1 Shin wordo nabeti kase asaa giddon de7eysa mela ha77ika wordo astamaareti hinte giddon dendana. Enti bantana wozida, Godaa kaddidi, dhaysiya wordo timirtiya ehana. Hessan enti banta bolla ellesidi dhayo ehoosona. 2 Daro asay yeellayiya enta iita ogiya kaallana; enta gaason tuma ogey cayetana. 3 Wordo astamaareti miishe yaaridi bantaw medhi kessida haysen hintena bonqana. Benipe doomidi enta pirday giigidi uttis; enta dhayoyka entana naagidi uttis.

4 Nagara oothida kiitanchotas Xoossay qadhetonna, pirda gallas gakanaw gaanname dhuma ollan enta qachi yeggis. 5 Hessadaka, Xoossay xillotethabaa odiya Nohenne hara laapun asata ashshidi, Xoossaa goyinnona asay de7iya beni alamiya qadhetonna dhayo haathan dhaysis.Medhe 6:1—7:24. 6 Geellatas leemiso gidana mela Xoossay Soodomenne Gamoora katamata bido oothidi xuuggidi dhaysis.Medhe 19:24. 7 Higges kiitetonna laymatiya asata giddon waayetishe de7ida xillo Looxe Xoossay ashshis.Medhe 19:1-16. 8 He xillo addey enta giddon de7ishe, enti oothiya iita oosuwa gallas gallas be7ida wodenne si7ida wode iya lo77o wozanay un7etees. 9 Hessa gidiko, Goday, bana goyinniya asata paacepe waati ashshaneko, qassi nagaranchota pirda gallasaas gakanaw waatidi seerishe naagisaneeko erees. 10 Ubbaafe aathidi tuna amon asho qofa kaalleysatanne maata aawata kadheyisata, pirda gallas gakanaw Goday naagisis.

He asati ganje minonne otorancho gidiya gisho, salo medhetethata cayishe yayyokonna. 11 Shin kiitanchoti wordo astamaaretape wolqaninne minotethan daro aadhosonashin Godaa sinthan salo medhetethata cayokona. 12 Shin he asati banta eronnaban gelidi cayoosona. Enti oyketanawunne hayqanaw yeletida, wozani bayna do7a mela hanoosona; entika wora do7ada coo dhayana.

13 Enti gathida metuwada zaari metootana. Seeta gallas yexishe gupeysa ufaysiyabaa gidi qopoosona. Enti kawushatanne tunata gidi de7ishe hintera shaaketiya siiqo imatuwan ufaytoosona. 14 Laymatiya maccasi xeellidi aggonna ayfey entaw de7ees; qassi nagara ootheysa aggokona. Ammanon minniboonna asaa cimmoosona. Entaw ubba wode amotiya wozani de7ees; enti baadetidaysata. 15 Enti suure oge aggidi, makalla miishe siiqidi balida, Bi7oora na7aa Balaama ogiya kaallidosona.Taybo 22:4-35. 16 I ba nagara gaason hanqetis; dooni bayna harey asada haasayidi nabiya gooshshatethaa teqis.

17 He asati melida pultota melanne carkoy tookidi efiya shaara mela; enta naagey sakana dhumaa. 18 Enti hadanne otoro oda odetishe balan de7iya asaa giddofe kessi ekidi buroo minniboonna asata laymatetha asho amon cimmidi balethoosona. 19 Enti bantaw dhayo aylletethan de7ishe haratako, “Hinte aylletethafe keyana” yaagosona. Ayis giiko, asi ba xoonetidaba ubbaas aylle. 20 Enti ashshiya nu Godaa Yesuus Kiristoosa eridi ha alamiya tunatethaafe kessi ekidaape guye, zaari qaxetidi xoonetiko kase de7iya de7uwape guyeysi entaw iita gidana. 21 Enti xillotetha ogiya eri simmidi aggeysafe koyrottidi geeshsha kiitta eronnaako entaw lo77oshin. 22 “Kani ba cooshshaako guye simmees” qassi, “Meecetida gudunthoy guye simmidi urqan gondoretees” giya leemisoy tuma gideysi enta bolla oothees.Leemi 26:11.