1 Ta hinteko bishin haysi heedzantho. Ay mootoyka nam7u woyko heedzu markan minnees.Zaare 17:6; 19:15. 2 Taani nam7antho hintera gahetida wode hinte giddon kase nagara oothida uraanne harata ubbaa seeronna aggike gada oda wothas. Ha77i ta haakada de7ikoka simmada hinteko biya wode oodeska qadhetike.

3 Tanan de7idi odey Kiristoosa gideysa hinte eranaw koyeeta. I hintera haasaya wode wolqaamape attishin, hinte giddon daaburancho gidenna. 4 Kiristoosi masqale bolla daaburan kaqetis, shin Xoossa wolqan de7on de7ees. I daaburancho gididaysada, nuka daaburancho. Shin hintena haggaazanaw Xoossaa wolqan iyara de7on daana.

5 Ammanon minnidi de7iyako hintena hintew paacidi be7ite. Paacen hinte kundonna attiko, Kiristoosi hintenan de7eysa hinte ereeta. Shin Kiristoosi hintenan doonna ixiko hinte kundeeta. 6 Nuuni paacen kundonaysa hinte ereeta gada ammanayis.

7 Hinte iitabaa oothonna mela nuuni Xoossaa woossoos. Nuuni mino gideysa asay be7ana mela gidonashin, nuuni mino gidonna ixikoka, hinte lo77o oothana mela nuuni woossoos. 8 Nuuni tumaas oothoosipe attishin, tumaara eqetiyaba aybaka oothoko. 9 Nu daaburiya wode hinte qassi minniya wode nuna ufaysees. Hinte borey baynayisata gidana mela nu hintew Xoossaa woossoos.

10 Taani hintefe haakada de7ashe xaafiday hessa gishosa. Taani hinteko biya wode Goday taw immida maatan zempada hinte bolla godatanaw koyke. Goday taw maata immiday, hintena maaddanaasafe attishin, qohanaasa gidenna.

11 Wursethan ta ishato, saro de7ite. Borey bayna de7ite; ta zoriya si7ite. Issi wozanan gididi de7ite; sarotethan de7ite. Siiqonne saro immiya Xoossay hintera gido.

12 Geeshsha yeeretethi yeeretishe, issoy issuwa sarothite. 13 Xoossaa asa ubbay hintena saro saro yaagosona.

14 Godaa Yesuus Kiristoosa aadho keehatethay, Xoossaa siiqoy, Geeshsha Ayyaana issifetethay hinte ubbaara gido.