1 Ela na7ay Hosey Isra7eelen kawotida heedzantho laythan, Yihuda kawa Akaaza na7ay Hizqiyaasi Yihudan kawotis. 2 I kawotiya wode laythi iyaw laatamanne ichasha; Yerusalaamen laatamanne uddufun laythi kawotis. Iya aaye sunthay Abiya geetetees; iya Zakaryaasa na7iw. 3 Iya mayzay Dawiti oothidaysada, Hizqiyaasi Godaa sinthan suureba oothis. 4 Asay dhoqa goyinno bessata diggis. Eeqa tuussata mentherethis. Asheera geetetiya xoosse misiliya qanxi yeggis. Qassi Musey naase biratape medhida, Nahushitana geetetiya shoosha misiliya mentherethis. He wodey gakanaw Isra7eele asay iyaw ixaane cuyisishe gam7is.

5 Hizqiyaasi Godaa Isra7eele Xoossaa ammanis; Yihuda kawota ubbaa giddon iya mela kawoy iyape kase gidin, iyape guye gidin bentibeenna. 6 I Godaara oyketis; Godaa kaalo aggibeenna; Goday Muse kiitida kiitata naagis. 7 Goday iyara gidis; I oothiyaba ubbay iyaw injetis. I Asoore kawa bolla makallidi, iyaw haaretonna ixis. 8 I, Filisxeeme asaa olidi guutha moothatape bidi, gita katama gakanaw, Gaazanne iya yuushon de7iya biittati attonna enti de7iya bessata ubbaa xoonis.

9 Kawoy Hizqiyaasi kawotida oyddantho laythan, Ela na7ay Isra7eele kawoy, Hosey kawotida laapuntho laythan, Asoore kawoy Salminasoori Isra7eele bolla dendidi, Samaare katamaa teqis. 10 Heedzantho laythi Samaare katama xoonis. Yaatin, Hizqiyaasi kawotida usupuntho laythan, Isra7eele kawoy Hosey kawotida uddufuntho laythan, Samaare katamay xoonetis. 11 Asoore kawoy Isra7eele asaa Asoore biitta efidi, entafe baggaa Alahaninne Aboora katamatan, baggaa Agooza shaafa matan baggaa qassi Meedona katamatan wothis. 12 Hessika enti Godaas banta Xoossaas kiitetonna ixidi, Godaa caaquwa, Godaa aylley, Musey kiitida kiita ubbaa menthida gishosa. Enti iya kiita si7anawunne kiitetanaw koybookona.

13 Kawoy Hizqiyaasi kawotida tammanne oyddantho laythan, Asoore kawoy Sanakreemi gimbetida Yihuda katamata ubbaa olidi oykis. 14 Yaatin, Yihuda kawoy Hizqiyaasi Laakiso kataman de7iya Asoore kawa Sanakreemas kiitaa yeddidi, “Taani balas; hayyana ta biitta yeddada keya. Neeni tana oychidaba aybaka ta new immana” yaagis.

Asoore kawoy, Yihuda kawa Hizqiyaasako, “Neeni 10,000 kilo giraame biranne 1,000 kilo giraame worqa taw yedda” yaagis. 15 Hizqiyaasi Xoossa keethan, kawo gadhon shalo minjiya bessan de7iya bira ubbaa iyaw yeddis. 16 He wode Yihuda kawoy Hizqiyaasi, Xoossa keetha pengiya sanqata tiyida worqanne I ba huuphen penge tuuqeta tiyida worqaa qaaridi, Asoore kawas yeddis.

17 Asoore kawoy, Tartana, Rafeesanne Rasfaqisa geetetiya heedzu toora moconata, daro olanchotara Laakiso katamaape kawa Hizqiyaasako Yerusalaame yeddis. Enti bidi, Yerusalaame gakidi, Ma7o Meecciya addiya gade efiya ogiyape qommo baggara de7iya, dagatida haathay goggiya zara lanqen eqidosona. 18 Enti kawa xeegin, kawo gadho aawatethan aysiya Kalqe na7ay Eliyaqeemi, waanna xaafey Saminasinne Asaafa na7ay taarike xaafey Yo7aasi iyako kare keyidosona.

19 Asooreta halaqay, “Hizqiyaasas haysada yaagidi odite. Asoore kawoy, wolqaamay nena haysada yaagees; ‘Neeni aybin ammanetadii? 20 Olaa oletanaw new cincatethinne wolqi de7ees yaagasa. Shin neeni aybin ammanetada ta bolla haysa makalladii? 21 Heko, neeni Gibxe kawoy maaddana gada qopiyaba gidiko, meqida mayre xam7an katiya asa mela. Xam7ay meqin, pincoy kushe caddesinne madunxisees. Gibxe kawoy banan ammanetiya asa ubbaas hessa mela’ ” yaagis.

22 Shin neeni, “Nuuni Godan nu Xoossan ammanetoos” yaagiko, Hizqiyaasi, Yihuda asaanne Yerusalaame asaa, “Hinte Yerusalaamen de7iya yarsho bessan goyinnanaw koshshees” gidi, dhoqa goyinno bessatanne yarsho bessata diggiday iya gidennee?

23 Ha77i haaya; ta godaa Asoore kawuwara mandeta. Neeni togganaw danda7iya, gidiya asi demmiko, nam7u mukulu parata taani new immana. 24 Neeni, “Gibxeti para asatanne para gaareta taw yeddana” gada ammaniko, ta godaa tora moconatape issi guuthaaka zaaranaw danda7aka. 25 Hessa bolla qassi, taani ha77i tuma Godaa kiiti bayna ha biitta dhaysanaw koyadina? Goday ba huuphen tana, “He biitta bada, olada dhaysa” yaagis.

26 Hessafe guye, Kalqe na7ay Elyaqeemi, Saminasinne Yo7aasi Asooreta toora moconaako haysada yaagidosona; “Nuuni birshethi eriya gisho, hayyana nuus ne aylletas Aramike doonan oda. Dirsa gimbiya huuphe son de7iya asay si7onna mela, Ibraawetho doonan odopa” yaagidosona. 27 Shin toora moconay zaaridi, “Ha qaala taani hintewunne hinte godaa xalaalas odanaw ta goday tana kiittideyee? Hintera issife banta shi7a maanawunne banta sheesha uyanaw de7iya, ha dirsa gimbiya bolla uttida asa ubbaasa gidenneyee?” yaagis.

28 Asoore toora moconay dendi eqidi, ba qaala dhoqu oothidi, Ibraawetho doonan haysada yaagis; “Asoore kawoy wolqaamay hintena giyaba si7ite! 29 Kawoy hinteko haysada yaagees; ‘Hizqiyaasi hintena cimmofo; I hintena ta kushepe kessi ekanaw danda7enna. 30 Goday tuma nuna ashshana; ha katamayka Asoore kawa kushen gelenna’ yaagidi hinte Godan ammanetanna mela oothofo” yaagees.

31 Hinte Hizqiyaasi odiyaba si7opite. Asoore kawoy, “Taara sigetite; haa taako keyite. Hinte ubbay hinte woyniyapenne hinte balasiyape maana; hinte bookida ollafe haathe uyana. 32 Taani yada, hintena hinte biitta daaniya biitta efana. He biittay kathinne woyney, uythinne woyne gadey kumida biitta; shamaho zayteynne eessi kumida biitta. Hinte taw kiitetiko, de7on daana; hayqeketa. Hizqiyaasi, ‘Goday nuna ashshana’ yaagidi hintena cimmeysa si7opite. 33 Hara kawotethata xoossatape ba biitta Asoore kawa kushepe ashshida xoossi de7ii? 34 Hamaata xoossatinne Arfada xoossati awun de7oona? Safarwayma, Heenanne Iwa xoossati awun de7oona? Enti Samaare ta kushepe kessi ekidona? 35 Ha biittata xoossata ubbaa giddon, ba biitta ta kushepe ay xoossi ashshidashin, Goday Yerusalaame ta kushepe ashshanee?” yaagis.

36 Kawoy kase, “Entaw aykoka zaaropite” yaagidi odida gisho, asay issi qaalaka zaaronna si77i gidoosona. 37 Kalqe na7ay kawo gadho aawatethan aysiya Eliyaqeemi, waanna xaafey Saminasinne taarike xaafey Asaafa na7ay Yo7aasi banta ma7uwa daakidi, Hizqiyaasako bidi, Asooreta toora moconay gidaba ubbaa iyaw odidosona.