1 Iyosyaasi kawotiya wode iyaw laythi hospuna; I Yerusalaamen hastamanne issi laythi kawotis. 2 Iyosyaasi Godaa sinthan suureba oothis; ushachi haddirsi goonna ba mayza Dawita ogen hemetis.

3 I kawotida hospuntho laythan buroo yooga de7ishe ba mayza Dawita Xoossaa koyis. I kawotida tammanne nam7antho laythan Yihudaninne Yerusalaamen de7iya dhoqa goyinno bessata, Asheera eeqa misileta, massidi giigisida eeqatanne seerisidi oothida misileta dhaysis. 4 Iya kiitan, Ba7aale yarsho bessata laallidosona; entafe bollara de7iya ixaane cuyisiya miisheta tinchidosona. Asheera eeqa misileta, massidi giigisida eeqatanne seerisidi oothida misileta gaaccidi dhiille kessidosona; he dhiilliya enta goyinniya asata duufon laallidosona. 5 Iyosyaasi enta kahineta meqethaa he yarsho bessata bolla xuuggis; yaatidi, Yihudanne Yerusalaame geeshshis.

6 Minaase, Efreemanne Simoona biittafe bidi Niftaaleme biitta gakanaw de7iya katamatanne laaletida bessata ubbaa hessada oothidi geeshshis. 7 Iyosyaasi yarsho bessata laallis; Asheera eeqa misiletanne hara eeqa misileta tincherethis; Isra7eelen de7iya ixaane cuyisiya bessata qanxerethis. Hessafe guye, Iyosyaasi Yerusalaame simmis.

8 Iyosyaasi kawotida tammanne hospuntho laythan biittanne Xoossa keethaa geeshidaape guye, Xoossa keethaa oorathana mela Axala na7aa Safaana, Yerusalaame katamaa haariya Ma7iseyanne Iyo7akaaza na7aa waanna xaafiya Iyo7akina kiittis.

9 Enti kahine halaqaa Kalqiyaasako bidosona. Penge naagiya Leeweti Minaasepe, Efreemape, attida Isra7eele asaa ubbaafe Yihudape, Biniyaamepenne Yerusalaamen de7iya asaape kase shiishidi Xoossa keethi ehida miishiya Kalqes immidosona. 10 Enti Xoossa keethaa oorathiya halaqatas immin enti Xoossa keethaa oorathanaadanne zaaridi keexana mela oosanchotas immidosona. 11 Yihuda kawoti laallida Xoossa keethaa loythanaw mithinne masetida shuchu shammana mela anaaxetasinne gimbeysatas miishe immidosona.

12 Asay ammanetidi oosuwa polidosona. Enta bolla shuumetida oyddu Leeweti, Maraara yaraape Yahaatanne Abdiyu, Qahaata yaraape Masulaamanne Zakariyasa. Yetha miishe ka7i eriya Leeweti ubbay, 13 wolqa ooso oothiya asata bollanne dumma dumma ooso ootheyisata bolla shuumetidosona. Qassi hara Leeweti xaafe, halaqanne penge naageysata gididosona.

14 Enti Xoossa keethaa yida miishiya kessiya wode kahiney Kalqey Goday Muse baggara immida higge maxaafaa demmis. 15 Kalqey waanna xaafiya Saafanako, “Taani Xoossa keethafe higge maxaafaa demmas” yaagis. He maxaafaa Saafanas immis.

16 Safaani maxaafaa kawako efidi, “Ne shuumati ne kiitaa ubbaa oothidosona. 17 Xoossa keethan de7iya miishiya ekidi, oosuwa kaalliya halaqatasinne oothiya asaas immidosona” yaagis. 18 Waanna xaafey Safaani kawako, “Kahiney Kalqey taw maxaafaa immis” yaagidi maxaafaa kawa sinthan nabbabis.

19 Kawoy higge qaala si7ida wode azzanidi ba ma7uwa pheedhis. 20 Kawoy, Kalqe, Safaana na7aa Akqaama, Mikiyaasa na7aa Abdoona, waanna xaafiya Saafananne kawo shuuma Asaya haysada yaagidi kiittis; 21 “Bidi ta gishonne Isra7eeleninne Yihudan attida asata gisho ha bentida maxaafan xaafetidaba Godaa oychite. Ha maxaafan xaafetida ubbaa oothanaw nu mayzati Godaa qaala naagiboonna gisho Goday nu bolla ba hanquwa gussis” yaagis.

22 Kalqeynne kawoy kiitida asati Xoossa keethan ma7o naagiya Hasira na7a, Tiquwa na7a, Selema macho gidida Hulda geetetiya nabeko bidi iyo oychidosona. Iya Yerusalaamen nam7antho kataman de7awusu.

23 Hulda entako, “Goday Isra7eele Xoossay, ‘Hintena taako kiitida uraas haysada yaagidi odite’ yaagasu. 24 Goday haysada yaagees; ‘Yihuda kawa sinthan nabbabetida maxaafan xaafetida iita baadetha ubbaa ha bessan de7iya asaa bolla ehana hanayis. 25 Enti tana aggidi hara xoossatas ixaane cuyisidosona; enti banta kushen oothidaban tana hanqethidosona. Hessa gisho, ta hanqoy ha bessan tigetana; teqetenna.’ 26 Godaa oychanaw hintena kiitida Yihuda kawako, ‘Goday Isra7eele Xoossay neeni si7ida qaalaba haysada yaagees; 27 Ha bessaaninne ha bessan de7iya asaa bolla Xoossay odetidaba neeni si7ida wode ne wozanay boshetin, ta sinthan nenatethaa kawushida gishonne ne ma7uwa peedhada ta sinthan yeekida gisho taani ne woosa si7as. 28 Heko, ta nena ne mayzata gathana; ne saro moogetana. Ta ha bessaaninne ha bessan de7iya asaa bolla ehana iitabaa ne ayfey be7enna’ yaagite” yaagasu.

Enti bidi ha qaala kawas odidosona.

29 Hessafe guye, kawoy Iyosyaasi Yihuda cimatanne Yerusalaame cimata ubbaa shiishis. 30 Kawoy Xoossa keethi keyis; Yihuda asay, Yerusalaame asay, kahinetinne Leeweti, guuthafe gita gakanaw ubbay iyara issife keyidosona. Xoossa keethan bentida caaqo maxaafa qaala ubbaa kawoy entaw nabbabis. 31 Kawoy ba bessan eqidi, Godaa ogen hemetanawunne iya higgiya, iya wogaanne iya kiitaa ba kumetha wozanaaninne ba kumetha shempuwan naaganaw, qassi ha maxaafan xaafetida caaquwa oothanaw Godaa sinthan caaqis. 32 Yerusalaameninne Biniyaamen de7iya asa ubbay eqidi caaqana mela oothis; Yerusalaamen de7iya asay Xoossaa, banta mayzata Xoossaa caaqoy geysada oothidosona.

33 Iyosyaasi Isra7eele zawan de7iya ixetidaba ubbaa diggis. Isra7eelen de7iya ubbay Godaa, banta Xoossaa goyinnana mela oothis. Iyosyaasi de7ida laytha ubban enti Godaa, banta mayzata Xoossaa kaalo aggibokona.