1 Akaabas Samaare kataman laapun tammu adde nayti de7oosona. Iyyuy Samaare katama halaqatas, cimatasinne Akaaba kochata dicheysatas haysada yaagidi dabdaabe xaafis. 2 “Hiza hinte godaa kochati, parati, para gaareti, yuushoy gimbetida katamatinne ola miisheti hintew de7iya gisho, ha dabdaabey hintena gakida mela, 3 hinte godaa naytape lo77o gididaysa dooridi, iya aawa araatan utisite; hinte godaa keethaas oletite” yaagis.

4 Shin enti daro yayyidi, “Heko, nam7u kawoti iya sinthan eqanaw danda7ibookona, shin nuuni waanidi eqanee?” yaagidosona. 5 Hessa gisho, kawo gadho aawatethan ayseysi, katama halaqay, cimatinne Akaaba kochata dicheysati, Iyyuko haysada yaagidi kiittidosona; “Nuuni ne aylleta; neeni giyaba ubbaa nuuni oothana. Nu bolla oonaka kawoyoko. Nena lo77idaba aybaka ootha” yaagidi kiittidosona.

6 Iyyuy entaw nam7antho dabdaabe xaafishe, “Hinte ta bagga gididi, taw kiitetanaw giigidaba gidiko, hinte godaa nayta qoodhiya muucite; enta guuggiya ekidi, wonto hannoode Izra7eele yiite” yaagis. Laapun tammu kawa kochati bantana dichiya, kataman eretida asatara de7oosona. 7 He kawa kochata dichiya asatako dabdaabey gakida wode, laapun tammu kawa kochata wodhidosona. Enta qoodhiya muucidi, enta guuggiya keeshen ekidi, Izra7eelan de7iya Iyyus yeddidosona.

8 Kiitetida asay, “Enti kawa kochata guuggiya ekidi yidosona” yaagidi Iyyus odidosona.

Iyyuy, “Wonto wonta gakanaw, katama geliya pengiyan enta nam7u bessan dooridi wothite” yaagidi kiittis.

9 Wontetha gallas wonta Iyyuy kare keyidi, asa ubbaa sinthan eqidi, “Hinte xillo; Heko, ta godaa bolla maqetada wodhiday tana. Shin haysata ubbaa wodhiday oonee? 10 Goday Akaaba kochata bolla odida qaalape issoyka sa7an wodhonnaysa hinte erite. Goday ba aylliya Eeliyaasa baggara odidaba polis” yaagis. 11 Hessa gisho, Iyyuy Izra7eelan attida Akaaba kochata, iya gita asata, iya laggetanne iya kahineta ubbaa, issoyka attonna wodhis.Hose 1:4.

12 Hessafe guye, Iyyuy dendidi, Samaare bidi Henthanchota Moothu gakidi, 13 Yihuda kawa Akaziyaasa dabbotara gahetidi, “Hinte oonee?” yaagidi oychis.

Enti, “Nuuni Akaziyaasa dabbota; kawa kochatanne kawe Elzabeeli nayta sarothanaw boos” yaagidosona.

14 Iyyuy ba asata, “Enta paxa oykite” yaagidi kiittin, enta paxa oykidi, henthanchota moothan de7iya haatha olla matan enta oytamanne nam7ata wodhidosona; I entafe issuwaka ashshibeenna.

15 Iyyuy he bessaafe dendidi, Rakaaba na7aa Iyonadaabara gahetidi, iya sarothidi, “Ta qofaynne ne qofay issino. Neeni ta bagga gidanee?” yaagis.

Iyyonadaabi, “Ee gidana” yaagidi zaaris.

I “Ane ta kushiya oyka” yaagis. Iya kushiya oykin pude gaariya bolla kessis. 16 “Taara yedha; taani Godaas waanada mishetiyako be7a” yaagis; iya ba gaariya bolla utisis. 17 Iyyuy Samaare yida wode, Akaaba kochaafe attida ubbaa wodhis; Goday Eeliyaasas odida qaalada enta dhaysis.

18 Hessafe guye, Iyyuy asa ubbaa issife shiishidi, “Akaabi Ba7aale eeqa guuthara goyinnis; shin taani iyape daro goyinnana. 19 Ha77i Ba7aale nabeta, iya goyinneyisata, iya kahineta ubbaa xeegidi shiishite. Entafe issi asika paconnaada naagite. Taani Ba7aale eeqas daro yarsho yarshana hanayis. He bessaa yoonna asi paxa attenna” yaagis. Shin Iyyuy Ba7aale eeqa goyinneyisata cimmidi dhaysanaw hessa oothis.

20 Iyyuy, “Ba7aale eeqa goyinnana gallasaa awaajite” yaagin, enti awaajidosona. 21 Hessafe guye, Iyyuy Isra7eele biitta ubbaa kiittin, Ba7aale eeqa goyinneysatape issi asika attonna ubbay yidosona. Ubbay Ba7aale eeqa keetha gaxape gaxa gakanaw qilxi gidi kumis.

22 Iyyuy, ma7o keethaa naagiya addiyako, “Ba7aale goyinneyisata ubbaas ma7o kessa” yaagis. Addey entaw ma7o ehis.

23 Hessafe guye, “Iyyuynne Rakaaba na7ay Iyyonadaabi Ba7aale eeqa keetha gelidosona. Iyyuy, Ba7aale eeqa goyinneysatape attishin, Godaa aylletape issi asika hinte giddon doonnaada xeellite” yaagis. 24 Hessafe guye, enti xuussa yarshotanne hara yarshota yarshanaw giddo gelidosona.

Iyyuy Ba7aale eeqa keethaafe karera hospun tammu asata giigisidi wothis. Entako, “Hintefe issi addey taani hinte kushen immiya asaape issuwa yeddiko, iya shempoy he addiya shempuwa bessan gelana” yaagis.

25 Iyyuy xuussa yarshuwa polidaape guye, naageysatanne halaqata, “Giddo gelidi, enta wodhite. Entafe issi asika kessi ekonna mela” yaagidi kiittin, enta mashshan wursidosona. Enta aha kare goochidi kessidosona; Ba7aale eeqa keetha qol7a gelidosona. 26 Ba7aale eeqa keethaafe eeqa tuussata kessidi xuuggidosona. 27 Ba7aale eeqa shuchata tincherethidosona; Ba7aale eeqa keethaaka laallidosona. He bessaa sheesha keethi kessidosona; hachi gakanaw he bessay sheesha keethi gididi attis.

28 Hessada oothidi, Iyyuy Ba7aale eeqa Isra7eelepe dhaysis. 29 Gidoshin, Nabaaxa na7ay Iyorbaami Isra7eele asaa oosisida nagara ooso aggibeenna. Beeteleninne Daanen Iyorbaami essida worqa mara misileta goyinnis.1 Kawo 12:28-30.

30 Goday Iyyuko, “Neeni ta sinthan suureba oothida gishonne ta qofan de7iyaba ubbaa neeni Akaaba kochata bolla polida gisho, ne kochati oyddantho yeleta gakanaw, Isra7eele araatan uttana” yaagis. 31 Iyyuy Godaa Isra7eele Xoossaa higgiya ba kumetha wozanaape minthidi naagibeenna; qassi Isra7eele asaa nagara oosisida Iyorbaama nagaraape haakibeenna.

32 He wode Goday Isra7eele biittafe baggaa shaako doomis. Araame kawoy Azaheeli Isra7eele biittafe daro bessata xoonidi oykis. 33 Yordaanose Shaafape doloha baggara de7iya Galadanne Baasane biitta ubbaa oykis. He biittay Arnoona Shaafa matan de7iya Aro7eera katamaape doomidi, Robeela biitta, Gaade biittanne Minaase biitta gakees.

34 Iyyuy hanida harabay, oothidaba ubbaynne iya minotethay ubbay Isra7eele Kawota Taarike Maxaafan xaafetis. 35 Hessafe guye, Iyyuy hayqidi, ba mayzatan gahetis; I Samaaren moogetis. Iya bessan iya na7ay Iyo7akaazi kawotis. 36 Iyyuy Samaaren uttidi Isra7eele bolla laatamanne hospun laythi kawotis.