1 Laapuntha laythan Yoodahey minnidi mato halaqata Yirohaama na7aa Azaariyasa, Yihoona na7aa Yisma7eela, Obeeda na7aa Azaariyasa, Adaya na7aa Ma7iseyanne Zikira na7aa Elsafaaxa shiishidi entara caaqis. 2 Enti Yihuda ubbaa bidi yan de7iya Leewetanne Isra7eele yarata halaqata ubbaa ekidi Yerusalaame yidosona.

3 He shiiqida asa ubbay Xoossa keethan kawuwara caaqidosona. Yoodahey, “Kawa na7aa haysa be7ite! Goday kase Dawita kochaas qaala gelidaysada I kawoto. 4 Hinte oothanaw bessiyabay haysa; sambaata gallas Xoossa keethi geliya kahinetapenne Leewetape sikoy pengiya naagite. 5 Qassi sikoy kawo gadho naagite; sikoy qassi Baaso Pengiya naagite. Asa ubbay Xoossa keethaa dabaaban shiiqo. 6 Oothiya kahinetapenne Leewetape attishin, oonika Xoossa keethi gelopo. Enti geeshshi gidiya gisho gelonna; shin hara asa ubbay Godaa kiita naagishe Xoossa keethaafe karera de7o.

7 “Leeweti ola miishe banta kushen kushen oykidi kawa giddoyidi I keyiya wodenne geliya wode iyara gido. Xoossa keethi geliya oonika hayqo” yaagis.

8 Leewetinne Yihuda asa ubbay kahiney Yoodahey kiitida ubbaa oothidosona. Kahiney Yoodahey oosope keyanaw bessiya Leeweta kessidi yeddiboonna gisho, issoy issoy Sambaata gallas ooso geleysatanne oosope keyiya ba asaa ekis. 9 Kahiney Yoodahey Xoossa keethan de7iya, kawa Dawita toora, gitanne guutha gondalleta toora moconatas immis. 10 Kahiney Yoodahey asa ubbay ola miishe ba kushen kushen oykidi Xoossa keethaa dugehape pudeha gakanaw yarsho bessa mataninne Xoossa keethaa matan kawa yuushon eqanaada oothis. 11 Yoodahe kawa na7aa Iyo7aasa kare kessidi, iya huuphen kallacha wothis; kawota higge maxaafaa iyaw immidi kawoyis. Yodaaheynne iya nayti Iyo7aasa tiyidi, “Kawoy birata tuussu gido” yaagidosona.

12 Asay yexishenne kawa sabbishe ufayteysa Gotola si7ida wode asaako Xoossa keethi basu. 13 Kawoy pengen tuussa matan eqidaysa be7asu. Halaqatinne zaye punneysati kawa matan de7oosona; Yihuda asa ubbay ufaytishe zaye punnoosona; mazmure yexeysati sinthe aadhidi banta yetha miishen galatoosona. Gotola ba ma7uwa peedhada, “Haysi geellatethi! Haysi geellatethi!” yaagada waassasu.

14 Kahiney Yoodahey tora moconatako, “Gotola Xoossa keethan wodhopite; iyo salpiya giddora aathidi kare kessite; iyo ashshanaw koyiya asi de7iko wodhite!” yaagis. 15 Hessa gisho, enti iyo oykidi kawo gadho efidi Para Pengen iyo wodhidosona.

16 Kahiney Yoodahey ba huuphen, asa ubbaynne kawoy, Godaa asi gidanaw caaqidosona. 17 He wode asa ubbay Ba7aale Eeqa Keethi bidi, keethaa laallidi; yarsho bessatanne misileta tincherethidosona. Mataana geetetiya Ba7aala kahiniya yarsho bessata sinthan wodhidosona.

18 Yoodahey kahinetanne Leeweta Xoossa keetha oosuwas halaqa oothidi shuumis. Enta oosoy Muse higgiyan xaafetidaysadanne kawoy Dawiti odidaysada yarsho yarshanaysa. Qassi kawoy Dawiti odidaysada mazmure yexishe bonchanaysa. 19 Higgiyan xaafetidaysada tuna asi gelonna mela Yoodahey Xoossa keetha pengen naageysata wothis.

20 Yoodahey tora moconata, gita asata, deriya haareysatanne he biitta asa ubbaa ekidi kawa Xoossa keethafe duge ehis. Qommo bagga pengera kawo gadho gelidi kawa araata bolla utisidosona. 21 Yihuda asa ubbay ufaytis. Gotola mashshan hayqidaape guye katamay wopu gis.