1 Minaasey kawotiya wode iyaw laythi tammanne nam7a; I Yerusalaamen ishatammanne ichashu laythi kawotis. 2 Goday Isra7eele asaa sinthafe gooddidi kessida asaa, ixetida ogiya kaallidi Godaa sinthan iitabaa oothis. 3 Minaasey ba aaway Hizqiyaasi laallida, dhoqa goyinno bessata zaaridi keexis. Ba7aale yarsho bessatanne Asheera geetetiya eeqa misileta medhis; salo xoolintota goyinnis; entaw gufannis. 4 Goday, “Ta sunthay merinaw Yerusalaamen daana” yaagidi wothida Xoossa keethan Minaasey hara xoossatas yarsho bessi giigisis. 5 Xoossaa keethan de7iya nam7u dabaabatan salo xoolintoti goyinnetiya yarsho bessi giigisis. 6 Hinooma Zangaaran ba adde nayta taman xuuggidi yarshis. I bitanne murunno oothis; marothis; moytillenne tuna ayyaana zore oychis. Godaa sinthan daro iitabaa oothidi Xoossaa yiloyis.

7 Ba oothida eeqa misiliya efidi Xoossa keethan essis. He Xoossa keethay, Xoossay Dawitasinne iya na7aa Solomones, “Isra7eele zare ubbaa giddofe taani doorida Xoossa keethaninne Yerusalaamen ta suntha merinaw xeegisana. 8 Muse baggara ta Isra7eele asaa kiitida kiita, higgiyanne woga ubbaa enti naagiko, taani enta mayzatas immida biittafe enta shoddike” yaagis. 9 Shin Minaasey Yihuda asaanne Yerusalaame asaa balethidi, Goday Isra7eele asaa sinthafe dhaysida hara kawotethatape aadhiya iitaa oothana mela oothis.

10 Goday Minaasesinne iya asaas odis; shin enti iya si7onna ixidosona. 11 Hessa gisho, Goday Asoore olanchota enta bolla denthis. Enti Minaase sidhen dafo aathidi oykidosona; naase birata santhalaatan qachidi, Babiloone efidosona. 12 Minaasey un7etida wode Godaa ba Xoossaa maado woossis; ba aawata Xoossaa sinthan banatetha daro kawushis. 13 Xoossay Minaase woosa si7is; Yerusalaame simmidi zaaridi kawotana mela oothis. Goday tuma Xoossi gideysa Minaasey hessan eris.

14 Hessafe guye, Minaasey Giyoone Pultuwa matan de7iya bessaafe doomidi Ofeela deriyara kanthidi Molo Penge gakanaw kare baggara hara dirsa gimbe gimbis. He gimbey Dawita Katamaape doloha baggara de7iya zangaaran de7ees. Yihuda katamata ubban toora moconata wothis.

15 Allaga xoossatanne eeqa misileta Xoossa keethaafe diggis; Xoossa keethay de7iya zuma bollanne Yerusalaamen de7iya yarsho bessata laallidi he katamaape kare kessidi yeggis. 16 Minaasey Godaa yarsho bessi oorathidi issifetetha yarshonne galata yarsho yan yarshis. Yihuda asay Godaa Isra7eele Xoossaa goyinnana mela kiittis. 17 Asay dhoqa goyinno bessatan yarsho yarsheysa aggonna ixikoka, enti yarshey Godaa banta Xoossaa xalaalasa.

18 Minaase oothida harabay, ba Xoossaa woossida woosaynne Godaa Isra7eele Xoossaa sunthan nabeti iyaw odida qaalay Isra7eele kawota taarike maxaafan xaafetis. 19 Heko, Minaase woosaynne Xoossay iyaw zaarida zaaroy, I oothida nagaraynne Minaasey bana kawushanaape sinthe oothida dhoqa goyinno bessatabay, Asheeri eeqa misiletabaynne eeqataba ubbay nabeta taarike maxaafan xaafetis. 20 Minaasey hayqidi ba mayzata gakis; iya kawo gadhon moogidosona. Iya bessan iya na7ay Amoxey kawotis.

21 Amoxey kawotiya wode iyaw laythi laatamanne nam7a; I Yerusalaamen nam7u laythi kawotis. 22 Iya aaway Minaasey oothidaysada ika Godaa sinthan iitabaa oothis. Iya aaway Minaasey goyinnida eeqata goyinnis; entaw yarshis. 23 Shin iya aaway Minaasey banatetha kawushidaysada I banatetha Godaa sinthan kawushibeenna; Amoxey guji guji nagara oothis.

24 Amoxe shuumati iya bolla maqetidi, kawo gadhon iya wodhidosona. 25 Yihuda asay kawa Amoxe bolla maqetida ubbaa wodhidi, Amoxe bessan iya na7aa Iyosyaasa kawothidosona.