keetha pengiya naageysati haysafe kaallidi xaafetidaysata.

Koyroy Qore kochaafe Asaafa adde naytape Qore na7a Masulaama. 2 Masulaami laapun adde nayta yelis; enti banta yeletaa maaran Zakariyasa, Yidi7eela, Yozobaata, Yatini7eela, 3 Elama, Yihoonanne Elhoona.

4 Xoossay Obeed-Edooma anjida gisho, I hospun adde nayta yelis. Enti banta yeletaa maaran Shamaya, Yozabaata, Iyo7aasa, Sakara, Natina7eela, 5 Ami7eela, Yisakooranne Pulaata. 6 Obeed-Edooma na7ay Shamayey usupun adde nayta yelis; enti mino asi gidida gisho, banta aawa soo asaas halaqa gididosona. 7 Shamaya nayti Otina, Rafa7eela, Yobeedanne Elzabaada; enta ishati Elihuynne Samaki qara asata. 8 Haysati ubbay Obeed-Edooma kochata; enti, enta naytanne enta dabboti oosos mino. Obeed-Edooma kochati kumethi usupun tammanne nam7a.

9 Masulaamas mino naytinne mino dabboti de7oosona; enti kumethi tammanne hospuna.

10 Maraara yaraape Hosa geetetiya addiyas oyddu adde nayti de7oosona. Shimiri bayra na7a gidenna, shin iya aaway iya halaqa oothis. 11 Iya ishati Kalqe, Zabalanne Zakariyasa. Hosa naytinne iya dabboti kumethi tammanne heedza.

12 Xoossa keetha pengiya naageysati banta soo asaa halaqata cugan cugan shaaketidosona. Hara Leewetada entaka Xoossa keetha oosoy shaahon gakis. 13 Issi issi pengiya naaganaw banta soo asan asan na7a cima goonna saama yeggidosona. 14 Doloha Pengiya naaganaw saamay Salamas keyis. Lo77o zore zoriya iya na7aa Zakariyasa pudeha Pengiya naaganaw saami keyis. 15 Obeed-Edoomas dugeha pengiya naaganaw saami keyis. Iya naytas buqura minjiya keethaa naaganaw saami keyis. 16 Wuloha pengiyanne qommo baggara de7iya Shalekota pengiya naaganaw saami Sufimasinne Hosas keyis. Naagoy maaran maaran gakees.

17 Gallas gallas doloha baggara usupun, pudeha baggara oydda, dugeha baggara oyddu Leeweti naagoosona. Qassi buqura minjiya keethaa nam7u nam7u Leeweti naagoosona. 18 Wuloha baggara dabaabako efiya ogiya oyddu, qassi dabaaba nam7u Leeweti naagoosona. 19 Hiza Qoresinne Maraara kochaas imetida penge naago oosoy haysa.

20 Akiya geetetiya Leewey Xoossa keethan de7iya buquranne Xoossas dummayi wothida imotata naaganaw shuumetis. 21 Gedisoona na7aa Laadanna yaraape Yi7eeli dumma dumma soo asaas aawates. 22 Yi7eela nayti Zetaamanne iya ishaa Iyyu7eela; enti Xoossa keethan de7iya buqura naaganaw shuumetidosona.

23 Amraama, Yisihaara, Kebroonanne Uzi7eela yaratas oosoy shaaketidi imetis. 24 Muse na7aa Gedisoona yara gidida Sabu7eeli Xoossa keethan de7iya buqura naageysata halaqata bolla shuumetis. 25 I Gedisoona ishaa Alaazara baggara Salomootas dabbo. Al77azari Rahaabiya yelis; Rahaabi Yeshaya yelis; Yeshayi Yoraama yelis; Yoraami Zikira yelis; Zikiri Salomita yelis. 26 Salomootinne iya dabboti kawoy Dawiti, iya soo asaa halaqati, shaalaqati, mato halaqatinne toora moconata Xoossas dummayida miishe ubbaa bolla shuumetidosona. 27 Ha asati olan di7etidi yida miishetape baggaa Xoossa keethan dummayidi wothidosona. 28 Qoncethi be7iya Sameeli, Qiisa na7ay Saa7oli, Neera na7ay Abeneerinne Xaruya na7ay Iyo7aabi kase dummayidi wothida imota ubbaa Salomootinne iya dabboti naagoosona.

29 Yisihaara yaratape Kanaaneynne iya nayti Xoossa keethafe karera de7iya ooson Isra7eele asaa aysanawunne daynnatanaw shuumetidosona.

30 Kebroona yaratape Hashabinne iya dabboti 1,700 mino asati, Godaa oosuwasinne kawa oosuwas Yordaanosepe wuloha baggara de7iya Isra7eele asaa bolla shuumetidosona. 31 Kebroona yarata mazgabiya maaran Yiriyi enta halaqa. Dawiti kawotida oytamantho laythan mazgaben koyin enta asaa giddofe mino asati Galada biittan Ya7izeera geetetiya bessan bentidosona. 32 Enta soo asaas halaqa gidida Yiriya dabboti minoti 2,700. Kawoy Dawiti Xoossa oosuwasinne kawa oosuwas Robeela, Gaadenne Minaase kochatape baggata bolla enta shuumis.