1 Ceeqetethas go77i baynaysa erayis. Shin ceeqetanaw koshshiko, Godaape ekida qoncethan ceeqana. 2 Tammanne oyddu laythafe kase, Kiristoosa ammaniya issi uray heedzantho saluwa bidaysa ta erayis. He uray ashon woyko ashope karera bidaako ta erike; Xoossay erees. 3 He uray heedzantho saluwa eketidaysa erayis. Shin I ashon woyko ashope karera eketidaako ta erike; Xoossay erees. 4 He uray gannate eketidi asi qoncisanawunne asi odanaw danda7onnaba si7is. 5 Taani he addiyaban ceeqetana, shin taani ta daaburaape attishin, tanan ceeqetiyabay baawa. 6 Taani tumaa odetiya gisho, ceeqetanaw koykoka eeya gidike. Shin asi ta ootheysa be7eysafenne si7eysafe aathidi qoponna mela gada ceeqetethi aggayis.

7 Taw qoncida gita qoncethan ta otortonna mela tana waaysanaw ta ashuwan caddiya Xalahiya kiitanchoy taw imetis. 8 Ha waaysiyaba taape diggana mela taani Godaa heedzu toho woossas. 9 Shin Goday, “Ta wolqay ne daaburan qonciya gisho ta aadho keehatethay new gidana” yaagis. Kiristoosa wolqay tanan qoncana mela ta daaburan ufaytashe ceeqetayis. 10 Taani Kiristoosa gisho, daaburiya wode cayetiya wode waayetiya wode goodetiya wode metootiya wode ta daaburan ufaytayis. Ayis giiko, ta daaburiya wode, he wode minnayis.

11 Taani eeya asada ceeqetas. Hessada ta ceeqetana mela oothiday hintena. Ta, ta huuphen eretonna asi gidikoka, “Gita hawaareta” geeteteysatape guuxike. Hessa taw markatanaw bessey hintenashin. 12 Ta hinte giddon de7ashe danda7an oothida malaatatinne mallati ta tuma hawaare gideysa bessoosona. 13 Ta hintew tooho gidonaysafe attishin, hara woosa keethatape hinte aybin guuxidetii? Hessi bala gidiko tana maarite.

14 Taani hinteko baanaw giigetishin haysi taw heedzantho. Ta hintenape attishin, hintew de7iyaba koyonna gisho hintena waaysanaw koyke. Yelidaysati banta naytas shalo minjoosonape attishin, nayti bantana yelidaysatas shalo minjokona. 15 Ta hinte gisho, taw de7iyabaanne tana aatha imminka tana ufaysees. Yaatin, taani hintena hessada keeha siiqiya wode hinte tana guuthara siiqetii?

16 Gidikoka, ta hintew tooho gidike; waaysabike; shin hintena cimoninne genen oykidaba hintew daanonna aggenna. 17 Hari attoshin, ta hinteko kiitida asatape hintena cimmida asi de7ii? 18 Titoy hinteko baana mela taani woossas; qassi ammaniya ishaaka iyara yeddas. Yaatin, Titoy hintena cimmidee? Nuuni nu oosuwa issi ayyaanan oothibooko? Qassi nu hanoyka issino gidennee?

19 Nu ubba wode hinte sinthan nuna xillisanaw mootetiyaba hintew daanii? Nu Kiristoosan de7idi Xoossaa sinthan ha77i gakanaw odoos. Nu siiqo ishato, nu ha ubbaa oothey hintena dichanaasa. 20 Ta hinteko biya wode ooni eri hinte ta koyeysada hanonna, qassi taka hinte koyeysada hanonna gahetonna aggoko gada yayyayis. Qassi ooni eri hinte giddon palami, qanaatey, hanqoy, yiiqey, zigirsi, asa sunthu iisoy, otoroynne kachi doonna aggenna gada yayyayis. 21 Taani nam7antho hinteko biya wode Xoossay hinte sinthan tana kawushana gada yayyayis. Kase nagara oothidi he banta oothida tunatethaafe, laymatethafenne yeellayiya oosuwape simmiboonna asata be7ada azzanonna aggike gada yayyayis.