1 Akaazi kawotiya wode iyaw laythi laatama; I Yerusalaamen tammanne usupun laythi kawotis. Akaazi ba mayzay Dawiti suureba oothidaysada Godaa sinthan suureba oothibeenna; 2 I kase de7ida Isra7eele kawota ogiyan hemetis. Gujidi, Ba7aale eeqa goyinnanaw misileta medhis. 3 Hinooma Zangaaran ixaane cuyisis; Goday Isra7eele asaa sinthafe gooddidi kessida asaa, ixetida ogiya kaallidi ba adde nayta taman xuuggidi eeqas yarshis. 4 Akaazi dhoqa goyinno bessatan, dere huuphenne mitha kuya garsan yarsho yarshisinne ixaane cuyisis.

5 Hessa gisho, Goday iya Xoossay iya Soore kawa kushen aathidi immis. Enti iya xoonidi, iya asaape darota di77idi, Damasqo efidosona. Qassi, Goday iya Isra7eele kawa kushen aathidi immin, kawoy iita shochi shocis. 6 Yihuda asay Godaa, banta mayzata Xoossaa aggida gisho Ramala na7ay Paaquhey Yihuda olanchotape issi xeetanne laatamu mukulu mino asata issi gallas wodhis. 7 Efreema koche gidida mino olanchoy Zikiri, kawa na7aa Ma7iseya, kawo gadho shuuma Azirqaamanne kawa kaallidi de7iya Elqaana wodhis. 8 Isra7eele asay banta dabbotape nam7u xeetu mukulu maccasa, adde naytanne macca nayta di77idosona; enti daro di7uwa ekidi Samaare bidosona.

9 Godaa nabey Odeeda geetetiya addey Samaaren de7ees. Odeedi Samaare biya olanchotara gahetanaw keyidi, “Goday, hinte aawata Xoossay Yihuda hanqetida gisho hinte kushen aathidi immis. Shin hinte enta salo gakida hanqon wodhideta. 10 Hessi gidonna ixin Yihudanne Yerusalaame maccanne addiya hinte aylle oothanaw qopeeta. Yaatin, hinte entada hanidi Godaa, hinte Xoossaa bolla nagara oothideta gideketii? 11 Ha77i ta hintew odeysa si7ite. Godaa hanqoy hinte bolla wodhida gisho hinte di77idi, qachida hinte dabbota yeddite” yaagis.

12 Hessafe guye, Efreema kochaa halaqatape Yohaanana na7ay Azaariyasi, Mashilmoota na7ay Baraki, Salooma na7ay Yiziqanne Hadilaya na7ay Amaasi olape simmidaysata bolla dendidosona. 13 Enti “He di7etida asata nuuko ehopite! Kase nuuni Godaa bolla oothida nagaraanne naaquwa bolla haraa gujeeta. Koyroka nu nagaray daro gidiya gisho Isra7eele bolla Godaa hanqoy wodhis” yaagidosona.

14 Hessa gisho, olanchoti di7etida asatanne miishiya halaqata sinthaninne de7iya sinthan immidosona. 15 Sunthay haysafe qommon xaafetida asati dendi eqidi, di7etida asaa ekidosona. Enta giddon kallo de7eysatas di7uwape ma7onne caamma immidosona. Enta muzidosonanne ushshidosona; enta madunthaa bolla zayte tiyidosona. Daaburidaysata hare togisidi enta ishatako zambi de7iya Iyaarko katama efidosona. Hessafe guye, enti Samaare simmidosona.

16 He wode kawoy Akaazi Asoore kawoy bana maaddana mela kiita yeddis. 17 Edoome asati nam7antho Yihuda bolla dendidi, daro asaa di77idi efidosona. 18 Filisxeemeti zuma xaphoninne Yihuda gadhan, Negebe mela biittan de7iya katamata olidi Beet-Sameesa, Eloona, Gaderoota, Sooko, Timina, Gimizonne enta heeran de7iya gutata oykidi yan de7idosona. 19 Yihuda kawoy Akaazi Yihuda asaa nagara oosisida gishonne Godaas ammanetibona gisho Goday Yihuda kawushis. 20 Asoore kawoy Telgeltelfelisoori Akaazako yidi iya meto bessisipe attishin, maaddibeenna. 21 Akaazi Xoossa keethafe, kawo gadhopenne halaqatape darobaa ekidi, Asoore kawas immis. Shin hessi iya aykoka maaddibeenna.

22 Kawoy Akaazi un7etida wode Godaas ammanetona ixidi meto bolla meto gujis. 23 Bana xoonida Damasqo xoossatas yarshishe, “Soore kawota xoossati enta maaddida gisho tanaka enti maaddana mela taani entaw yarshana” yaagis. Shin he xoossati iyawunne Isra7eele asaa ubbaas dhayo ehidosona. 24 Akaazi Xoossa keetha miisheta ubbaa shiishidi tincherethis. Xoossa keethaa pengeta gordis. Yerusalaamen dumma dumma bessan baw yarsho bessi keexis. 25 Akaazi hara xoossatas ixaane cuyisanaw Yihudan de7iya katamata ubban dhoqa goyinno bessata medhis. Yaatidi Godaa, ba aawata Xoossa hanqethis.

26 Heko, Akaaza woden oosetida hara oosoti koyrope wursethi gakanaw Yihuda kawotanne Isra7eele kawota taarike maxaafan xaafetis. 27 Akaazi hayqidi, ba mayzata gakis. Yerusalaame kataman iya moogidosona; shin iya Isra7eele kawota duufuwan moogibookonna. Iya bessan iya na7ay Hizqiyaasi kawotis.