1 Solomoney woosa polida wode salope tami wodhidi xuussa yarshuwanne hara yarshuwa mis. Godaa bonchoy Xoossa keethaa kumis. 2 Godaa bonchoy Xoossa keethaa kumida gisho kahineti Xoossa keethaa gelanaw danda7ibookona. 3 Isra7eele asa ubbay tami salope wodhishininne Godaa bonchoy Xoossa keethaa kumishin be7ida wode banta som7uwa sa7a gathidi goyinnidosona.

4 Kawoynne asa ubbay Godaa sinthan yarsho yarshidosona. 5 Kawoy Solomoney laatamanne nam7u mukulu kormatanne xeetanne laatamu mukulu dorsata yarshis. Hessada oothidi, kawoynne asa ubbay Xoossa keethaa Godaas dummayidosona. 6 Kahineti bantaw giigida bessan eqin, Leeweti kawoy Dawiti Godaa sabbanaw kase oothida mazmure yexiya miisheta oykidi enta sinthan eqidi, “Iya siiqoy merinaasa” yaagidi yexishe Godaa galatidosona. Kahineti Leeweta sinthan eqidi moyze punnin Isra7eele asa ubbay eqis.

7 Solomoney xoossaa keethaa sinthan de7iya giddo dabaaba dummayis. He bessan xuussa yarshonne issifetetha yarshuwafe modhuwa yarshis. I hessa oothiday, Godaa sinthan de7iya naase biratape oosetida yarsho bessay, xuussa yarshuwa, katha yarshuwanne issifetetha yarshuwafe modhuwa yarshanaw guuxida gishosa.

8 He wode Solomoneynne Isra7eele asa ubbay laapun gallas ba7aale bonchidosona. Isra7eele asay Hamaatape bidi Gibxe shaafa gakanaw de7iya daro asay he bessan shiiqidosona. 9 Asay yarsho bessa anjisiya ba7aale laapun gallas qassi Shaqara Ba7aale hara laapun gallas bonchidosona. Hospuntha gallas wursetha shiiqo shiiqidosona. 10 Solomoney laapuntha ageenan, laatamanne heedzantho gallasan asaa moyzis. Asay, Goday Dawitas, Solomonesinne ba asaa Isra7eeles oothida keehatethan ufaytishe ba soo soo bidosona.

11 Solomoney Xoossa keethaanne kawo gadho keexidi wursis. Solomoney Xoossa keethaninne ba gadhon oothanaw ba wozanan qopidaba ubbaa polis. 12 Goday Solomones qamma qoncidi, “Taani ne woosa si7as; taani ha Xoossa keethaa yarsho bessi gidana mela dooras. 13 Iri bukonna mela ta saluwa gordiya wode woyko kathi maana mela boole kiittiya wode woyko ta asaa bolla gado yeddiya wode 14 ta sunthan xeegetida ta asay banta asatethaa kawushidi woossiko, tana koyiko, banta iita ogiyape simmiko, ta salon enta woosa si7ana; enta nagaraa atto gaana; enta biitta pathana. 15 Ha77i ha bessan woosetiya woosa ta ayfey xeellana; ta haythay si7ana. 16 Ha77i ta sunthay merinaw iyan daana mela ha keetha doorasinne geeshshas. Ta ayfeynne ta wozanay ubba wode ha keethan daana.

17 “Ne aaway Dawiti oothidaysada neeni ta sinthan hemetiko, ta kiitaa ubbaa oothiko, ta wogaanne ta higgiya naagiko, 18 taani ne aawa Dawitara, ‘Ne kochaafe Isra7eele bolla kawo gidiya asi dhayaka’ yaagada caaqidaysada ne araata minthada essana.

19 “Shin hinte tana aggidi ta hintew immida wogaanne higgiya aggiko, hara xoossata goyinnikonne entaw oothiko, 20 taani kase hintew immida biittafe hintena dhoqollana; ta sunthaas dummayida ha keethaaka aggaagana. Ta ha keethaa kawotetha ubbaa giddon miichasinne qelqisethas oothana. 21 Ha Xoossa keethay daro malaalsiyaba gidikoka, iya matara aadhiya ubbay malaaletidi, ‘Goday ha biittanne ha Xoossa keethaa ayis haysada oothidee?’ ” yaagana. 22 Asay zaaridi, “Haysa ubbaa enta bolla ehiday, entana Gibxefe kessida enta mayzata Xoossaa aggidi hara xoossata kaallida gishonne enta goyinnida gishosa” yaagana.