Phexroosi Xaafida
Nam7antho Kiita
Gaatha Qofa
Hawaariya Phexroosi xaafida nam7antho kiitay, dumma dumma bessan de7iya beni ammaniya asaasa. Ha kiitay xaafetida gaasoy, wordo astamaareta iita oosuwanne enta timirtiya gaason medhetida yeella de7uwa ammaniya asay ixana melasa. He medhetida metota digganaw oge gidanay, Yesuusa banta ayfen be7ida asatinne I tamaarsiya wode banta haythan si7ida asati tamaarsida timirtiya baggara Xoossabanne Godaa Yesuus Kiristoosaba ammanthiya era oykethi. Xaafey minthidi odiday, “Kiristoosi nam7antho yeenna” giya wordo timirtiyaba. He qofa minthidi odishe, “Kiristoosi simmidi yoonna gam7iday, asi ubbay ba nagarape simmana melape attishin, oonika dhayana mela koyonna gishosa” yaagees.
Maxaafa Ayfe qofata
Sarothonne woosa (1:1-2)
Ammaniya asay daana duussa (1:3-15)
Kiristoosa bonchuwa (1:16-21)
Wordo astamaaretanne nabeta (2:1-22)
Kiristoosa nam7antho yuussay tuma (3:1-18)
1
1 Yesuus Kiristoosa hawaareynne iya aylley, taani, Simooni Phexroosi, nu Xoossaanne nuna ashshiya Yesuus Kiristoosa xillotethaa baggara nuysa mela al7o ammano ekidaysatas ha dabdaabiya xaafas.
2 Xoossaanne nu Godaa Yesuusa eron aadho keehatethaynne saroy hintew kumo.
Xoossaa Xeessaanne Dooruwa
3 Ba bonchoninne lo77otethan nuna xeegida iya eron de7osinne Xoossaa daanidi daanaw koshshiyaba ubbaa Xoossay ba wolqan nuus immis. 4 Hinte iita amo gaason medhetiya ha alamiyan de7iya dhayope kessi ekanaadanne Xoossaa xoossatethan shaaketanaada, ha imotata baggara daro al7onne gita ufaysaa nuus immis. 5 Hessa gisho, minnidi, hinte ammanuwa bolla lo77otethi, lo77otetha bolla eratethi, 6 eratetha bolla bana haaro, bana haaro bolla genca, genca bolla Xoossaa daano, 7 Xoossaa daano bolla ishatetha keehatethi, ishatetha keehatetha bolla siiqo gujite. 8 Haysati hintew daridi de7iyaba gidiko, Godaa Yesuus Kiristoosa eron maaddiya asinne ayfera de7iya asi oothana. 9 Shin hessati bayna oonika matan de7iyaba xalaala be7iya qooqe. I ba kase nagaraape geeyidaysa dogis.
10 Hessa gisho, ta ishato, hinte xeessanne hinte dooruwa minthanaw kaseysafe aathidi minnite. Hinte hessata oothiyaba gidiko, dhubeteketa. 11 Hessan nu Godaanne nuna ashshiya Yesuus Kiristoosa merinaa kawotethaa geliya kumetha maatay hintew imetana.
12 Hessa gisho, hinte haysata eriyabaanne he oykida tuman minnidi de7iyaba gidikoka, taani haysata ubba wode hintena hassayiso aggike. 13 Taani shempora de7ida wode ubban hintena hassayisanaysi koshshiyaba gada qopayis. 14 Nu Godaa Yesuus Kiristoosi taw qoncisadaysada taani ha hayqiya asatethaa gam7onna qaara yeggada baanaysa erayis. 15 Taani hintefe shaaketikoka hinte haysata ubba wode akeekana mela taw danda7etiyaba ubbaa oothana.
16 Nuuni Godaa Kiristoosa wolqaanne iya yuussaba hintew odey, iya gita bonchuwa be7idipe attishin, medhi kessida hayse gidenna. 17 Daro wolqaama bonchuwafe, “Taani ufaytiya, ta dosiya na7ay haysa” giya qaalay yida wode, Xoossaa Aawape bonchonne galata ekis.Maato 17:1-5; Mar 9:2-7; Luqa 9:28-35. 18 Nuuni geeshsha zumaa bolla iyara de7iya wode he qaalay salope yishin si7ida.
19 Nuus hessafe aadhiya ammanetida tinbite qaali de7ees. Sa7i wontana gakanawunne bakali hinte wozanan dolana gakanaw, dhuman poo7iya poo7o asi naageysada, hinte he qaala naagiko lo77o ootheeta. 20 Ubbaafe kasetidi haysa erite. Geeshsha Maxaafan xaafetida tinbite qaala oonika ba dosidaada birshanaw danda7enna. 21 Tinbite ubbaa, Xoossay kiitida asati Geeshsha Ayyaanay kaalethin, odidosonape attishin, asa shenen odibookona.