1 Amasiyaasi kawotiya wode iyaw laythi laatamanne ichasha; I Yerusalaamen laatamanne uddufun laythi kawotis. Iya aaye sunthay Yo7aado; iya Yerusalaame maccas. 2 Amasiyaasi Godaa sinthan suureba oothis; gidoshin, kumetha wozanape gidenna. 3 Amasiyaasi kawotethaa minthidaape guye ba aawa wodhida asata wodhis. 4 Gidoshin, enta nayta wodhibeenna. Enta nayta wodhonna aggida gaasoy, Goday, Muse higge maxaafan kiittidaysada, “Nayti oothida nagaraa gisho aawata wodhanaw bessenna; aawati oothida nagaraa gisho nayta wodhanaw bessenna. Asi ubbay ba oothida nagaran nagaran hayqanaw bessees” yaagida gishosa.

5 Amasiyaasi Yihuda asaa shiishidi banta aawata keethan keethan shaalaqatanne mato halaqata shuumis. I laatamu laythinne iyape bolla gidida Yihuda kochatanne Biniyaame kochata ubbaa taybidi gondallenne toora oykidi olas giigida heedzu xeetu mukulu dooretida asata demmis. 6 Isra7eelepe issi xeetu mukulu mino asata heedzu mukulunne oyddu xeetu kilo giraame biran Amasiyaasi shammis. 7 Shin issi Xoossa asi iyako yidi, “Kawaw, Goday Isra7eeleranne Efreemara doonna gisho, Isra7eele olanchoti neera boopo. 8 Enti tana minthana gada ne qopiko, xoonoynne xoonetethi Xoossaba gidiya gisho Xoossay nena ne morketa sinthan kawushana. Gidoshin, ne xalaala ba; minnada oleta” yaagis.

9 Amasiyaasi Xoossa addiyako, “Taani Isra7eele olanchotas qanxida biray ubbay waananee?” yaagis.

Xoossa addey, “Goday new hessafe aathidi immanaw danda7ees” yaagis. 10 Hessa gisho, Amasiyaasi Efreemape yida olanchoti banta soo soo baana mela oothis. Enti Yihuda asaa bolla daro hanqetishe banta soo soo simmidosona.

11 Hessafe guye, Amasiyaasi bana minthidi, ba olanchota kaalethidi, Maxine zangaara bin iya olanchoti Sayrepe tammu mukulu asaa wodhidosona. 12 Hara tammu mukulu olanchota paxa di77idi, enta aafo doona efidi, aafuwan duge holin, garsan de7iya shuchan asa ubbay meqeretidi wuridosona. 13 Shin he wode Amasiyaasi baara olas boonna mela guye zaarida Isra7eele olanchoti Samaarepe Beet-Horona gakanaw de7iya Yihuda katamata olidosona. Enti Yihuda asaape heedzu mukulu wodhidi daro di7o ekidosona.

14 Amasiyaasi Edoometa wodhidi simmiya wode enta eeqata ekidi yis. Enta xoosse oothi essidi enta goyinnis; ixaane cuyisis. 15 Godaa hanqoy Amasiyaasa bolla eexin, Goday Amasiyaasako nabe kiittis. He nabey bidi, “Banta asaa ne kushepe ashshanaw danda7iboona xoossata ayis zore oychadii?” yaagis.

16 Nabey buroo oda bolla de7ishin kawoy, “Nena kawo zoriya asi oothiday oonee? Si77i ga! Ne ayis hayqanaw koyay?” yaagis.

Nabey odaa essidi, “Ne haysa oothida gishonne ta zoriya si7onna ixida gisho Xoossay nena dhaysanaw qopidaysa ha77i eras” yaagis.

17 Hessafe guye, Yihuda kawoy Amasiyaasi bana zoriya asatara zoretidi, Isra7eele kawa Iyyu na7aa na7aa, Iyo7akaaza na7aa, Iyo7aasako ase kiittidi, “Haaya; ane nam7ay olaa gahetoos” yaagidi mandis.

18 Isra7eele kawoy Iyo7aasi Yihuda kawa Amasiyaasako haysada yaagis; “Libaanosen de7iya kinchotey Libaanosen de7iya zigaako kiita yeddidi, ‘Ne na7iw ta na7aas imma’ yaagis. Shin Libaanosen de7iya issi do7i yaara aadhishe kinchotiya yedhis. 19 ‘Taani Edoome xoonas’ gada ne wozanan otoron kumadasa. Shin ha77i ne son wopu gada utta; ne bollanne Yihuda bolla metonne dhayo ehanaw ayis denthethay?” yaagidi zaaris.

20 Shin Amasiyaasi si7onna ixis. Enti Edoome xoossata goyinnida gisho Xoossay enta, enta morketa kushen aathidi immanaw koyis. 21 Hessa gisho, Isra7eele kawoy Iyo7aasi olanaw keyin inne Yihuda kawoy Amasiyaasi Yihudan de7iya Beet-Sameesan ola gahetidosona. 22 Yihuda asay xoonetidosona; Yihuda asa ubbay baqatidi banta soo soo bidosona. 23 Kawoy Iyo7aasi Akaziyaasa na7aa na7aa, Iyo7aasa na7aa, Yihuda kawa Amasiyaasa Beet-Sameesan di77idi, Yerusalaame ehis. Efreema dirsa pengiyafe bidi maazane pengiya gakanaw de7iya oyddu xeetu wadha gidiya Yerusalaame dirsa gimbiya laallis. 24 Xoossa keethan de7iya worqanne bira ubbaa, Obeed-Edoomey naagiya miishiyanne kawo gadhon de7iya miishiya ubbaa ekis; qassi oythu oothidi oykida asata ekidi Samaare simmis.

25 Iyo7akaaza na7ay, Isra7eele kawoy Iyo7aasi hayqidaape guye Iyo7aasa na7ay, Yihuda kawoy Amasiyaasi tammanne ichashu laythi de7is. 26 Amasiyaasi oothidaba ubbay koyrope wursethi gakanaw Yihuda kawotanne Isra7eele kawota taarike maxaafan xaafetidi de7ees gidennee? 27 Amasiyaasi Godaa kaalo aggidaape guye enti iya bolla Yerusalaamen maqetidosona. I Laakiso baqatis. Shin enti iya geedo ase kiittin enti iya yan wodhidosona. 28 Iya aha paran caani ehidi, Dawita kataman iya mayzatara moogidosona.