1 Solomoney, “Abeeti Godaw, ‘Ta dhuma shaaran daana’ yaagadasa. 2 Shin taani neeni yan merinaw daana lo77o keethe new keexas” yaagis.

3 Isra7eele shiiqoy yan eqidashin, kawoy entako simmidi, enta haysada yaagidi anjis; 4 “Goday Isra7eele Xoossay galatetto! Ta aawa Dawitas ba doonan odida ufaysa qaala ba kushen polis. He I odida ufaysay, 5 ‘Taani ta asaa Isra7eele Gibxefe kessada ehida wodepe doomin, ta sunthay iyan xeegetana mela taw keethe keexanaw Isra7eele kochata giddon ay katamaka doorabike; woyko I ta asaa Isra7eele kaalethana mela oonaka doorabike. 6 Shin ha77i ta sunthay Yerusalaamen xeegetana mela taani Yerusalaame dooras; qassi ta asaa Isra7eele kaalethana mela Dawita dooras.’

7 “Ta aaway Dawiti Godaa Isra7eele Xoossaa sunthaas keethe keexanaw ba wozanan qopis. 8 Shin Goday ta aawa Dawitako, ‘Neeni ta sunthaas keethe keexanaw ne wozanan qopida gisho lo77o oothadasa. 9 Gidoshin, taw keethe keexanay nena gidaka; ta sunthaas keethe keexanay ne gulbatape keyana ne na7aa.’

10 “Goday ba gida ufaysa qaala polis. Goday kase immida ufaysada taani ta aawa Dawita bessan kawotada Isra7eele kawotetha araatan uttas. Qassi Godaa Isra7eele Xoossaa sunthaas keethe keexas. 11 Goday Isra7eelera caaqida caaqoy xaafetida loche shuchati de7iya Taabotiya iya giddon wothas” yaagis.

12-13 Solomoney adussatethay ichashu wadha, gompay ichashu wadhanne dhoqatethat heedzu wadha gidida madirake naase biratape oothidi dabaaba giddon wothis. Solomoney Godaa yarsho bessa sinthan, Isra7eele maabaray de7iya bessan eqidi, ba kushiya miccidi Isra7eele shiiquwa sinthan gulbatis. 14 I haysada yaagidi woossis:

“Abeeti Godaw, Isra7eele Xoossaw, salon woyko sa7an ne mela xoossi baawa. Neeni ne ufaysa qaala naagasa; banta kumetha wozanaape ne sinthan hemetida ne aylleta merina siiquwan dosadasa. 15 Ne aylliya, ta aawa Dawitas neeni oothana gada odida qaala naagadasa. Neeni kase ne doonan odidaysa ne kushen hachi poladasa. 16 Abeeti Godaw, Isra7eele Xoossaw neeni ne aylliya, ta aawa Dawitas, ‘Neeni ta sinthan hemetidaysada ne naytika ta higgiyan hemetanaw banta ogiya naagiko, Isra7eele araatan uttiya ase dhayaka’ yaagida qaala pola. 17 Abeeti Godaw, Isra7eele Xoossaw, neeni ne aylliya Dawitas odida ne ufaysa qaalay poleto.

18 “Shin Xoossi tuma, asara sa7an de7iyee? Heko, saloy, ubbaafe dhoqa saloy nena oykanaw danda7enna. Yaatin, ha ta keexida keethay new ay mela guuxandesha! 19 Gidoshin, abeeti Godaw, ta Xoossaw, ta woosa, ne aylliya woosaanne xeessaa si7a. Taani ne aylley ne sinthan woossiya woosaanne waasuwa si7a. 20 Neeni, ‘Ta sunthay he bessan xeegetana’ gida ha Xoossa keethako, ne ayfey qamma gallas xeello. Taani ne aylley ha keethako simmada woossiya woosa si7a. 21 Taani ne aylleynne ne asay Isra7eeley ha ne keethako simmidi woossiya woosa si7a. Ne de7iya bessan salon si7ada nuus atto yaaga.

22 “Issi asi ba shooruwa qohidi akay gin, iya caaqethanaw ha ne keethaa ehin, iya giddon de7iya yarsho bessa sinthan I caaqiko, 23 neeni salon si7ada ootha. Ne aylleta giddon pirda. Qohida uraa bolla pirdada, I oothidaba iya bolla zaara; xilluwa xoonisada iyaw iya xillotethaada zaara.

24 “Ne asay Isra7eeley ne bolla nagara oothidi, morken xoonetidi, neeko simmidi, ne sunthaa xeegidi, ha keethan nena woossiko, 25 ne salon si7a. Ne asaa Isra7eele nagaraa atto yaaga; ne kase entawunne enta mayzatas immida biitta enta zaara.

26 “Ne asay ne bolla nagaraa oothin, saloy gordetiko, iri bukonna ixin, enti ha bessaa simmidi, woossiko ne enta un7ethida gisho, ne sunthaa xeegidi, banta nagaraape simmiko, 27 ne salon si7a. Ne aylleta nagaraa, ne asaa Isra7eele nagaraa atto yaaga. Enti hemetanaw bessiya lo77o ogiya enta tamaarsa; neeni ne asaas immida biittan ira bukisa.

28 “Biittaa bolla koshi woyko boshi woyko leegey woyko booley woyko gondoy dhaysin woyko morkey enta katamata teqin woyko dhayoy woyko hargey yin, 29 ne asaa Isra7eelepe oonika woyko ne asa ubbay nena woossiko, ay asika ba wozanan un7etiyabanne azzaniyaba eridi, ha Xoossa keethako simmidi, ba kushiya micciko, 30 ne de7iya bessan salon si7a. Enta nagaraa atto yaaga; entaw ootha. Neeni asa wozana ereysada asa ubbaas iya oosuwada oosuwada imma. Asa ubbaa wozanaa erey ne xalaala. 31 Hessika ne nu mayzatas immida biittan banta de7o laytha ubban new yayyana melanne ne ogiyan hemetana melasa.

32 “Isra7eele gidonna hara biitta asi ne gita sunthaa gishonne neeni ne asaas oothida malaalsiya oosota gisho haaho biittafe yidi, ha Xoossa keethako simmidi woossiko, 33 ne de7iya bessan salon si7a. Hara biitta asay oychiyaba ubbaa ootha. Ha alamiyan de7iya asa ubbay ne sunthaa eranaadanne ne ase gidida Isra7eeleda new yayyanaada ta keexida ha keethay ne goyinnetiya bessi gideysa enti eranaada hara biitta asay nena woossiyaba ubbaa ootha.

34 “Enti banta morketa olana mela ne kiittiya wode ne doorida ha katamaakonne ta ne sunthaa gisho keexida ha keethaako simmidi nena woossiko, 35 enta woosaanne enta oysha salon si7a; enta oysha zaara.

36 “Nagara oothonna asi bayna gisho ne ase gidida Isra7eeley nagara oothidi nena qohiko neeni shenetada morketas aatha immin morketi enta di77idi haaho woyko mata biitta enta efin, 37 enti he di7etida biittan de7ishe banta wozanan nagarape simmiko, ‘Nuuni nagara oothida; nuuni qohida; nuuni iitabaa hanida’ yaagidi nena woossiko, 38 bantana di7idi efida morketa biittan de7ishe enti banta kumetha wozanaaninne kumetha qofan neeko simmiko, neeni enta mayzatas immida biittako, neeni doorida katamaakonne taani ne sunthaa gisho keexida keethako simmidi nena woossiko, 39 enta woosaanne oysha ne de7iya bessan salon si7a; entaw pirda; enta nagaraa atto” yaaga.

40 “Abeeti ta Xoossaw, ha bessan woossiya woosa ne ayfey xeello; ne haythay si7o.