1 Isra7eele zare ubbay Dawitako Kebroona yidi, “Nuuni ne ashonne ne suuthu. 2 Kase Saa7oli nuus kawo gididi de7iya wodeka Isra7eele asaa olas kaalethiday nena. Goday nena, ‘Neeni ta asaa Isra7eele heemmana; enta bolla kawotana’ yaagidi qaala gelis” yaagidosona. 3 Isra7eele cimati ubbay kawa Dawitako Kebroona yidosona; I entara Kebroonan Godaa sinthan caaqis; Isra7eele bolla kawotana mela Dawita tiyidosona.

4 Dawiti kawotiya wode iyaw hastamu laythi; I oytamu laythi kawotis. 5 Kebroonan Yihuda bolla laapun laythinne usupun ageena kawotis; Yerusalaamen Isra7eele bollanne Yihuda bolla hastamanne heedzu laythi kawotis.

6 Yerusalaamen de7iya Yaabuse asaa olanaw Dawitinne iya asay bidosona. Yaabuse asay, “Dawiti ha katamaa gelanaw danda7enna” gidi qopida gisho hari attoshin, “Qooqetinne wobbeti nena teqanaw danda7oosona; ne ha katamaa gelaka” yaagidosona. 7 Gidoshin, Dawiti Xiyoonen de7iya enta miixa oykin, iya Dawita katama gidasu.

8 He gallas Dawiti, “Yaabuse asaa olidi oykiya oonika Dawita morke gidida wobbetinne qooqeti de7iya bessaa gakanaw shaafara pude keyanaw koshshees” yaagis. Hessa gisho, “Qooqetinne wobbeti gadho gelokona” geetetis. 9 Dawiti he miixaa oykidi, yan de7is; he miixaa Dawita katamaa yaagidi sunthis. Dawiti Miilope doomidi he katamaa yuushshidi gimbis. 10 Ubbaafe Wolqaama Goday Xoossay iyara de7iya gisho Dawiti minni minni bis.

11 Xiroosa kawoy Kiraami Dawitas kawo gadho keexana mela ziga mithi, anaaxetanne shuchu masseyisata yeddin, enti iyaw keethe keexidosona. 12 Goday Isra7eele bolla iya kawo oothidi minthidaysanne ba asaa Isra7eele gisho iya kawotethaa dhoqu oothidi bonchidaysa Dawiti eris.

13 Dawiti Kebroonape Yerusalaame yidaape guye, hara laggethotanne macheta gujidi ekin, hara macca naytinne adde nayti iyaw yeletidosona. 14 Yerusalaamen iyaw yeletida adde nayta sunthay Samu7a, Shobaaba, Naatana, Solomone, 15 Yibhaara, Elishu7a, Nefega, Yafi7a, 16 Elishama7a, Eliyaadanne Elfalaxa.

17 Dawiti Isra7eele bolla kawo gididi tiyetidaysa Filisxeemeti si7ida wode enti ubbay Dawita koyanaw keyidosona; shin Dawiti hessa si7idi miixan bidi gelis. 18 Filisxeemeti bidi, Raafayme zangaaran laaletidi uttidosona. 19 Hessa gisho, Dawiti, “Taani bada Filisxeemeta olo? Neeni enta taw aathada immanee?” yaagidi Godaa oychis.

Goday, “Ee ola; tuma ta enta new aathada immana” yaagis.

20 Dawiti Ba7al-Parasime geetetiya bessaa bidi, yan enta xoonis. I, “Di7o haathi menthidi keyeysada Goday ta morketa ta sinthan mentherethis” yaagis. Hessa gisho, he bessa sunthay Ba7al-Parasime*Ba7al-Parasime: Ha sunthaa birshethay “Menthidi gelida Godaa” guussu. geetetis. 21 Filisxeemeti banta eeqata he bessan yeggidi bin, Dawitinne iya asay he eeqata ekidi bidosona.

22 Filisxeemeti guye bidi, nam7antho Raafayme zangaaran laaletidi uttidosona. 23 Dawiti Godaa nam7antho oychin, Goday, “Enta guye baggara teqada wolaa sinthan enta ola, shin entaw som7on keyopa. 24 Wola mithaa xeeran salpe qaala neeni si7iya wode Filisxeeme olanchota shocanaw Goday neepe sinthe aadhidaysa erada ellesa” yaagis. 25 Dawiti Goday kiittidaysada oothis; Geebape Gezera gakanaw Filisxeeme olanchota wodhis.