1 Goday nabiya Naatana Dawitako kiittin, Naatani iyako yidi, “Issi kataman nam7u asati de7oosona; entafe issoy dure; qassi hankoy manqo. 2 Dure addiyas daro dorsinne mehey de7ees. 3 Shin manqo addiyas shammidi heemmiya issi dorsa mareepe attishin, hari baawa. He dorsiya iya son iya naytara issife diccasu. I ba miya kathaafe muzees; ba uyaa ushshafe ushshees; iya iya ki7one zin7awusu. He dorsiya iyaw macca na7a mela.

4 “Issi gallas issi imathi duriya soo yis. Durey ba dorsaafe woyko ba mehepe shukidi, imathe mokanaw koybeenna. Shin I he manqo addiya dorsiw ekidi, he imathaas miyaba giigisis” yaagis.

5 Dawiti he dure addiya bolla shene eexidi, “De7o Goday eriya mela, haysa oothida addey hayqanaw bessees. 6 Qassi qadhey bayna I hessa oothida gisho, he dorsa mare gisho oyddu kushe zaaranaw koshshees” yaagis.

7 Naatani Dawitako, “He addey nena! Goday Isra7eele Xoossay haysada yaagees; ‘Taani nena Isra7eele bolla tiyada kawothas; Saa7ola kushiyape nena ashshas. 8 Taani ne godaa, Saa7ola keethaa new immas; ne godaa macheta ne ki7on yeggas. Isra7eele asaanne Yihuda asaa taani new immas. Ha ubbay guuxis giiko, taani new haraa guja immanashin. 9 Haysa mela iitabaa Godaa sinthan oothada, ayis Godaa qaala kadhadii? Hite addiya Ooriyoona mashshan wodhadasa; iya machiw ne ekadasa. Amoone asata mashshan iya wodhadasa. 10 Neeni tana kadhada, Hite addiya Ooriyoona machiw ekida gisho ne soo asaape mashshi shaaketenna’ ” yaagees.

11 Goday haysada yaagees; “Taani ne soo asaa giddofe ne bolla iita ehana; ne macheta neeni xeellishin denthada, new matiya addiyas immana; seeta gallas he addey ne machetara zin7ana. 12 Neeni hessa geeman oothadasa; shin taani seeta gallas Isra7eele asa ubbaa sinthan oothana” yaagis.

13 Yaatin, Dawiti, “Taani Godaa bolla nagara oothas” yaagis.

Naatani, “Goday ne nagaraa atto gis; neeni hayqaka. 14 Shin ne haysa oothada, Godaa morketi iya kadhana mela oothida gisho yeletida na7ay tuma hayqana” yaagis.

15 Naatani ba soo bidaape guye, Ooriyoona machiya Dawitas yelida na7aa Goday shocin I hargis. 16 Dawiti ba na7aa gisho Xoossaa woossis; Dawiti xoomis; ba kifiliya gelidi qamma qamma sa7an zin7i aqees. 17 Iya soo cimati iya sa7ape dendana mela iya matan eqidi woossidosona; shin I dendonna ixis; I entara kathi mibeenna.

18 Laapuntha gallas na7ay hayqis. Dawita aylleti na7aa hayquwa odanaw yayyidi, “Na7ay paxa de7ishin nuuni Dawita odisin, si7onna ixis. Yaatin, na7ay hayqidaysa nuuni waatidi iyaw odanee? Ooni eri, I bana qohanekoshii?” yaagidosona.

19 Ba aylleti issoy issuwara kalkasheysa Dawiti si7ida wode na7ay hayqidaysa eris. Dawiti, “Na7ay hayqidee?” yaagidi oychis.

Enti, “Ee hayqis” yaagidosona.

20 Yaatin, Dawiti sa7ape dendidi meecetis; qibaate tiyetis; ba ma7uwa laammidi, Godaa keethi gelidi goyinnis. Hessafe guye ba soo bidi, kathi oychin, enti iya sinthe aathin mis.

21 Iya aylleti, “Neeni haysada ayis hanadii? Na7ay paxa de7ishin xoomadasanne yeekadasa; shin na7ay hayqin dendada, kathi madasa” yaagidosona.

22 Dawiti, “Na7ay paxa de7ishin taani xoomasinne yeekas; Goday tana maarin, na7ay paxanekonne” gada qopas. 23 Shin, “Na7ay hayqin, taani ayis xoomo? Taani na7aa guye zaaranaw danda7iyana? Taani iyako baana, I taako yeenna” yaagis.

24 Hessafe guye, Dawiti ba machiw Barsaabo minthethis. Dawiti iiko gelidi iira aqis; iya iyaw adde na7a yelasu. Na7aa Solomone gidi sunthis; Goday he na7aa dosis. 25 Goday na7aa dosida gisho, iya sunthaa “Yididiya” gidi sunthana mela nabiya Naatana kiittis.

26 He wode Iyo7aabi Amooneta katama Raaba olidi kawo miixaa oykis. 27 Iyo7aabi Dawitako, “Taani Raaba katama olada, haathe duuqiya bessaa oykas. 28 Ha77i attida olanchota shiishada katama olada oyka. Hessi hanonna ixiko, taani katamaa oykada ta sunthan xeegetana mela oothana” yaagis.

29 Dawiti ba olanchota ubbaa shiishidi, Raaba katama bidi, olidi oykis. 30 Enta kawa kallachaa iya huuphepe ekis. He worqa kallachay hastamanne ichashu kilo giraame deexees. Iya giddon inqo geetetiya al7o shuchi de7ees. He kallacha Dawiti huuphen wothis. Dawiti katamaape daro di7o di77is. 31 He kataman de7iya asaa kessidi, magaazen, birata konteninne birata kaltan oothana mela oothis. Qassi enti xuube medhana mela oothis. Amoone katama ubban de7iya asaa I haysada oothis. Hessafe guye, Dawitinne iya olanchoti Yerusalaame simmidosona.