1 Isra7eele giddofe dooretida hastamu mukulu asata Dawiti zaaridi shiishis. 2 Dawitinne iya asa ubbay Yihuda Baala*Yihuda Baala: Qiriyaati Yi7aarime guussu. katamaape dendidi, kiruubetape giddon ba kawotetha araata bolla uttida Ubbaafe Wolqaama Godaa sunthan xeegetida Xoossa Taabotiya ehanaw bidosona. 3 Enti Xoossa Taabotiya ooratha gaaren wothidi, dere huuphen de7iya Amnadaabe soope ehidosona. Amnadaabe nayti Oozinne Ahiyoy ooratha gaariya kaalethoosona. 4 Dere huuphen de7iya Amnadaabe soope Xoossa Taabotiya ehiya wode Ahiyoy Taabotiyape sinthara hemetees. 5 Dawitinne Isra7eele asa ubbay diithan, maasinqon, karaabon daalaninne shaashshoten kaa7ishe banta kumetha wolqan Godaa sinthan ufaytidi bonchoosona.

6 Naakoni katha bukiya wudumma gakiya wode boorati dhubetin, Oozi ba kushiya yeddidi, Xoossa Taabotiya oykis. 7 Oozi Taabotiya bochida gisho Godaa hanqoy iya bolla eexis. Xoossay iya shocin he bessan Xoossaa Taabotiya matan hayqis. 8 Godaa hanqoy Ooza shocida gisho Dawiti azzanis. He bessay hachi gakanaw Oozi shocetida bessaa geetetees.

9 He gallas Dawiti Godaa yayyida gisho “Godaa Taabotey taako waanidi yaanee?” yaagis. 10 Hessa gisho, I Godaa Taabotiya baara Dawita Katamaa ehanaw koybeenna. Hessa aggidi Gaate addiya Abidaara soo efis. 11 Godaa Taabotey Abidaara son heedzu ageena gam7is; Goday Abidaaranne iya soo asaa ubbaa anjis.

12 Xoossa Taabotiya gisho Goday Abidaara soo asaanne iyaw de7iya ubbaa anjidaysa kawoy Dawiti si7is. Hessa gisho, Dawiti Abidaara soo bidi, Xoossa Taabotiya Dawita Katamaa ufaysan ehis. 13 Dawiti Godaa Taabotiya tookida asati usupuna tango tangida wode enta essidi, issi kormanne issi anqara mari yarshis. 14 Dawiti liinope oosetida efuude ma7idi, baw de7iya wolqa ubban Godaa sinthan duris. 15 Dawitinne Isra7eele asa ubbay ufaysan ililishenne moyze punnishe Godaa Taabotiya Dawita Katama ehidosona.

16 Godaa Taabotey Dawita Katama geliya wode Saa7ola na7iya Melkoola maskootera xeellada, kawoy Dawiti Godaa sinthan gupishininne durishin be7ada ba wozanan kadhasu.

17 Dawiti Godaa Taabotiya wothanaw tolida dunkaaniya giddon Taabotiya wothin, Dawiti xuussa yarshonne issifetetha yarsho Godaas yarshis. 18 Dawiti xuussa yarshonne issifetetha yarsho yarshidaape guye Ubbaafe Wolqaama Godaa sunthan asaa anjis. 19 Isra7eele asa ubbaas, maccas addes huuphen huuphen issi issi uythi, issi issi qanxo ashonne issi issi woyne nuka gishis. Hessafe guye asa ubbay ba soo soo simmis.

20 Dawiti ba soo asaa anjanaw soo simmida wode Saa7ola na7iya Melkoola iya mokanaw keyada, “Pathonna asati kallo hemeteysada hachi Isra7eele kawoy ba macca aylleta sinthan kallotidi ay mela bonchetide!” yaagasu.

21 Dawiti, “Ne aawapenne iya soo asape aathidi ba asaa Isra7eele kaalethana mela tana doorida Godaa sinthan duras. Taani Godaa bonchoos dursa aggike. 22 Taani haysafe aathada buroo tana toochana; tanatethaa ziqi oothana. Shin neeni gida macca aylleta sinthan ta bonchetana” yaagis.

23 Saa7ola na7iya Melkoola hayqana gakanaw na7a yelabuuku.