22
Yihuda Kawa Akaziyaasa
(1 Kawo 8:25-29; 9:21-28)
1 Arabetara yida pangati, Iyoraama bayra nayta ubbaa wodhida gisho Yerusalaame asay Iyoraama na7aa, ubbaafe kaaluwa, Akaziyaasa iya bessan kawothidosona. Hessa gisho, Iyoraama na7ay Akaziyaasi enta bolla kawo gidis. 2 Akaziyaasi kawotiya wode iyaw laythi laatamanne nam7a.*Laatamanne nam7a: Iyaw laythi laatamanne nam7a woyko oytamanne nam7a (2 Kawo 8:26 xeella). I Yerusalaamen issi laythi kawotis; iya aayiya Gotola, Zanbira na7aa na7a.
3 Akaziyaasi iitatethan baanada iya aayiya zorida gisho I Akaaba soo asaa ogiyan hemetis. 4 Iya aaway hayqidaape guye Akaaba soo asay iya zoriya gisho dhayana gakanaw Akaaba soo asaada ika Godaa sinthan iitabaa oothis. 5 Akaziyaasi Akaaba soo asaa zoriya kaallidi, Akaaba na7aa, Isra7eele kawa Iyoraamara issife Soore kawa Azaheela olanaw Galadan de7iya Raamota bis. Yan Soore asati Iyoraama caddidosona. 6 Iyoraami, Soore kawa Azaheelara oletida olan cadetida gisho paxanaw Izira7eele bis. Iyoraama na7ay, Yihuda kawoy, Akaziyaasi, cadetida Akaaba na7aa Iyoraama, oychanaw Izira7eele bis.
7 Akaziyaasi Iyoraama oychanaw bida buussaa, Xoossay Akaziyaasas hayqo gaaso oothis. Akaziyaasi Iyoraama soo gakida wode Akaaba kochaa dhaysana mela Goday doorida, Namisa na7aa Iyyu, mokanaw nam7ay keyidosona. 8 Iyyuy Akaaba kochaa bolla pirdaa poliya wode Yihuda halaqatanne Akaziyaasa maaddiya iya dabbota nayta demmidi wodhis. 9 Iyyuy Akaziyaasa koyishin Samaaren qosetidi de7iya bessaafe Iyyu asati demmidi iyako ehidi wodhidosona. “Ba kumetha wozanan Godaa koyida Iyosaafexa na7a” yaagidi moogidosona.
Hessa gisho, Akaziyaasa soo asaape kawotanaw danda7iya asi oonika attibeenna.
Gotolonne Iyo7aasa
(2 Kawo 11:1-3)
10 Akaziyaasa aayiya Gotola ba na7ay hayqidaysa si7ida wode dendada Yihuda kawa koche ubbaa dhaysasu. 11 Shin kawa Iyoraama na7iya Yosabeeta hayqanaw de7iya kawo nayta giddofe Akaziyaasa na7aa Iyo7aasa kaysada ekasu. Iyanne iya dichiyaro qol7an qosasu. Hessada oothada Gotola wodhonnaada kawa Iyoraama na7iya Akaziyaasa michiya kahiniya Yoodahe machiya Yosabeeta iya qosasu. 12 Gotola haariya wode ubban na7ay enta matan Xoossa keethan usupun laythi qosetidi de7is.