1 Ta guutha eeyatetha hinte ha77ika danda7ana gada qopayis; hayyana danda7ite. 2 Xoossay hintew qopidaysada, taka hintew qopayis. Taani hintena geeshsha geela7ida issi addiya, Kiristoosas immanaw oycha wothas.

3 Shin shooshay ba geniyan Hewaanno balethidaysada ooni eri hinte wozanay iitidi Kiristoosas de7iya hinte suuretethaanne geeshshatetha aggandeti gada hirgayis.Medhe 3:1-5. 4 Issi asi yidi, nuuni hintew markatida Yesuusape hara Yesuusa hintew markatiko, woyko hinte ekida Ayyaanapenne Wongelape hara ayyaananne Wongela hintew odiko, si77i gidi ekeeta.

5 Shin taani Yesuusi kiitida “Gita hawaareta” geetetidi xeegeteysatape guuxayis gada qopike. 6 Taani oda eronna asi gidikoka, eratethi taw de7ees. Hessa ta hintew daro ogen qoncisas.

7 Taani miishe oychonna Xoossaa Wongela hintew coo odidaysinne hintena dhoqu oothada tana toochidaysi taw nagara gidii? 8 Taani hintew oothanaw hara woosa keethatape miishe bonqa ekas. 9 Ta hintera de7iya wode tana metinka hintefe issi asika waaysabike. Maqedoonepe yida ammaneysati tana koshshiyaba ubban maaddidosona. Hachi gakanaw ta hintew tooho gidabike sinthaska tooho gidike.Filphi 4:15-18. 10 Kiristoosa tumatethay tanan de7ishin, ta ceequwa Akaya biittan tana oonika diggenna. 11 Ta haysa ayis gayna? Hintena dosonna gishoyee? Taani hintena doseysa Xoossay erees.

12 “Nuka hinte mela oothoos” yaagidi ceeqiya hanko hawaareta ceequwa gaasuwa dhaysanaw ha77i ta ootheysa sinthaska oothana. 13 Haysa mela asati Kiristoosa hawaare daananaw bantana laammiya wordancho hawaaretanne cimmiya oosanchota. 14 Hessi malaalsiyaba gidenna; ayis giiko, Xalahey poo7o kiitancho daananaw bana laammees. 15 Hessa gisho, Xalahe oosanchoti xillotethaa oosanchota daananaw bantana laammiko hessi gitaba gidenna. Enti wursethan banta oosuwada ekana.

16 Oonika tana eeya gidi qoponna mela zaaradaka odayis. Ta hintew eeya daanikoka ta guuthara ceeqetana mela tana eeya oothidi ekite. 17 Taani haysada ceeqetada odetey, Goday koyeysada gidonashin, eeyatethan odayis. 18 Daro asay ha sa7aban ceeqetiya gisho, taka ceeqetana. 19 Hinte wozanaama gidiya gisho, eeya asaba ufaysan danda7eeta. 20 Oonika hintena aylleyiko woyko hintena bonqiko woyko baw maadetanaw hinteko shiiqiko woyko hinte bolla otortiko woyko hintena baqiko hinte danda7eeta. 21 Nuuni hessa oothanaw daro daaburancho gideysa yeellatashe ta odayis.

Shin oonika minnidi ceeqetiko, taka ceeqetanaw minnayis. Taani hessa eeya asada odetayis. 22 Enti Ibraawee? Taka Ibraawe. Enti Isra7eelee? Taka Isra7eele. Enti Abrahaame sheeshee? Taka Abrahaame sheeshi. 23 Enti Kiristoosa oosancho? Taani gooshsha asada odayis, entafe aadhiya Kiristoosa oosancho. Taani ooson daro daaburas; daro wode qashetas; garaafetas; daro wode hayqope attas.Hawa 16:23. 24 Ayhudeti tana hastamanne uddufuna ichashu toho garaafidosona.Zaare 25:3. 25 Heedzu toho xam7an shocetas; issi toho shuchan cadetas; markabey heedzu toho me77is; abba giddon issi qamma kumethi aqada pee7as.Hawa 16:22; 14:19. 26 Taani daro ogiya daaburan hemetas. Kixa haathafenne pangafe attas. Ayhudetinne Ayhude gidonna asay ta bolla meto gathidosona. Katamay, bazzoy, abbay, tana yashshis; ammaniya daaniya asati tana waaysidosona.Hawa 9:23; 14:15. 27 Taani ooson daaburasinne cawatas, daro toho dhisko dhayas, koshatas, saamotas, daro toho xoomas, meegetas, kallotas.

28 Haraba ubbaa taybonna ubba wode tana qofisey woosa keethatabaa. 29 Issi asi daaburiya wode iyara ta daaburabikina? Issi asi nagaran dhubetiya wode ta awude qiirotonna aggadina?

30 Ta ceeqetanaw koshshiyaba gidiko taani daaburancho gideysa erisiyaban ceeqetana. 31 Merinaw bonchetida Xoossay, nu Godaa Yesuus Kiristoosa Aaway, ta wordotonnaysa erees. 32 Damasqo kataman kawa Arisxoosape garsara haareysi tana oythanaw koyidi Damasqo katamaa pengiya naagisis.Hawa 9:23-25. 33 Shin asay tana daachon yeggidi, katamaa dirsaa maskootiyara wodhisin taani iya kushiyape attas.