1 Kawoy Hizqiyaasi ammanetethan Godaas oothidaape guye Asoore kawoy Sanakreemi Yihuda biitta bolla dendis; xoonidi baw ekanaw qopidi gimbetida katamata teqis.

2 Sanakreemi Yerusalaame olanaw yidaysa Hizqiyaasi be7ida wode, 3 katamaape karera goggiya pulto haathata teqanaw ba shuumatanne toora moconata zore oychis; enti iya maaddidosona. 4 Daro asay shiiqidi, “Asoore kawoti yidi ayis haathe demmanee?” yaagidi pultotanne goggiya haathata teqidosona.

5 Hessafe guye, Hizqiyaasi minni oothidi, laaletida dirsa gimbe ubbaa zaaridi gimbis; iya bolla adussa shako shakis. He dirsa gimbiyafe kare baggara hara dirsa gimbe gimbis. Dawita kataman de7iya Miilo geetetiya bessaa minthis; daro ola miishenne gondalle giigisis.

6 Ola halaqata asaa bolla shuumis; enta ubbaa katamaa pengiya matan de7iya dabaaban shiishidi, 7 “Minnite; gencite; nuura de7eysi entara de7eysafe aadhiya gisho Asoore kawanne iya olanchota be7idi yayyofite, dagammopite. 8 Iyara asa wolqi de7ees; shin nuura Goday nu Xoossay nuna maaddanawunne nuus oletanaw de7ees” yaagidi enta minthethis. Yihuda kawoy Hizqiyaasi odan asay minetis.

9 Hessafe guye, Asoore kawoy Sanakreemi ba olanchotara Laakiso katamaa teqidi de7ishin, Yihuda kawa Hizqiyaasakonne Yerusalaamen de7iya Yihuda asaa ubbaako ba shuumata kiittis. 10 Asoore kawoy Sanakreemi, “Teqetida Yerusalaame kataman hinte oonan ammanetidi uttidetii? 11 Hizqiyaasi, ‘Goday, nu Xoossay nuna, Asoore kawa kushepe ashshana’ yaagidi cimmidi hintena koshaninne saamon wodhanaw hanees. 12 Dhoqa goyinno bessatanne yarsho bessata diggidi, Yihudanne Yerusalaame asaa, ‘Issi yarsho bessa sinthan goyinnite; yarshuwa iya bolla xuuggite’ yaagey Hizqiyaasa gidennee?

13 “Tanne ta aawati hara kawotethata bolla oothidaba hinte ereketii? Enta xoossati banta biitta ta kushepe ashshanaw danda7idonaa? 14 Ta aawati dhaysida ha kawotethata xoossata ubbaa giddon ba asaa ta kushepe ashshanaw danda7iday oonee? Yaatin, hinte Xoossay hintena ta kushepe waati ashshanaw danda7ii? 15 Hiza Hizqiyaasi hintena balethofo woyko hessada cimmofo. Hinte Hizqiyaasa ammanopite. Iya asaa ta kushepe woyko ta aawata kushepe ashshanaw danda7ida hara biitta xoossati woyko kawotethata xoossati baawa. Yaatin, hessi hinte Xoossay hintena ta kushepe ashshanaw waanidi danda7ii?” yaagidosona.

16 Sanakreema shuumati Godaa Xoossaa bollanne iya aylliya Hizqiyaasa bolla hara darobaa haasayidosona. 17 Sanakreemi Godaa Isra7eele Xoossaa cayidi, “Sa7a bolla de7iya kawotethata xoossati banta asaa ta kushepe ashshonaysada Hizqiyaasa Xoossayka ba asaa ta kushepe ashshanaw danda7enna” yaagidi dabdaabe xaafis. 18 Sanakreema shuumati katamaa oykanaw koyidi, dirsa gimbe bolla uttida Yerusalaame asaa yashisanawunne daganthanaw banta qaala dhoqu oothidi, Ibraawetho doonan enta bolla waassidosona. 19 Asa kushen oosetida, ha sa7an de7iya hara kawotethata xoossata bolla odetidaysada Yerusalaame Xoossaa bollaka odetidosona.

20 Kawoy Hizqiyaasinne Amoxe na7ay, nabey Isayaasi hessa gisho woosan salo Xoossaako pude waassidosona. 21 Xoossay ba kiitanchuwa kiittidi Asoore olanchotanne toora moconata dhaysis. Hessa gisho, Asoore kawoy kawuyidi, ba biitta simmis; I ba Xoossa keethaa gelida wode iya nayti iya he bessan mashshan wodhidosona.

22 Hessada oothidi, Goday Hizqiyaasanne Yerusalaame asaa Asoore kawa Sanakreema kushepenne hara morketa kushepe ashshis; enta shooro biittata ubbaafe enta shempisis. 23 Daro asay Godaas imota, Yihuda kawa Hizqiyaasas al7o miishe ehidosona. He wodepe doomidi kawotetha ubbay Hizqiyaasa daro bonchidosona.

24 He wode Hizqiyaasi hargidi, hayqanaw matidi Godaa woossis. Goday woosetidi iya pathanaw malla immis. 25 Shin Hizqiyaasi otortida gisho Goday iyaw keehida keehas bessiya zaaro immibeenna. Hessa gaason, iya bolla, Yihuda bollanne Yerusalaame bolla Godaa hanqoy yis. 26 Gidoshin, wursethan Hizqiyaasi ba otoruwa aggidi Yerusalaame asatara banatetha kawushis. Hizqiyaasi kawo gididi de7iya wode Godaa hanqoy enta bolla yibeenna.

27 Hizqiyaasas daro duretethinne bonchoy de7ees. Hizqiyaasi ba bira, worqaa, al7o shuchaa, sawo, gondallenne hara al7o miishe ubbaa minjiya keethi keexis. 28 Kathaa, woyne ushshaanne zayte wothiya keethe keexis. Mehe daranne dorsinne deeshi eqiya girbe oothis. 29 Xoossay iyaw daro aqo immida gisho baw katamata keexis; daro dorsenne mehe shiishis. 30 Qommo baggan de7iya Giyoone pulto haatha zeeridi, haathay wuloha baggan de7iya Dawita katamaako duge goggana mela oothiday Hizqiyaasa. Hizqiyaasi oothidaba ubban injetida asi. 31 Shin Yihuda biittan hanida malaalsiya oosotaba oychanaw Babiloonepe kiitetida asati Hizqiyaasako yida wode Goday iya paacanawunne iya wozanan de7iyaba eranaw iya yeddi bessis.

32 Hizqiyaasi oothida harabaynne iya keehatethay Amoxe Na7aa, nabiya Isayaasa qoncetha maxaafaninne Yihudanne Isra7eele kawota taarike maxaafan xaafetis. 33 Hizqiyaasi hayqidi, ba mayzatan gahetin qommo baggara de7iya Dawita kochata duufon iya moogidosona. I hayqin, Yihuda asaynne Yerusalaame asay iya bonchidosona. Iya bessan iya na7ay Minaasey kawotis.