1 Saaba kawiya Solomone woriya si7ada, sedhemenken iya paacanaw sawo, daro worqanne al7o shuchu caanetida daro gimalera, daro azhaban Yerusalaame basu. Ba wozanan de7iyaba ubbaa Solomones odasu. 2 Solomoney iya oychidaba ubbaas zaaro immis; I iw birshonna iyape geemmidi attidabay aybika baawa. 3 Saaba kawiya Solomone cincatetha, I keexida gadhuwa, 4 iya gaytan shiiqiya kathaa, iya moorinnati uttiya utethaa, iya oosanchoti oothiya oosuwanne ma7iya ma7uwa, iya ushsha tigiya asati ma7iya ma7uwanne Godaa keethan I yarshiya xuussa yarshuwa be7ida wode I wozanay daro malaaletis.

5 Iya kawako, “Nebaanne ne cincatethaa taani ta biittan de7ashe si7idaysi tuma. 6 Shin ta yada ta ayfen be7ana gakanaw enti taw odidaba ammanabike. Ne cincatetha gitatethaas baggaaka taw odibookona; ta si7idaysafe ne daro gitataasa. 7 Ubba wode ne sinthan eqidi ne cincatethaa si7iya ne asatinne ne moorinnati ay mela anjetidona! 8 Nenan ufaytidi, nena ba kawotetha araatan utisida Goday ne Xoossay galatetto! Ne Xoossay Isra7eele siiqida gishonne merinaw minthi essanaw koyida gisho neeni suure pirdaanne xillotethaa oothana mela I nena enta bolla kawo oothis” yaagasu.

9 Kawiya oyddu mukulu kilo giraame worqa, daro sawonne al7o shuchu kawa Solomones immasu; Saaba kawiya kawa Solomones immida shittuwa mela shittoy baawa.

10 Qassi Ofirape worqa ehida Kiraamanne Solomone asati yaape sandale mithinne al7o shuchu ehidosona. 11 Kawoy sandale mithaa Xoossa keethasinne kawo gadhos dethe medhanaw, hessadaka zammaaretas maasinqonne diithi oothanaw go7etis. Hessa mela yetha miisheti haysafe kase Yihuda biittan bentibeenna.

12 Kawoy Solomoney Saaba kawiya koyidabaanne oychidaba ubbaa iw immis. Iya, iyaw ehidaysafe aathidi iw immis. Hessafe guye, Saaba kawiya ba azhabaara dendada ba biitta simmasu.

13 Solomoney laythan laythan ekiya worqay laatamanne heedzu mukulu kilo giraame. 14 Hessika zal7anchotape ekiya qaraxa, Arabe biitta kawotapenne Isra7eele biittan haareysatape ekiya worqanne bira gujonnashina. 15 Kawoy Solomoney issi issi gondalley laapun kilo giraame gidiya nam7u xeetu wogga gondalleta worqafe oosisis. 16 Issoy issoy heedzu kilo giraame gidiya heedzu xeetu guutha gondalleta worqafe oosisis. Kawoy he gondalleta “Libaanose Woraa” geetetiya kawo gadhon wothis.

17 Kawoy dangarsa zaalepe issi gita araata oosisidi walahi bayna worqan lanxis. 18 Araatay de7iya bessaa keyanaw yedhiya usupun dethati de7oosona. Araatara oyketidi uttida worqafe oosetida toho yedhiya bessi de7ees. Araatas nam7u baggara kushe shempisiya zempoti de7oosona; he zempota matara ya bagganinne ha baggan eqida issi issi gaammo misiley de7ees. 19 He araatay de7iya bessaa keyiya usupun dethata bolla ya baggaranne ha baggara eqida tammanne nam7u gaammo misileti de7oosona. Hessa mela araati hara kawotethan awunka oosetibeenna.

20 Kawoy Solomoney ushshu uyaa miishe ubbay worqafe oosetis; “Libaanose Woraa” geetetiya kawo gadhon de7iya miishe ubbay walahi bayna worqafe oosetis. Solomone wode biri darida gisho taybon gelenna. 21 Kawas Kiraama asati laagiya zal7e markabeta de7oosona. He markabeti worqanne bira, dangarsa zaale, qaaretanne geleshshota caanidi heedzu laythafe issi toho ehoosona.

22 Kawoy Solomoney duretethaninne cincatethan sa7an de7iya kawota ubbaafe aadhees. 23 Sa7an de7iya kawoti ubbay Xoossay iya wozanan wothida cincatethaa si7anaw koyoosona. 24 Laythan laythan iyako yaa ubbay iyaw worqanne bira, ma7ota, ola miishe, shitto, paranne baqulota imota ehoosona.

25 Solomone paratasinne gaaretas oyddu mukulu zadaloti de7ees; tammanne nam7u mukulu para asati de7oosona. Solomoney hessata dumma dumma katamataninne Yerusalaamen wothis. 26 Solomoney Efraxiisa shaafape doomidi, Filisxeeme biittanne Gibxe zawa gakanaw de7iya kawota ubbaa haaris. 27 Kawoy Yerusalaamen biri shuchada keeletanaada ziga mithi Yihuda zumata xaphon dicciya boobbada darana mela oothis. 28 Solomoney parata Gibxefenne hara biitta ubbaafe ehisees.

29 Koyrope wursethi gakanaw Solomone taarikey nabiya Naatana taarike maxaafan, Seelo addiya nabiya Akiya maxaafaninne Nabaaxa Na7aa Iyorbaama wode gakanaw de7iya nabiya Ido qoncetha maxaafan xaafetis gidennee? 30 Solomoney Isra7eele bolla Yerusalaamen oytamu laythi kawotis. 31 Hessafe guye, Solomoney hayqidi ba mayzatan gahetis; ba aawa Dawita kataman moogetis. Iya na7ay Robi7aami iya bessan kawotis.