1 Iyosyaasi Yerusalaamen Godaa Paasika Ba7aale bonchis. Koyro ageenan tammanne oyddantho gallas Paasika dorsaa shukidosona. 2 Iyosyaasi kahineta ooson shuumidi, enta Xoossa keetha ooson minthethis. 3 Bantana Godaas dummayida, Isra7eele ubbaa tamaarsiya Leeweta haysada yaagis; “Geeshsha Taabotiya Dawita na7ay, Isra7eele kawoy Solomoney keexida Xoossa keethan wothite. Hizape guye Taabotiya hinte hashen tookanaw koshshenna. Ha77i Godaas, hinte Xoossaasinne, iya asaa Isra7eeles oothite. 4 Isra7eele kawoy Dawitinne iya na7ay Solomoney xaafidaysada hinte cugan cuganinne hinte soo asan asan hintena giigisite. 5 Leeweti hinte dabbota, Isra7eele kochata maaddanaw hinte yaran yaran Xoossa keethan eqite. 6 Goday Muse baggara odida qaala Isra7eele asay, hinte dabboti naagana mela gigisite; hinteka hintenatethaa geeshshite Paasika dorsaa shukite” yaagis.

7 Iyosyaasi he bessan de7iya asaas, Paasika yarsho gidana mela 30,000 dorsenne deeshe immis; qassi 3,000 kormata immis. He ubbaa kawoy ba shaluwape immis. 8 Kawo shuumati banta shenen asaas, kahinetasinne Leewetas yarsho mehe immidosona. Xoossa keetha halaqati Kalqey, Zakariyasinne Yi7eeli Paasika yarshos gidiya nam7u mukulunne usupun xeetu marazeta, heedzu xeetu kormata immidosona. 9 Leeweta halaqati Konaaneynne iya ishati, Shamayeynne Natina7eeli, qassi Hashabi, Yi7eelinne Yozabaati Paasika yarshos haniya ichashu mukulu marazetanne koleta, ichashu xeetu kormata immidosona.

10 Paasika Baaliyas ubbabay giigis; kawa kiitan, kahineti banta bessan bessan, Leeweti banta cugan cugan eqidosona. 11 Paasika dorsati shuketidosona; Leeweti galbaa qaaridosona; kahineti suuthaa yarsho bessa bolla dharcoosona. 12 Muse maxaafan xaafetidaysada asay Godaas yarshana mela xuussa yarshos giigida dorsata ashuwa Leeweti banta soo asan asan shaaketidi uttida Isra7eele yaratas immidosona; kormataka hessada oothidosona. 13 Leeweti wogay kiitteysada shuketida Paasika dorsaa ashuwa taman caacidosona; geeshsha yarshota xaaron, otoninne disten doysidi, Isra7eele asa ubbaas eeson shaakidi shaakidi immidosona.

14 Hessafe guye, Leeweti bantawunne Aarona koche gidida kahinetas Paasika yarsho giigisidosona. Hessa enti oothiday, kahineti xuussa yarshonne modhuwa yarshishe qamma gakanaw oothiya gishosa. 15 Dawiti, Asaafi, Hemaaninne kawa nabey Editaami kase kiittidaysada Asaafa yarati, mazmure yexeysati banta bessan de7oosona. Penge naageysati banta bessan de7oosona. Enta dabboti, Leeweti entaw giigisida gisho enti banta oosuwa aggibokona.

16 Godaas oothiya ooso ubbay, Paasika Ba7aale bonchoynne xuussa yarshoy, kawoy Iyosyaasi kiittidaysada hanidi he gallas giigis. 17 Yan shiiqida Isra7eele asay he gallas Paasika Baaliya bonchidosona; enti Uytha Ba7aale laapun gallas bonchidosona. 18 Nabiya Sameela wodiyape doomin, hessa mela Paasika Ba7aaley Isra7eelen bonchetibeenna. Iyosyaasi, kahineti, Leeweti, Yihuda asay, Isra7eele asaynne Yerusalaame asay bonchidaysada Paasika Ba7aale kase Isra7eele kawotape bonchida issoyka baawa. 19 Paasika Ba7aaley Iyosyaasi kawotida tammanne hospuntho laythan bonchetis.

20 Iyosyaasi Xoossa keethaa giigisidaape guye Gibxe kawoy Naakoy Efraxiisa shaafa matan de7iya Karkamishan oletanaw bis. Iyosyaasi iya teqanaw keyis. 21 Shin Naakoy Iyosyaasako ase kiittidi, “Yihuda kawaw, tananne nena kachiyabay aybee? Taani yiday ta morketa olanaasafe attishin, nena olanaasa gidenna. Ta morketa taani eeson olanaada Xoossay tana kiittis. Xoossay nena dhaysonaada taara de7iya Xoossara eqeteysa agga” yaagis.

22 Gidoshin, Iyosyaasi Goday Nako baggara odidaysa si7onnanne guye simmonna ixis. Ba kawo ma7uwa laammidi Magido denban oletanaw bis.

23 Dongen dukeysati kawa Iyosyaasa caddin, kawoy ba aylletako, “Taani iita cadetida gisho tana olaa giddofe kessite” yaagis. 24 Iyosyaasa para gaariyape wodhisidi, iya para gaariyan wothidi, iya Yerusalaame ehidosona. I yan hayqidi ba mayzata duufon moogetis. Yihuda asaynne Yerusalaame asa ubbay iyaw yeekidosona.

25 Nabey Ermiyaasi Iyosyaasas zelelsi kessidi xaafis. Zeleelidi yeekiya maccasaynne adde ubbay hachi gakanaw Iyosyaasas qopoosona. He zelelsay Isra7eele Yeeho zelelsa maxaafan xaafetis.

26 Iyosyaasi oothida harabay, Godaa higgen maxaafan xaafetidaysa mela I oothida lo77o oosoynne 27 koyrope wursethi gakanaw I oothida ubbay, Heko, Isra7eele kawotanne Yihuda kawota taarike maxaafan xaafetis.