1 Laytha laamen*Laytha laame: Isra7eele laytha laamey Maggabitepenne Maazepe giddon de7iya qamma. kawoti olas keyiya wode Dawiti ba asaaranne Isra7eele olanchotara issife Iyo7aaba olas yeddis. Enti Amoone olidi, Raaba katamaa teqidosona. Shin Dawiti Yerusalaamen attis.

2 Issi gallas omarsi Dawiti ba hiixape dendidi, keethaa bolla de7iya bessaa keyidi hemetishe bolla meecetiya issi maccasi be7is; he maccasiya daro mala lo77o. 3 Dawiti iya ooneko eranaw koyidi ase kiittis. Kiitetida addey, “Iya Eliyaaba na7iw, Hite addiya Ooriyoona machiw Barsaabo” yaagis. 4 Dawiti ase kiittidi, iyo ehisis, iira aqis. He wode iya kushe metoy aadhin, geeyada de7awusu. Iya ba soo simmada basu. 5 Guyepe iya qanthatidaysa erida wode Dawitako, “New qanthatas” yaagasu.

6 Dawiti, “Hite addiya Ooriyoona haa yedda” yaagidi Iyo7aabako kiittis. Iyo7aabi Ooriyoona Dawitako yeddis. 7 Ooriyooni yin Dawiti, “Iyo7aabi ay melee? Olanchoti ay melee? Olay waanii?” yaagidi oychis. 8 Dawiti Ooriyoonako, “Soo bada shempa” yaagin, Ooriyooni kawo gadhope keyidi bis. Kawoy Ooriyoona guyera kathi yeddis. 9 Shin Ooriyooni soo boonna kawo gadho dirsa pengiyan ba godaa aylletara aqis.

10 Ooriyooni ba soo boonnaysa Dawiti si7idi, “Neeni haahosoope yadasa gidikii? Ne soo ayis babikii?” yaagidi oychis.

11 Ooriyooni Dawitako, “Taabotey, Isra7eele asay, Yihuda asay, ta halaqay Iyo7aabinne kawa asay denban dunkaanen de7oosona. Yaatin ta waanada soo bada mo, uyo, qassi ta machera waanada aqo? Ne shempoy ero! Taani haysa melaba oothike” yaagidi zaaris.

12 Dawiti, “Issi gallas haysan gam7a; wonto nena guye yeddana” yaagis. Ooriyooni he gallasinne wontetha gallas Yerusalaamen gam7is. 13 Dawiti shoobbin Ooriyooni iyara mis; I mathotana gakanaw Dawiti iya ushshis. Shin he wode omarsi Ooriyooni ba soo boonna, ba hiixa hiixidi ba godaa aylletara aqis.

14 Wontethe Dawiti Iyo7aabas dabdaabe xaafidi, Ooriyoona bolla yeddis. 15 Dawiti ba dabdaabiyan, “Ooriyoona olay goobiya bessan sintha bagga aatha. I shocetidi hayqana mela iya matape haakite” yaagis.

16 Iyo7aabi he katamaa teqida wode I eriya mino morke olanchoti de7iya bessan Ooriyoona essis. 17 Katamaa asati keyidi Iyo7aabara oletidosona. Dawita olanchotape guutha asati hayqidosona; Ooriyooni Hite addeyka hayqis.

18 Iyo7aabi olan hanidaba ubbaa Dawitas kiittis. 19 Iyo7aabi kiitetidi biya addiyako, “Olan hanidaba ne kawas oda wursida wode, 20 kawoy shenetidi, ‘Hinte entara oletanaw katamaako ayis shiiqidetii? Enti gimbiya bolla eqidi dongen dukanaysa ereketii? 21 Gediyoona na7ay Abimelekey waanidi hayqidaako akeekeketii? Mayde gimbiya bollara duge holada Tebesa geetetiya bessan wodhiday issi maccas gidekee? Yaatin, hinte gimbiyako ayis shiiqidetii?’ yaagidi oychiko, neeni, ‘Ne aylley, Hite addey Ooriyoonika hayqis’ ” yaaga.

22 Kiitetidaysi bidi Iyo7aabi kiittidaba ubbaa Dawitas odis. 23 Addey, “Nu morketi nuupe wolqaamidosona; nuura oletanaw katamaa gaxan de7iya demba bessaa keyidosona. Shin nu enta katama pengiya gakanaw guye zaaridi yedethida. 24 Hessafe guye, dongen dukeysati gimbiya bolla gididi ne aylleta dongen dukidosona. Kawaw, ne asatape guuthati hayqidosona; ne aylley, Hite addey Ooriyoonika hayqis” yaagis.

25 Dawiti kiitetidaysako, “Neeni Iyo7aabako haysada yaaga; ‘Toori gedeka haaka miya gisho haysas azzanopa; katamaa olada oykanaw minna’ yaagada iya minthetha” yaagis.

26 Ooriyoona machiya ba azinay hayqidaysa si7ida wode iyaw yeekasu. 27 Iya kayo wotha simmin, Dawiti kiittidi iyo ba soo ehis. Iya iyaw macho gidada adde na7a yelasu. Shin Dawiti oothida oosoy iita gidiya gisho Goday ufaytibeenna.