1 Isra7eele asa ubbay Orobi7aama kawoyanaw Seekema bida gisho ika yaa bis. 2 Nabaaxa na7ay Iyorbaami kawa Solomonepe baqatidi Gibxen de7eysi, hessa si7ida wode Gibxefe yis. 3 Isra7eele asa ubbay Iyorbaamas kiittidi xeegisin, inne shiiqida Isra7eele asa ubbay Orobi7aamako bidi, 4 “Ne aaway nuna deexo qambara toossis; shin ha77i I nuna oosisiya wolqaama oosuwanne deexo qambara nuus kawushisa; yaatiko, nu new haaretana” yaagidosona.

5 Robi7aami, “Heedzantho gallas simmidi, taako yiite” yaagis. Asay simmidi bidosona.

6 Hessafe guye, kawoy Robi7aami iya aaway Solomoney paxa de7iya wode Solomone zorida cimata, “Ha asaas woygada zaara geetii?” yaagidi entana zore oychis.

7 Cimati Orobi7aamako, “Ne ha asaas keehiko, enta ufaysikonne entaw lo77o qaala zaariko enti ubba wode new haaretana” yaagidosona.

8 Shin Robi7aami cimati zorida zoriya aggidi iyara diccidi, iyara oothiya yalagata zore oychis. 9 I entako, “Hinte tana zoriyabay aybee? ‘Ne aaway nuna toossida deexo qambara nuus kawushisa’ giya ha asaas woygada zaaro?” yaagidi oychis.

10 Iya laggeti zaaridi, “ ‘Ne aaway nuna deexo qambara toossis; shin ne nuus kawusharki’ giya asaas, ‘Ta gil7a biradhey ta aawa xeessaafe orde. 11 Ta aaway hintena deexo qambara toossis; shin ta iyape aathada deexethana. Ta aaway hintena lisson wadhis; shin ta hintena korneda dukiya lisson wadhana’ yaagada zaara” yaagidosona.

12 Kawoy, “Heedzu gallasape guye simmidi taako yiite” gidaysada Iyorbaaminne asay simmidi yidosona. 13 Kawoy Robi7aami cimati zorida zoriya aggidi entaw iita zaaro zaaris. 14 Iya laggeti zorida zoriya kaallidi, “Ta aaway hintena qambara toossis; shin taani iyape aathada deexethana. Ta aaway hintena lisson wadhis; shin taani hintena korneda dukiya lisson wadhana” yaagidi zaaris. 15 Goday Seelo addiya nabiya Akiya baggara Nabaaxa na7aa Iyorbaamas odida qaalay poletana mela Xoossafe hanida gisho kawoy asay geysa si7onna ixis.

16 Isra7eele asa ubbay kawoy enti geysa si7onna ixidaysa be7idi kawako, “Dawitape nuna gakiyabay aybee? Isseye na7aape nuuni laattanabay baawa! Isra7eele asaw, hinte soo soo biite! Dawita, neeni ne keethaa naaga!” yaagidosona. Hessa gisho, Isra7eele asay banta soo soo bidosona. 17 Shin Robi7aami Yihuda biittan de7iya Isra7eele asaa bolla kawotis.

18 Kawoy Robi7aami ba oosanchota halaqaa Adoraama Isra7eele asaako kiittis; enti iya shuchan caddidi wodhidosona. He wode kawoy Robi7aami ba para gaaren uttidi Yerusalaame baqatis. 19 He wodepe doomidi hachi gakanaw tammu Isra7eele zareti Dawita kochaafe kawotida kawota bolla makallidosona.