1 Yihuda kawoy Akaazi kawotida tammanne nam7antho laythan, Ela na7ay Hosey Isra7eele bolla Samaaren kawotis; I uddufun laythi kawotis. 2 I, Godaa sinthan iitabaa oothis; gidikoka, iyape kase de7ida Isra7eele kawoti oothidaysa mela iitabaa oothibeenna.

3 Asoore kawoy Salminasoori yidi, iyara ola gahetin, Hosey xoonetidi, iyaw giiris. 4 Shin guutha laythafe guye, kawoy Hosey, Gibxe kawa Segoras kiita yeddidi, bana maaddana mela oychis. Kaseysada Asoore kawas giira immeysa aggaagis. Kawoy Salminasoori hessa si7ida wode iya oythidi, qasho keethi gelsis.

5 Asoore kawoy Isra7eele biitta ubbaa bolla dendidi, heedzu laythi gakanaw Samaare katama teqis. 6 Hosey kawotida uddufuntho laythan Asoore kawoy Samaare katama oykis; Isra7eele asaa ekidi, Asoore biitta efis. Entafe baggaa Alahaninne Abooran, baggaa qassi Gozaana shaafa matan, attidaysata Meedona katamatan wothis.

7 Haysi ubbay haniday, Isra7eele asay Godaa banta Xoossaa bolla, enta Gibxefe, Gibxe kawa kushepe kessidaysa bolla nagara oothida gishosa. Qassi enti hara xoossatas goyinnidi, 8 Goday enta sinthafe gooddidi kessida hara kawotethata wogaa kaallida gishosa. Hessa bolla qassi Isra7eele kawoti doomida iita wogaa kaallida gishosa. 9 Isra7eele asay Godaa banta Xoossaa bolla geeman iitabaa oothidosona; guutha moothafe bidi, gita katama gakanaw de7iya bessa ubban bantaw dhoqa goyinno bessata medhidosona. 10 Qassi enti eeqa shuchatanne Asheera geetetiya xoosse misileta zuma huuphe ubbaaninne daashsha mitha ubbaa garsan essidosona. 11 Goday beni enta sinthafe gooddidi kessida allaga asay oothidaysada, dhoqa bessa ubban ixaane cuyisidosona. Enti iitabaa oothidi Godaa hanqethidosona. 12 Goday enta, “Goyinnofite” yaagida eeqa goyinnidosona. 13 Goday Isra7eele asaanne Yihuda asaa ba nabeta baggaranne qoncethi be7iya ubbaa baggara, “Hinte iita ogiyape simmite; taani nabeta, ta aylleta baggara, hinte aawati kiitetanaada immida higgiyan xaafetida wogaanne awaajuwa naagite” yaagis. 14 Shin enti si7onna ixidosona. Godaa banta Xoossaa ammanetibona banta aawatada morge minthidosona. 15 Enti iya wogaa, I enta aawatara caaqida caaquwanne iya naagisuwa kadhidosona. Enti laafa eeqata goyinnidi, banta huuphenka laafa gididosona.

Goday enta, “Hinte yuushuwan de7iya allaga asay ootheysada oothopite” yaagida kiitaa ixidi, enta de7uwa wogaa kaallidosona. 16 Godaa banta Xoossaa kiita ubbaa aggaagidosona. Mari daaniya, nam7u goyinno misiletanne Asheera geetetiya eeqe misiliya medhidosona. Salon de7iya xoolinto ubbaa goyinnidosonanne Ba7aale eeqa haggaazidosona. 17 Enti banta adde naytanne macca nayta tama giddora aathidosona. Marotanne moytille xeegeyisata zore oychidosona. Hessa mela iitabaa oothanaw bantana bayzidi, Godaa hanqethidosona. 18 Hessa gisho, Goday Isra7eele bolla hanqetidi enta ba sinthafe diggin, Yihuda kochaa xalaali attis.

19 Qassi Yihuda asayka, Godaa banta Xoossaa kiita naagibookona; enti Isra7eele asaa wogaa kaallidosona. 20 Hessa gaason, Goday Isra7eele kochata ubbaa aggaagis. I enta un7ethidi, ba sinthafe diggana gakanaw, bonqiya asaa kushen yeggis.

21 Goday Isra7eele asaa Dawita kochaa kawotethaafe beni shaakida wode, Isra7eele asay Nabaaxa na7aa Iyorbaama bantaw kawothidosona. Hessafe guye, Isra7eele asay Godaa kaallonnaada Iyorbaami diggis; I enta gita nagara oosisis. 22 Isra7eele asay Iyorbaami oothida nagaraa ubbaa oothidosona; iyape simmibokona. 23 Goday nabeta, ba aylleta ubbaa baggara kase odidaysada enta ba sinthafe diggis. Isra7eele asay banta yeletida biittafe di7etidi, Asoore biitta bidi, hachi gakanaw yan de7idosona.

24 Asoore kawoy Babiloone biittan de7iya Kuuta, Awaana, Hamaatanne Safarwayma katamatan de7iya asa ehidi, Isra7eele asaa bessan, Samaare katamatan wothis. Enti he katamata oykidi, yan de7idosona.

25 Enti koyro yan duussu doomida wode, Godaa goyinnibookona. Hessa gaason, Goday enta giddo gaammota yeddin, gaammoti enta giddofe baggata mentherethidi wodhidosona. 26 Yaatin, Asoore kawas, “Neeni ehada Samaare katamatan wothida asay, ha biitta xoossaa wogaa erokona. Heko, yaatin, enta mentherethi wodhiya gaammota enta bolla yeddis” yaagidi odidosona.

27 Asoore kawoy, “Hinte Samaarepe di77idi ehida kahinetape issuwa zaaridi, yaa yeddite. I yaa bidi, he biitta xoossaa wogaa enta tamaarso” yaagidi kiittis. 28 Hessa gisho, Samaarepe di77idi ehida kahinetape issoy Beetelen daanaw yidi, Godaa goyinno wogaa enta tamaarsis.

29 Gidoshin, Samaaren uttida asay bantaw bantaw goyinniya eeqa misileta ba de7iya bessan bessan medhidosona. Enti de7iya katamatan, kase bantaw keexida dhoqa goyinno bessatan efidi wothidosona. 30 Hessada oothidi, Babiloone asay Sukot-Banooba geetetiya eeqa misileta medhidosona. Kuuta asay Argaala geetetiya eeqa misileta medhidosona. Hamaata asay Ismaata geetetiya eeqa misileta medhidosona. 31 Awaawa asay Albazaranne Tartaqa geetetiya eeqa misileta medhidosona. Safarwayma asay qassi Adramelekinne Anameleka geetetiya banta xoossatas banta nayta taman xuuggidi yarshidosona. 32 Enti Godaa goyinnidosona; shin banta giddofe dumma dumma asaa dooridi, dhoqa goyinno bessatan kahine oothidi shuumidosona. 33 Enti Godaa goyinnidosona; gidikoka, banta yida biitta biitta asaa meeziya kaallidi, banta xoossataka goyinnidosona. 34 Enti hachi gakanaw kase meezetidaysada oothosona.Medhe 32:28; 35:10.

Enti tuma Godaa goyinnokona woyko Goday Isra7eele gidi sunthida Yayqooba zerethaas immida awaajuwanne wogaa, higgiyanne kiitaa naagokona. 35 Goday Isra7eele asaara beni caaqida wode, enta haysada yaagidi kiittis; “Hara xoossata goyinnofite; entaw gulbatopite; entaw oothopite woyko entaw yarshofite.Kessa 20:5; Zaare 5:9. 36 Shin Gibxefe hintena ba gita wolqaaninne ba micetida kushen kessida Godaas oothite; iyaw gulbatite; iyaw yarsho yarshite.Zaare 6:13. 37 Goday hintew xaafida awaajuwanne wogaa, higgiyanne kiitaa ubba wode naagite; hara xoossata goyinnofite. 38 Taani hintera caaqida caaquwa dogopite; hara xoossata goyinnofite. 39 Hessa aggidi, Godaa hinte Xoossaa goyinnite. Hinte morketa ubbaafe hintena ashshanay tana” yaagidi kiittis. 40 Shin enti iyaw ero goonna ixidi, kase banta meeziya kaallidosona. 41 He asati Godaa goyinnisheka, issi baggara banta eeqa misileta goyinnoosona. Hachi gakanaw enta kochay enta aawati goyinneysada goyinnishe de7oosona.