1 Solomoney Xoossa keethaanne baw gadho keexida laatamantho laytha wursethan, 2 Kawoy Kiraami immida katamata Solomoney zaari keexidi Isra7eele asaa he katamatan wothis.

3 Solomoney Hamaatanne Suubba geetetiya biitta bidi oykis. 4 Yaatidi mela biittan de7iya Tadmoora katamaanne shalo minjiya katamata Hamaata biittan keexis. 5 Hessadaka, Solomoney Qommo Beet-Horonanne garsa Beet-Horona geetetiya katamata zaaridi keexis. He katamati dirsi, pengeynne kobey de7iya diretidi uttida katamata. 6 Balata katamaa, buqura minjiya katamata ubbaa, ba paratanne para gaareta wothiya katamata ubbaanne I keexanaw amotida ubbaa Yerusalaamen, Libaanoseninne ba haariya biitta ubban keexis.

7 Isra7eele gidonashin hara biitta asatape attida Hiteta, Amooreta, Parzeta, Hiwetanne Yaabuseta, 8 Isra7eele asay wursidi dhaysona aggida asaa wolqa ooso oothana mela Solomoney dooris; hachi gakanaw enti oothosona. 9 Shin Solomoney Isra7eele asaape oonaka aylle oothidi oosisibeenna. Enti iya olanchota, toora moconata, para gaare laaggeyisata halaqatanne para asata gididi oothidosona. 10 Enta giddofe nam7u xeetanne ishatamu asati kawa Solomone oosuwa aawatethan oosisosona.

11 Solomoney, “Godaa Taabotey gelida bessay geeshshi gidiya gisho, ta machiya, Faarona na7iya, Isra7eele kawa Dawita gadhon daanaw bessuku” yaagidi, Gibxe kawa na7iw Dawita katamaape denthidi iw keexetida keethan wothis.

12 Solomoney he wode Xoossa keethaa sinthan Godaas keexida yarsho bessan xuussa yarsho Godaas yarshis. 13 Muse higgey kiitteysada gallas gallas xuussa yarsho yarshees. Solomoney Sambaatan gallas, ageena xeeroninne laythan heedzu toho bonchetiya ba7aaletan, hessika Uytha Ba7aalen, Saaminta Ba7aaleninne Shaqara Ba7aalen Godaas yarsho yarshees.

14 Iya aaway Dawiti kase kiittidaysada kahineta enta ooson ooson shaakidi shuumis; gallas gallas mazmuren sabbana melanne kahineta maaddana mela Leeweta shaakidi shuumis. Xoossa asi gidida Dawiti kiittidaysada penge naagiya asata issi issi pengiya naagana mela shuumis. 15 Hessadaka, kase Dawiti buqura minjiya bessaanne hara allaletaba kahinetanne Leeweta kiittidaysada issoyka attonna ubbay poletis.

16 Solomoney qopida ooso ubbay oosetidi wuris; Xoossa keethay baasetida wodiyape doomidi poletana gakanaw ooso ubbay lo77o oosetis.

17 He wode kawoy Solomoney Edoome biittan Zo7o Abbaa doonan de7iya Exiyoon-Gabiranne Eloota bis. 18 Kawoy Kiraami markabetanne markabiya laagon loohida asata Solomones yeddis. Enti Solomone asatara issife Ofira biitta bidi yaape 15,000 kilo giraame worqaa kawa Solomones ehidosona.