1 Kawoy ba gadhon wopu gidi uttidaapenne Goday iya yuushuwan de7iya iya morketape shempisidaape guye, 2 nabiya Naatanako, “Taani zigape keexetida keethan de7ayis, shin Xoossa Taabotey dunkaanen de7ees” yaagis.

3 Naatani, “Oothanaw ne wozanan qopidaba ubbaa ootha; Goday neera de7ees” yaagis.

4 Shin he qamma Godaa qaalay Naatanako yidi, 5 “Bada ta aylliya Dawita haysada yaaga; ‘Taani daana keethaa keexanay nena gidaka. 6 Taani Isra7eeleta Gibxe biittafe kessida wodepe doomada hachi gakanaw keethan de7abike; taani dunkaanen yaanne haanne yuuyashe de7as. 7 Taani Isra7eele asaara yuuyida bessa ubban ta asa Isra7eele heemmana mela taani shuumida asaa, “Taw ziga mithan ayis keethe keexabikii?” gada oychabike’ yaagis.

8 “Hiza, ta aylliya Dawitas oda; ‘Ubbaafe Wolqaama Goday neeko haysada yaagees; taani nena hentha bessafe, dorse heemmiya soope denthada ta asaa Isra7eele kaalethana mela oothas. 9 Neeni bida bessa ubban taani neera gidas; ne morketa ubbaa ne sinthafe dhaysas. Ha77i zaarada taani ha sa7an eretida gita asatada ne sunthaa gitayana. 10 Taani ta asaa Isra7eeles besse immada, enta he bessan tokana. Enti banta bessan daana; nam7antho dagammokona. Kase daynnata wodepe doomidi hanidaysada hizape guye enta iita asi haarenna. 11 Taani nena ne morketa ubbaafe shempisana.

“ ‘Hessa bolla gujidi Goday ba huuphen taani new keethe keexana*Ne araatan uttiya sheeshi immana. yaagidi odis. 12 Ne barey wurin, hayqada ne mayzata ne gakiya wode ne gulbatape keyida na7a taani denthana; iya kawotethaa minthana. 13 Ta sunthaas keethe keexanay iya; taani iya araata merinaw mintha essana. 14 Taani iyaw aawa gidana; ika taw na7a gidana. I baliya wode taani iya asa xam7an, asi shociya lisson seerana. 15 Shin taani ne sinthafe diggida Saa7olape ta keehatethay eketidaysada iyape kumthi eketenna. 16 Ne kochatinne ne kawotethay ta sinthan merinaw daana; ne araatay merinaw minnidi eqana’ ” yaaga.

17 Naatani Goday iyaw qoncethan bessida qaala ubbaa Dawitas odis.

18 Hessafe guye, kawoy Dawiti giddo gelidi Godaa sinthan uttidi haysada yaagidi woossis. “Abeeti ta Godaa xoossaw, hachi gakanaw neeni haysa ubbaa oothanaw ta oonee? Ta soo asayka aybee? 19 Abeeti ta Godaw, Xoossaw, haysi ne ayfe sinthan guutha daanin, sinthafe ne aylliya kochatas oothanaba odadasa. Ta Godaa Xoossaw, neeni asara odetiya ogey haysee?

20 “Haysafe aadhiyaba taani, Dawiti ay gaanaw danda7iyana? Ta Godaa Xoossaw, neeni tana ne aylliya eraasa. 21 Neeni ne qaala gisho, ne wozanaa qofaada ha gitaba oothada tana ne aylliya bessadasa.

22 “Abeeti Ta Godaa Xoossaw, neeni gita. Ne meli baawa; nuuni nu haythan si7idaysada neepe attishin, hara xoossi baawa. 23 Ne ase oothanaw Gibxefe wozida ne asaa Isra7eele daaniya hara kawotethi sa7a bolla baawa. Neeni entaw oothida gitanne malaalsiya oosota gaason ne sunthay biittan eretis. Neeni ne asa sinthafe hara kawotethatanne enta xoossata goodda kessadasa. 24 Ne asaa Isra7eele merinaw nebaa oothadasa; minthadasa. Abeeti Godaw, ne enta Xoossa gidadasa.

25 “Abeeti ta Godaw, Xoossaw, neeni ne aylliyasinne iya keethaas oothana gada gelida qaala merinaw naaga; ne qaalatho ootha. 26 Hessan ne sunthay merinaw gita gidana. Asay nena, ‘Ubbaafe Wolqaama Goday Isra7eele Xoossaa’ yaagana. Ne aylliya Dawita kochatika ne sinthan minnidi eqana.

27 “Abeeti Ubbaafe Wolqaama Godaw, Isra7eele Xoossaw, neeni, ‘Ne kochati merinaw kawotana’ yaagada taw ne aylliyas caaqadasa. Hessa gisho, taani ne aylley ha woosa woossanaw xaalas. 28 Abeeti Ta Godaa Xoossaw, neeni Xoosse! Ne qaalay tuma; neeni ha lo77obata oothana gada taw ne aylliyas odadasa. 29 Ne sinthan merinaw daana mela ne aylliya kochaa anja. Abeeti Ta Godaa Xoossaw ne gidaysada ne anjiko ne aylliya keethay merinaw anjetana” yaagidi woossis.