1 Iyo7aasi kawotiya wode iyaw laythi laapuna; I Yerusalaamen oytamu laythi kawotis. Iya aaye sunthay Saabo; iya Barsaabe maccas. 2 Kahiney Yoodahey de7ida laytha ubban Iyo7aasi Godaa sinthan suureba oothis. 3 Yoodahey kawa Iyo7aasas nam7u macho immin enti iyaw adde naytanne macca nayta yelidosona.

4 Guutha wodepe guye Iyo7aasi Xoossa keethaa oorathanaw qopis. 5 Iyo7aasi kahinetanne Leeweta shiishidi, “Yihuda bidi hinte Xoossa keethaa laythan laythan oorathanaw Isra7eele ubbaafe miishe shiishite; hessa ha77i ellesidi oothite” yaagis. Shin Leeweti ellesidi oothibookona. 6 Hessa gisho, kawoy kahine halaqaa Yoodahe xeegidi, “Godaa aylley Museynne Yerusalaame asay Xoossa dunkaaniya oosuwas kessana mela kiitida giira Yerusalaamepenne Yihudape shiishana mela Leeweta ayis kiittabikii?” yaagis. 7 He wode iita maccase Gotola nayti Xoossa keethaa menthidosona. Enti Godaa keethan de7iya geeshsha miishe ubbaa ekidi Ba7aale goyinnanaw go7etidosona.

8 Kawoy Leeweta kiittin, enti saaxine giigisidi, Xoossa keethaa pengiyafe kare baggara wothoosona. 9 Xoossaa aylley Musey mela biittan de7ishe, Isra7eele asaape shiishana mela kiitida giira Godaas ehana mela Yihudaninne Yerusalaamen Leeweti awaajidosona. 10 Halaqatinne asa ubbay ufaytidi saaxiney kumana gakanaw giira yeggidosona. 11 Saaxiney Leeweta baggara kawo moorinnatako gakin saaxiniya giddon daro miishey dagaayetidaysa be7ida wode ubban kawo xaafeynne kahine halaqay yidi saaxiniyape miishe kessidi saaxiniya bessan zaari wothoosona. Enti ubba wode hessa oothidi daro miishe dagaayidosona.

12 He miishiya kawoynne Yoodahey Xoossa keetha oosuwa oothana mela shuumetida asatas immoosona. Enti Xoossa keethaa oorathanaw shuchu masseyisata, anaaxeta, biratanne naase birata oosanchota qaxaridosona. 13 Oosanchoti Xoossa keethaa minni oothidi kaseysada oorathidosona. 14 Xoossa keetha ooratho oosoy wurida wode palahida worqanne bira kawuwakonne Yoodaheko ehidosona. Enti he worqanne bira Xoossa keethaa gaatha oosuwas go7etiya miisheta, xuussa yarshos haniya saanetanne hara dumma dumma miisheta oothidosona.

Yoodahey de7ida laythan ubban Xoossa keethan xuussa yarshoy yashetees.

15 Yoodahey daro cimmidi hayqis; I hayqiya wode iyaw laythi xeetanne hastama. 16 Yoodahey Isra7eelen Xoossasinne Xoossa keethaas lo77oba oothida gisho Dawita kataman kawota duufon iya moogidosona.

17 Yoodahey hayqidaape guye Yihuda halaqati yidi kawa sinthan gufannidosona; kawoy enta oysha si7is. 18 Enti Godaa banta mayzata Xoossa keethaa aggidi, Asheeri misiletanne eeqata goyinnidosona. Enti qohuwa gisho Yihuda bollanne Yerusalaame bolla Godaa hanqoy wodhis. 19 Enta zaarana mela Goday nabeta entako kiittis. Nabeti entaw markatidosona; shin enti si7onna ixidosona.

20 Hessafe guye, kahiniya Yoodahe na7aa Zakariyasa bolla Xoossaa Ayyaanay wodhin Zakariyasi asaa sinthan eqidi, “Xoossay, ‘Hinte Godaa kiitaa ayis menthetii? Hessi hintew iita. Hinte Godaa aggida gisho ika hintena aggis’ ” yaagees. 21 Enti iya bolla maqetidosona. Kawoy enta kiittin, Xoossa keethaa dabaaban, iya shuchan caddidi wodhidosona. 22 Kawoy Iyo7aasi Zakariyasa aaway Yoodahey iyaw oothida keehatetha hassayonna aggidi iya na7aa Zakariyasa wodhisis. Zakariyasi hayqishe, “Goday haysa be7o; I halo keyo” yaagis.

23 Laytha laamen, Soore olanchoti Iyo7aasa olanaw yidosona. Yihudanne Yerusalaame olidi halaqata ubbaa wodhidi, di7uwa ekidi Damasqon de7iya banta kawas yeddidosona. 24 Soore olanchoti taybon guutha; shin Yihuda asay Godaa banta aawata Xoossaa aggida gisho, Goday daro gidida enta olanchota Soore olanchota kushen aathidi immis. Enti haysada oothidi Iyo7aasa bolla pirdidosona.

25 Soore olanchoti iyape shaaketiya wode Iyo7aasi daro madunxidi de7ees. Kahiniya Yoodahe na7aa suuthaa gisho iya shuumati iya bolla maqetidi, I ba hiixan zin7idashin wodhidosona. I hayqin Dawita kataman moogidosona; shin kawota duufon iya moogibookonna. 26 Iyo7aasa bolla maqetidaysati Amoone maccase Simaati na7aa Zabadanne Moo7abe maccase Simariti na7aa Yozabaata. 27 Heko, Iyo7aasa adde nayta taarikey, iyaw odetida tinbiteynne I Xoossa keethaa oorathidabay kawota taarike maxaafan xaafetidi de7ees. Iyo7aasi hayqin iya bessan iya na7ay Amasiyaasi kawotis.