1 Solomoney Xoossa keetha ooso ubbaa polidaape guye iya aaway Dawiti Godaas dummayidi wothida bira, worqanne hara miisheta ubbaa ehidi, Xoossa keetha buqura minjiya bessan wothis.

2 Hessafe guye, Kawoy Solomoney Godaa Qaala caaqo Taabotiya Dawita Katama gidida Xiyoonepe ehana mela Isra7eele cimata, Isra7eele kochatanne soo asaa halaqata Yerusalaame shiishis. 3 Isra7eele asa ubbay laapuntho ageenan, Shaqara Ba7aaley bonchetiya wode kawako shiiqidosona. 4 Isra7eele cimati ubbay gakin, Leeweti Taabotiya denthidosona. 5 Leewetinne kahineti Taabotiya, Dunkaaniyanne iya giddon de7iya geeshsha miisheta ubbaa tookidi ehidosona. 6 Kawoy Solomoneynne iyara de7iya Isra7eele maabara ubbay Taabotiya sinthan shiiqidi, taybanaw danda7etonna daro dorsenne mehe yarshidosona.

7 Kahineti Caaqo Taabotey Xoossaa keethaa Ubbaafe Geeshsha Bessaa ehidi, kiruubeta misileta qefetape garsara wothidosona. 8 Micetidi uttida kiruubeta qefeti Taabotiyanne Taabotiya tookiya kasota kammidosona. 9 Kasoti daro adusse gidiya gisho, enta xeeray Ubbaafe Geeshsha Bessaa sinthan de7iya Geeshsha bessan eqida asi be7anaw danda7ees; shin Geeshsha bessaafe karera bentenna. Enti hachi gakanaw he bessan de7oosona. 10 Isra7eele asay Gibxe biittafe keyida wode Goday entara caaqida Koreeba zuman Musey wothida nam7u loche shuchatape attishin, Taabotiya giddon harabay baawa.

11 He bessan de7iya kahineti ubbay banta oothiya bessan bessan shaaketonna de7ishe bantana Godaas dummayidosona. 12 Mazmure zammariya Leeweti ubbay, Asaafi, Hemaaninne Edotape, enta naytinne enta dabboti liino geetetiya ma7o ma7idosona. He ma7uwa ma7idi, daala, diithinne maasinqo oykidi, yarsho bessaafe doloha baggara eqidosona. 13 Xeetanne laatamu kahineti moyze punnanaw entara eqidosona. Enti ubbay moyze punnishe, daala qaathishe, diithi diixishenne hara miisheta kaa7ishe,

14 Godaa bonchoy Xoossa keethaa kumida gisho, shaara gaason kahineti banta oosuwa oothanaw danda7ibookona.