Phawuloosi Galatiya Asaas
Xaafida Kiita
Gaatha Qofa
Galatiyan de7iya woosa keethas xaafetida kiitan, Phawuloosi tuma hawaare gideysanne iya kiitayka tuma gideysa, ba kiita nabbabiya asay akeekana mela qofisees (1:1-10). I hessa giday, issi issi asay “Phawuloosi wordo hawaare qassi iya kiitayka wordo” gidi odetiya gishosa. Phawuloosi, Ayhude gidonna asaas wongela sabbakana mela xeegetida tuma hawaare (1:18—2:10).
Oonika Yesuusa ammanida wode ooratha de7o demmis; hessa gisho, Muse higge naaganaw koshshenna. Phawuloosi, “Asi Xoossa sinthan xillanaw danda7ey ammano xalaalan” yaagidi tamaarsis. Shin Guutha Iisen, Galatiya biittan de7iya woosa keethan, “Asi Xoossa sinthan xillanaw Yesuusa ammano xalaala gidonashin, Muse higgeka naaganaw koshshees” yaagidi Phawuloosa timirtiya phalqiya asati dendidosona.
Phawuloosi Galatiya kiita xaafiday, ha wordo timirtiyan cimetida asaa tuma ammanokonne ammano de7oko zaaranaasa. Phawuloosi Yesuusa hawaare gideysa tillayidi odis. Iya hawaare oothidi xeegiday ase gidonashin, Xoosse gideysanne I kiitetiday Ayhude gidonna asas gideysa qoncisidi odis.
Merina de7o ekanaw qulpey ammano xalaala. Hessas leemiso gidey, Abrahaamey xilliday ammanonape attishin, ooson woyko higge naagon gidonaysa entaw marka oothidi immees. Ammanoy iyaw aybeko Phawuloosi odishe, “Taani Xoossas daana mela higge baggara higges hayqas. Taani Kiristoosara masqaliya bolla kaqetas. Taani hizape taw de7ike, shin Kiristoosi tanan de7ees. Taani ha77i de7iya de7uwa, tana dosidi ta gisho bana aathidi immida Xoossa Na7aa ammanada de7ayis” (2:19-20).
Maxaafa Ayfe Qofata
Gelo qofa (1:1-10)
Phawuloosi hawaaretethas dooretis (1:11-24)
Phawuloosi ba kiittas mootetees (2:1-21)
Atotethas ogey ammano xalaala (3:1—4:31)
Geeshsha Ayyaananinne siiqon de7ite (5:1—6:10)
Akeekisonne sarotho (6:11-18)
1
1 Asape woyko asa baggara gidonashin, Yesuus Kiristoosapenne iya hayqope denthida Xoossaa Aawape hawaare gidana mela kiitetida ta Phawuloosi, 2 taara de7iya ammaniya ishati ubbay, Galatiyan de7iya woosa keethatas kiitida kiitaa.
3 Xoossay nu Aawaynne nu Godaa Yesuus Kiristoosi hintew aadho keehatethaanne sarotethaa immo.
4 Ha iita wodiyape nuna ashshanaw, nu Xoossaa, nu Aawa shenen Kiristoosi nu nagara gisho bana aathidi immis. 5 Xoossaas Merinaape merinaa gakanaw bonchoy gido. Amin7i.
Tuma Wongelay issino
6 Kiristoosa aadho keehatethan hintena xeegida Xoossaa aggidi, hara Wongelako, hinte ellesidi, waanidi simmidaako tana malaalsees. 7 Hintena balethanawunne Kiristoosa wongela wobbisanaw koyiya guutha asati de7oosonape attishin, tuma Wongelay issino. 8 Shin nuna gidin woyko salo kiitancho gidin nuuni hintew koyro odida Wongelape dummatiya hara Wongela hintew odiyaba gidiko, I baadetidaba gido. 9 Haysafe sinthe nuuni gidaysada ha77ika zaarada gayis. Hinte ekida Wongelape dummatiya Wongela oonika hintew odiko he uray baadetidaba gido.
10 Yaatin, tana asi nashshana mela koyaanayee? Woyko Xoossi nashshana mela koyayna? Woyko ta ase ufaysanaw koyayna? Ta ase ufaysanaw koyaba gidiko, Kiristoosa aylle gidike.
Phawuloosa xeegetethaa
11 Ta ishato, ta hintew odida Wongelay asape gidonnaysa hinte erana mela ta koyayis. 12 Taw ha Wongela Yesuusi Kiristoosi qoncisisipe attishin, asape ekabike woyko asi tana tamaarsibeenna.
13 Ta kase Ayhude ammanon de7iya wode waana de7idaako, hinte si7ideta. Ta woosa keethaa qadhey bayna gooddanawunne dhaysanaw baaxetas.Hawa 8:3; 22:4-5; 26:9-11. 14 Ayhude ammano naagon, ta woden de7iya Ayhude ishatape aadhayis. Nu aawata wogaas aadhada mishetayis.Hawa 22:3.
15 Shin ta buroo ta aaye ulon de7ishin Xoossay tana dooris; ba aadho keehatethan tana xeegis.Hawa 9:3-6; 22:6-10; 26:13-18. 16 Ayhude gidonna asaas Wongela odana mela Xoossay ba Na7aa taw qoncisida wode ta ooderaka zorettabike. 17 Woyko taape sinthe hawaare gididaysatara gahetanaw Yerusalaame babike. Shin ta kasetada Arabe biitta bas; hessafe simmada Damasqo katamaa yas. 18 Heedzu laythafe guye, Phexroosara gahetanaw Yerusalaame bada iyara tammanne ichashu gallas uttas.Hawa 9:26-30. 19 Shin Godaa ishaa Yayqoobape attishin, hanko hawaareta be7abike.
20 Ta hintew xaafiydaysi wordo gidonnaysa Xoossaa sinthan hintew qoncisayis.
21 Hessafe guye, taani Soore biittanne Kilqiya biitta bas. 22 Yihudan de7iya woosa keethaa asay tana be7idi eribookona. 23 Shin enti, “Kase nuna gooddiya uray, ha77i he I dhaysanaw koyiya ammanuwaba sabbakees” yaageysa si7idosona. 24 Si7ida ubbay ta gaason Xoossaa galatidosona.