1 Ramala na7ay Paaquhey kawotida tammanne laapuntho laythan, Iyo7atama na7ay Akaazi Yihudan kawotis. 2 I kawotiya wode laythi iyaw laatama; Yerusalaamen tammanne usupun laythi kawotis. Iya mayzay Dawita suureba oothidaysada, Godaa ba Xoossaa sinthan suureba oothibeenna. 3 I kase de7ida Isra7eele kawota ogiyan hemetis. Qassi Goday Isra7eele asa sinthafe gooddidi kessida asata wogaa, ixetida ogiya kaallidi, ba adde na7aa tamara aathidi yarshis.Zaare 12:31; 18:10. 4 Akaazi dhoqa goyinno bessatan, zumata bollanne daashsha mithata ubbaa garsan yarsho yarshis; ixaane cuyisis.

5 Hessafe guye, Araame kawoy Ra7asooninne Ramala na7ay, Isra7eele kawoy Paaquhey Yerusalaame olanaw yidi teqidosona; shin Akaaza xoonanaw danda7ibookona.Isa 7:1. 6 He wode Araame kawoy Ra7asooni Elata katama zaari ekidi, Yihuda asa gooddidi kessis. Yaatin Edoome asati Elata katama yidi, hachi gakanaw yan de7oosona.

7 Hessa gisho, Akaazi Asoore kawa Telgeltelfelisoorako kiita yeddidi, “Taani ne na7anne ne aylle. Hayyana haaya; tana oliya Araame kawa kushepenne Isra7eele kawa kushepe ashsha” yaagis. 8 Qassi Akaazi Xoossa keethaanne kawo gadhon shalo minjiya bessan de7iya biraanne worqaa ekidi, Asoore kawas imota oothidi yeddis. 9 Akaaza oysha ekidi, Asoore kawoy Damasqo katama oli oykidi, asaa di77idi, Qiira efis; kawa Ra7asoonaka wodhis.

10 Kawoy Akaazi Asoore kawa Telgeltelfelisoorara gahetanaw Damasqo bis. Damasqon de7iya yarsho bessa be7idi, iya daaniya yarsho bessi keexana mela, he yarsho bessa misiliyanne keexiya hanota kahiniya Uraya kiittis. 11 Kawoy Akaazi Damasqofe simmidi yaanas, kahiney Urayi iya daaniya yarsho bessi giigisis.

12 Kawoy Damasqofe simmida wode, yarsho bessay oosetidi poletidaysa be7idi, yarsho bessaako shiiqidi, 13 xuussa yarshonne katha yarsho yarshis. Qassi ushsha yarshuwa gussis; issifetetha yarsho suuthaaka yarsho bessa bolla dharcis. 14 Naase biratape oosetidi, Godaas dummatidi uttida yarsho bessay, ooratha yarsho bessaafenne Xoossa keethaafe giddon de7ees. Akaazi he gal7a yarsho bessa denthidi, ba oosisida ooratha yarsho bessaafe pudeha baggan wothis.Kessa 27:1-2; 2 Taari 4:1.

15 Kawoy Akaazi kahiniya Uraya haysada yaagidi kiittis; “Ha gita yarsho bessan wonta xuussa yarsho, omarsi shiishiya katha yarsho, kawoy shiishiya xuussa yarshonne katha yarsho, asa ubbay shiishiya xuussa yarsho, katha yarshuwanne ushsha yarshuwa yarsho bessan shiisha. Naasepe oosetida hanko yarsho bessa taani taw oychiya bessi oothana” yaagis. 16 Urayi kawoy Akaazi kiittidaysada oothis.

17 Kawoy Akaazi Xoossa keetha giddon go7etiya, naase biratape oosetida gaareta loche birata qanxidi, miyepe diggidi meecetiya kereta gaareta bollafe denthis. Qassi gita kereta, iya zempisida naase birata boora misileta bollafe denthidi, shucha baasuwa bolla wothis.1 Kawo 7:23-39; 2 Taari 4:2-6. 18 Asoore kawa gisho, Akaazi Sambaata gallas Xoossa keetha giddon kawa araatay micetiya dhoqu gida bessaanne kawoy Xoossa keethi geliya kare ogiya gordidi, yuuyi aadhidi gelana mela oothis.

19 Kawoy Akaazi hanida harabaynne I oothidaba ubbay Yihuda Kawota Taarike Maxaafan xaafetis. 20 Akaazi hayqidi, ba mayzatan gahetis; Dawita Kataman ba mayzatara moogetis; iya bessan iya na7ay Hizqiyaasi kawotis.Isa 14:28.