1 Iyo7atami kawotiya wode iyaw laythi laatamanne ichasha; I Yerusalaamen tammanne usupun laythi kawotis. Iya aaye sunthay Yarusho; iya Saadoqa na7a. 2 Iya aaway Ooziyani oothidaysada Iyo7atami Godaa sinthan suureba oothis. Iya aaway Xoossa keethi gelidaysada I gelibeenna; gidoshin, asay nagara ooso aggibeenna.

3 Iyo7atami Xoossa keethi geliya Qommo Pengiya zaaridi oothis; Yerusalaame Ofeela deriya bolla daro ooso oothis. 4 Derey dariya Yihuda biittan katamata keexis; wori dariya zumaa bolla miixanne adussa gimbe shakota gimbis.

5 Iyo7atami Amoone kawuwara oletidi xoonis. Amooneti he laythi heedzu mukulunne oyddu xeetu kilo giraame bira, tammu mukulu kuntaale gidiya gistenne tammu mukulu kuntaale gidiya banga iyaw giiridosona. Amooneti nam7antho laythinne heedzantho laythi hessada iyaw giiridosona. 6 Iyo7atami Godaa ba Xoossaa sinthan suure hemetida gisho daro minnis.

7 Iyo7atama wode oosetida oosoti, I oletida olaynne I oothidaba ubbay Isra7eele kawotanne Yihuda kawota taarike maxaafan xaafetis. 8 Iyo7atami kawotiya wode iyaw laythi laatamanne ichasha; I Yerusalaamen tammanne usupun laythi kawotis. 9 Iyo7atami hayqidi ba mayzata gakis. Enti iya Dawita kataman moogidosona. Iya bessan iya na7ay Akaazi kawotis.