1 Akaziyaasa aayiya Gotola ba na7ay hayqidaysa be7ida wode, dendada kawa kocha ubbaa dhaysasu. 2 Shin kawa Iyoraama na7iya, Akaziyaasa michiya Yosabeeta, hayqanaw de7iya kawa nayta giddofe Akaziyaasa na7aa Iyo7aasa kaysada ekasu. Iyanne iya dichiyaro efada keethan qosada, Gotolo wodhonnaada ashshasu. 3 Gotola biitta haariya wode ubban, na7ay Yosabeeti matan, Xoossa keethan usupun laythi qosetidi de7is.

4 Laapuntha laythan Yoodahey kawa naageysatanne kawo gadho naageysata halaqatas kiittidi, baako Xoossa keethi ehis. Entara caaqidi, enta Xoossa keethan caaqisis; enta kawa na7aa Iyo7aasa bessis. 5 I enta, “Hinte oothanabay haysa; Sambaatan naaganaw geliya maaray gakida hinte heedzu cugaape issi cugaa kawa keethaa naago. 6 Issi cugay Suura pengiya naago; issi cugaa naageysatape guye baggara de7iya pengiya naago. 7 Sambaata galas naagope keyiya hanko nam7u cugay kumethi kawa bolla metoy gakonna mela Xoossa keetha naago. 8 Ola miishe oykidi, kawa giddon wothidi, kawoy keyiya wodenne geliya wode ubban iyara issife de7o. Hinteko shiiqiya oonaka wodhite” yaagis.

9 He halaqati, kahiney Yoodahe kiittidaba ubbaa oothidosona. Enti ubbay Sambaata gallasan naago maaray gakidaysatanne naaguwa maara polidaysata ekidi, kahiniya Yoodaheko yidosona. 10 Kahiney Xoossa keethan de7iya, beni kawa Dawita gondalletanne toorata ubbaa halaqatas immis. 11 Naageysati issoy issoy ola miisheta banta kushen oykidi, Xoossa keethaafe haddirsa baggafe doomidi, ushacha bagga gakanaw, yarsho bessa mataninne Xoossa keetha matan kawa yuushuwan eqidosona. 12 Yoodahey kawa na7aa kare kessidi, iya huuphen kallacha wothis. Higge Maxaafaa iyaw immidi, tiyidi, iya kawothis. Asay kushe baqidi, ba qaala dhoqu oothidi, “Kawoy birata tuussu gido!” yaagis.

13 Kawiya Gotola naageysata wocamaanne asaa wocamaa si7ida wode, asaako Xoossa keethi basu. 14 Kawoy kase kawoti haneysada tuussa matan eqidysa be7asu. Halaqatinne moyze punneysati kawa matan de7oosona. He biitta asa ubbay ufaytidi, moyze punnin, Gotola ba ma7uwa daakada, “Heko, haysi makalla! Haysi makalla!” yaagada waassasu.2 Kawo 23:3.

15 Kahiney Yoodahey tora moconatako, “Gotola Xoossa keethan wodhopite! Iipe yaaranne haara salpida salpeta giddon wothite; iyo ashshanaw qopiya asi de7iko wodhite!” yaagis. 16 Enti iyo oykidi, kawo gadho efidi, Para Pengiyan iyo wodhidosona.

17 Asay Godaa asi gidana mela, kawoy Yodaaheynne asay Godaara caaqana mela oothis. Qassi kawuwapenne asaape gidduwan caaqisis. 18 He wode Yihuda asa ubbay Ba7aale eeqa keethi bidi, he keethaa laallis; yarsho bessatanne iya misileta tincherethis. Ba7aale eeqa kahiniya Mataana yarsho bessata sinthan wodhidosona.

Hessafe guye, kahiniya Yoodahey Xoossa keethan naageysata wothis. 19 Baara toora moconata, kawa naageysata, kawo gadho naageysatanne Yihuda asa ubbaa ekin, enti kawa Xoossa keethafe duge ehis. Naageyisata Pengiya baggara kawo keethi issife gelidi, kawoy ba araatan uttis. 20 Yihuda asa ubbay ufaytidosona; Gotola kawo gadhon mashshan hayqidaape guye katamay wopu gis.

21 Iyo7aasi kawotiya wode laapun laytha na7a.