1 Kawoy Iyosyaasi Yihuda cimatanne Yerusalaame cimata ubbaa shiishis. 2 Kawoy pude Xoossa keethi keyis; Yihuda asay, Yerusalaamen de7iya asay, kahinetinne nabeti, guuthafe gita gakanaw ubbay iyara issife pude Xoossa keethi keyidosona. Xoossa keethafe bentida caaqo qaala maxaafa ubbaa kawoy entaw nabbabis. 3 Kawoy tuussa matan eqidi, enti Godaa ogiyan hemetananne, iya higgiya, iya wogaanne iya kiita kumetha wozananine kumetha qofan naaganaw, qassi ha maxaafan xaafetida caaquwa oothanaw Godaa sinthan caaqis. Asa ubbayka iyara caaqidosona.

4 Kawoy kahine halaqa Kalqe, iyape garsara de7iya kahinetanne penge naageysata Ba7aale, Asheeranne salo xoolintota goyinnanaw giigisida miisheta ubbaa Xoossa keethafe kessanaada kiittis. Kawoy hessata Yerusalaamepe gaxa kessidi, Qediroona Zangaaran xuuggidi, biduwa Beetele efis.

5 Yihuda katamataninne Yerusalaame yuushuwan de7iya dhoqa goyinno bessa ubban ixaane cuyisanaw Yihuda kawoti sunthida eeqata kahineta ubbaa oosope kessis. Ba7aales, awas, ageenas, xoolintotasinne salon de7iya hara medhetethatas ixaane cuyiseyisata ubbaa diggis.

6 Asheera xoosse misiliya Xoossa keethafe kessidi, Yerusalaame katamaape gaxa efidi, Qediroona Zangaara efidi, yan xuuggis. Xuugetidaysi gaaccidi, dhiille kessis; baana deriya duufo bolla laallis.

7 Xoossa keetha giddon goyinno woga oothidi, addey addera laymatiya keethata laallis; he keethatan maccasati Asheera xoossees geshe suqoosona.

8 Iyosyaasi kahineta ubbaa Yihuda katamatape ehidi, kase kahineti ixaane cuyisiya dhoqa goyinno bessata, Gib7ape bidi Barsaabe gakanaw de7eyisata tunisis. Katamaa haariya Iyyasu Pengiyafe haddirsa baggara de7iya dhoqa goyinno bessaaka laallis. 9 Dhoqa goyinno bessaa kahineti Yerusalaamen Godaa yarsho bessa pude yookona; shin enti hara kahinetara issife irshoy geliboonna daabbo moosona.

10 Kawoy Iyosyaasi Henooma zangaaran de7iya Toofeta yarsho bessa tunisis. Moloka xoossas issi asika ba adde na7aa woyka macca na7a tama giddora aathona mela diggis.Leewe 18:1; Ermi 7:31; 19:1-6; 32:35.

11 Yihuda kawoti Xoossa keethaa geliya pengiyan awas dummayidi wothida parata diggis. Awa parati Naatan-Meleka halaqaa kifiliya matan de7iya dabaaban de7oosona. Hessafe guye, awas dummayidi wothida para gaareta Iyosyaasi taman xuuggis.

12 Akaaza keethaa pooqiya bolla Yihuda kawoti giigisida yarsho bessatan Minaasey Xoossa keethan de7iya nam7u dabaabata giddon giigisida yarsho bessata Kawoy Iyosyaasi laallis. Enta he bessaafe diggidi tincherethidi, Qediroona Zangaaran holis.2 Kawo 21:5; 2 Taari 33:5.

13 Kawoy Yerusalaame katamaape doloha baggara, tunatetha zumaape dugeha baggan de7iya dhoqa goyinno bessata tunisis. He dhoqa bessati Isra7eele kawoy Solomoney, tuna xoossata, Sidoona xoosse Astarooto, Moo7abe xoossaa Kamooshanne Amoone xoossaa Moloka goyinnanaw giigisida dhoqa bessata. 14 Kawoy Iyosyaasi goyinno shucha tuussataka mentherethidi, Asheera xoosse misiletaka qanxerethis. Enti eqida bessan hayqida asa meqethi kunthis.

15 Isra7eele asaa, nagara oosisida Nabaaxa na7ay Iyorbaami Beetelen dhoqa bessan giigisida yarsho bessa Kawoy Iyosyaasi laallis. Laallidi he yarsho bessa shuchataka mentherethidi, dhiille kessis; Asheeri misiliyaka xuuggis. 16 Hessafe guye, Iyosyaasi yuushuwa xeellidi, zumaa lanqen de7iya duufota be7is; meqethata duufotape kessidi, yarsho bessa bolla wothidi, taman xuuggis. Yaatidi yarsho bessa tunisis. Hessi haniday Xoossa asi kase awaajida Godaa qaala maarana. 17 Hessafe guye kawoy, “Ha benteysi oodde duufo?” yaagidi oychis.

Beetele asay, “Yihudape yidi, Beetele yarsho bessa bolla ha77i neeni oothidabay poletanaysa kasetidi odida nabiya duufo” yaagidosona.1 Kawo 13:30-32.

18 Kawoy, “De7o giite; oonika iya meqetha haysafe qaathofo” yaagis. Hessa gisho, Samaarepe yida nabeti addiya meqethaara issife iya meqetha bochonna aggaagidosona.

19 Isra7eele kawoti Samaare katamatan oosisidi, Godaa hanqethida, dhoqa goyinno bessata Iyosyaasi diggis; Beetelen oothidaysada, enta bollaka oothis. 20 I goyinno dhoqa bessan oothiya kahineta ubba yarsho bessa bolla wodhis; qassi he yarsho bessa bolla asaa meqethaa xuuggis. Hessa ubbaa oothidi, Yerusalaame simmis.

21 Kawoy asa ubbaa, “Ha caaqo Maxaafan xaafetidaysada Godaas, hinte Xoossaas Paasika Ba7aale bonchite” yaagidi kiittis. 22 Isra7eele haariya daynnata wodepe doomidi, Isra7eele kawota wodenne Yihuda kawota wode ubban haysa mela Paasika Ba7aale kumethi boncheti erenna. 23 Shin Kawoy Iyosyaasi kawotida tammanne hospuntho laythan Yerusalaame kataman Godaa bonchanaw Paasika Ba7aaley bonchetis.

24 Kahine halaqay Kalqiyaasi Xoossa keethan bentida maxaafan xaafetida higgiya qaala minthanaada, tuna ayyaana xeegeysatanne marota, soo giddo eeqa misileta, eeqa miishetanne Yihuda biittaninne Yerusalaame kataman bentida hara ixetidabata ubbaa Iyosyaasi dhaysis. 25 Muse higgiyada ba kumetha wozanan, ba kumetha shempuwaninne, ba kumetha wolqan Godaako simmida Iyosyaasa mela kawoy, iyape kase gidin, iyape guye dendibeenna.

26 Minaasey Godaa hanqethanaw oothida iita ooso ubbaa gisho, Goday Yihuda bolla hanqetida ba sheniyape simmibeenna. 27 Goday, “Taani Isra7eele ta sinthafe diggidaysada, Yihudaka ta sinthafe diggana; taani doorida katama, Yerusalaamenne ‘Ta sunthay haysan daana’ gida ha keethaa diggana” yaagis.

28 Iyosyaasi hanida harabaynne I oothidabay ubbay Yihuda Kawota Taarike Maxaafan xaafetis. 29 Iyosyaasa wode Gibxe Kawoy Naakoy, Asoore kawa olan maaddanaw Efraxiisa Shaafa bis. Kawoy Iyosyaasi iyara oletanaw ba olanchota ekidi keyis. Shin kawoy Naakoy iyara Magidon gahetidi, iya wodhis. 30 Aylleti iya aha para gaare bolla wothidi, Magidope Yerusalaame ehidi, iya buzo duufuwan moogidosona. He biitta asay Iyosyaasa na7aa Iyo7akaaza dooridi, iya aawa bessan iya tiyidi kawothidosona.

31 Iyo7akaazi kawotiya wode, laythi iyaw laatamanne heedza; I Yerusalaamen heedzu ageena kawotis. Iya aaye sunthay Hamuxaalo; iya Libina katama de7iya Ermiyaasa na7a. 32 Iya mayzati oothidaysada, Iyo7akaazi Godaa sinthan iitaba oothis. 33 Iyo7akaazi Yerusalaamen kawotennaada Gibxe Kawoy Naakoy Hamaata biittan Irbilan iya qachidi heedzu mukulunne oyddu xeetu kilo giraame deexiya biranne hastamanne oyddu kilo giraame deexiya worqa Yihuda asaa giirisis. 34 Kawoy Naakoy Iyosiyaasa na7aa Eliyaqeeme iya aawa bessan kawothis; iya sunthaa Iyo7aqeema yaagidi laammis. Shin Iyo7akaaza Gibxe efin, I yan hayqis.Ermi 22:11-12.

35 Iyo7aqeemi, kawoy Naakoy oychida biranne worqa giira iyaw immis. He giira qanxanaw Iyo7aqeemi he biitta asay demmiya keena birapenne worqafe giira shiishis.

36 Iyo7aqeemi kawotiya wode laythi iyaw laatamanne ichasha; I Yerusalaamen tammanne issi laythi kawotis. Iya aaye sunthay Zabido; iya Ruuma kataman de7iya Padaya na7a.Ermi 22:18-19; 26:1-6; 35:1-19. 37 Iyo7aqeemi ba mayzati oothidaysada, Godaa sinthan iitabaa oothis.