1 Hessafe guye, Yihuda asa ubbay tammanne usupun laythi gidida Ooziyana iya aawa Amasiyaasa bessan kawothidosona. 2 Iya aaway Amasiyaasi hayqidaape guye I Eloota katamaa zaari keexis.

3 Ooziyani kawotiya wode iyaw laythi tammanne usupuna; I Yerusalaamen ishatammanne nam7u laythi kawotis. Iya aaye sunthay Yikoolo; iya Yerusalaame maccas. 4 Iya aaway Amasiyaasi oothidaysada ika Godaa sinthan suureba oothis. 5 Xoossas yashshi tamaarsida Zakariyasa wode I Xoossas ammanetidi oothis. Godaa I koyida wode ubban Xoossay iya anjis.

6 Ooziyani Filisxeemetara oletanaw keyidi Gaate katamaanne iya heera, Yabina katamaanne iya heeranne Ashdooda katamaanne iya heera laallis. Yaatidi Ashdooda katamaa mataninne Filisxeeme giddon katamata keexis. 7 Xoossay Ooziyaanas Filisxeemeta, Gurbaalan de7iya Arabetanne Ma7uuneta bolla xoono immis. 8 Amooneti Ooziyaanas giiridosona. Ooziyani daro minnida gisho iya sunthay Gibxe zawa gakanaw keyis.

9 Ooziyani Maazane Pengiya matan, Zangaara Pengiya mataninne dirsaa Maazaniya matan adussa gimbe shakota essidi, Yerusalaame baasuwa minthis. 10 Iyaw zuma xaphoninne denban daro mehey de7iya gisho he bessatan adussa gimbe shakota gimbidi daro haatha ollata bookis. I goshshe dosiya gisho dere bollanne aradda biittan iyaw daro goshshanchotinne woyney tokeysati de7oosona.

11 Ooziyaanas olaw giigida daro olanchoti de7oosona. Olanchota xaafey Yi7eelinne halaqay Ma7iseyi olanchota sunthaa mazgaben xaafidosona. Enta halaqay Hanaana. 12 Banta aawata soo asaa bolla halaqatiya mino asati nam7u mukulunne usupun xeeta. 13 Kawa morketara oletidi, banta kumetha wolqan kawa maaddanaw keyiya heedzu xeetanne laapun mukulunne ichashu xeetu olanchoti enta garsan de7oosona. 14 Ooziyani olanchota ubbaas gondalle, toora, birata barneexa, tiran ma7iya xurure, dongenne yambarsha shuchu giigisis. 15 Ooziyani Yerusalaamen de7iya hiillanchoti wochiya adussa gimbe shakotanne katamaa dirsa gimbe maazaneta bolla donge dukiya miishetanne gita gita shuchata pixiridi holiya miisheta oosisis. Xoossay iya maaddin I daro minnis; iya sunthay ubba bessan keyis.

16 Shin Ooziyani minnida wode otortis; otoroy iya kundethas gathis. Ooziyani Godaa ba Xoossa ammanetona ixidi ixaane cuyisiya bessan ixaane cuyisanaw Xoossa keethi gelis. 17 Kahiney Azaariyasinne mino gidida hospun tammu Godaa kahineti iya kaallidi gelidosona. 18 Kahineti iyako, “Ooziyana, neeni Godaas ixaane cuyisanaw bessaaka. Ixaane cuyisanaw bessey, geeyidi de7iya Aarona koche gidida kahineti xalaala. Ha geeshsha bessaafe keya! Neeni Godaa Xoossa bolla nagara oothadasa; neeni iyape boncho demmaka” yaagidosona.

19 Gidoshin, ixaane cuyisanaw ba kushen ixaane cuyisiya miishe oykidi de7ishe hanqetis. Ooziyani kahineta hanqetishe Xoossa keethan ixaane cuyisiya bessaa matan kahineta sinthan eqidashin, iya som7on baro hargey bentis. 20 Kahine halaqay Azaariyasinne hara kahineti ubbay iya xeelliya wode iya som7on baro hargey bentidaysa be7idi, ellesidi iya Xoossa keethafe kessidosona. Ika Goday iya seeridaysa erida gisho ellesidi yaape keyidi bis. 21 Kawoy Ooziyani hayqana gakanaw he hargiyara de7is; Xoossa keethi gelonna mela digetis. He hargiya gaason dumma keethan barka de7is. He wode iya na7ay Iyo7atami, kawo gadho aawatethan oykidi biitta haarees.

22 Kawoy Ooziyani oothida haraba ubbaa koyrope wursethi gakanaw Amoxe na7ay, nabey Isayaasi xaafis. 23 Ooziyani hayqidi ba mayzata gakis. Asay iya, “Baro hargen oyketidaysa” yaagidi, kawota duufuwa matan moogidosona. I hayqin iya bessan iya na7ay Iyo7atami kawotis.